1. მუშენ იმსახურენს ნამთინე პატის დო მუს გუვარჩიენთ თე სტატიას?

პატიცემა ნიშნენს განსაკუთრებულ ყურადღებაშ გიმორჩქინას დო დაფასებას. მუშო ოკო რაგად, ჩქი თიცალ პიროვნებეფს ფცენთ პატის, მიდგას განსაკუთრებულ მდგომარეობა უკინებ, ვარდა მუშ საქციელით იმსახურენს პატიცემას. თაშ ნამდა, ჩქინ დუც ოკო ქოპკითხათ, მის ოკო ფცათ პატი დო მუშენ?

2, 3. ა) მუშენ იმსახურენს იეჰოვა განსაკუთრებულ პატის? (ქოძირით სურათ თე გვერდის) ბ) მი რე გამოცხადებაშ 5:13-ს მოშინაფილ კირიბ დო მუშენ იმსახურენს თინა პატის?

² გამოცხადებაშ 5:13-ს ჭარ, ნამდა პატი ფცათ „ტახტის ხენ თის დო კირიბის“. გამოცხადებაშ მა-4 დუდშე იძირე თიშ ართ მიზეზი, მუშენ იმსახურენს იეჰოვა პატის. ანგელოზეფი ხონარ მაღალო განადიდენა იეჰოვას, „თის, მიდგა მარადიულო არსებენს“. თინეფ აცხადენა: „სი ღირს რექ, იეჰოვა, ჩქინ ღორონთი, მიღე დიდება, პატი დო ძალიერება, მუშენდა ირფელ სი გაჭყი, სქან ნებათ არსებენს დო გოჭყაფილ რე“ (გამოცხ. 4:9—11).

³ იესო ქრისტე რე, „ღორონთიშ კირიბი, თე ქიანაშე ცოდაშ მალასარ“ (იოან. 1:29). ბიბლია მირაგადუნა, ნამდა თის არძა თი მართველშე დო მეფეშე უმოს მაღალ მდგომარეობა უკინებ.  თექ ჭარ: „მეფეეფიშ მეფე დო უფალეფიშ უფალი, ხვალე თინა რე უღურალ, კვირდენს თოლუჭირინაფ სინთეს, კოჩისქუას ვა უძირ დო ვართ ძირუნს“ (1 ტიმ. 6:14—16). სინამდვილეს, მუშ ნებათ ნამ მეფექ დათმუ სიცოცხლე ხალხიშ ცოდეფიშ გიშაჸიდირალო? ალბეთ თქვა ხოლო გოკოდან იჸი თი უკოროცხუ ანგელოზეფწკუმა ართო გაცხადათ: „კირიბ, ნამუქით დიჸვილ, ღირს რე მიღას ძალიერება, სიმდიდრე, სიბრძნე, ძალა, პატი, დიდება დო კურთხევა“ (გამოცხ. 5:12).

4. მუშენ ოკო ფცათ პატი იეჰოვას დო იესოს?

⁴ ქუმოკონა მარადიულო ქიფცხოვრათ-და, პატი ოკო ფცათ იეჰოვას დო ქრისტეს. თეს ჯგირო ოძირანს იესოშ სიტყვეფი, ნამუთ მოშინაფილ რე იოანეშ 5:22, 23-მა მუხლეფს: „მუმა მითინს ვასამართლენს, თიქ მთელ სასამართლო სქუას გეგნოჩ, ნამდა არძაქ პატი ქოცას სქუას, მუჭოთ მუმას ცენა პატის. მიდგა სქუას ვა ცენს პატის, თინა მუმას ხოლო ვა ცენს პატის, მიდგაქ თინა მაშკუ“ (წეკითხით ფსალმუნიშ 2:11, 12).

5. მუშენ იმსახურენს ნამთინე პატიცემას დო დაფასებას?

⁵ ჩქი „ღორონთიშ ამნახანტო“ ვორეთ გორჩქინელ (დაბ. 1:27). ათეშგურშენ შხვადოშხვანერო გიმიფრჩქინანთ ნამთინე თი თვისებას, ნამუთ ღორონთის უღუ; ჩქი შემლებუნა გეგმობხანტათ ართიანიშ ჸოროფა, ვაკეთათ ჯგირ დო ქელუდირთათ ართიანს. ღორონთიქ მუჩეს სინდის, ნამუთ მოხვარუნა, გუვარჩუათ ჯგირ ფურშე დო პატიოსნება უპატიოსნებაშე (რომ. 2:14, 15). ხალხიშ უმენტაშის მოწონს სისქვამე დო სისუფთავე. თინეფს ოკონა მშვიდობიან ურთიერთობა უღუდან ართმაჟიაწკუმა. შილებე შურო ვაგინაფლენან თეშ, მუდგარენ დოზათ იეჰოვაშ თვისებეფს გიმირჩქინანდან დო ზუსტას ათეშგურშენ იმსახურენა გარკვეულ პატიცემას დო დაფასებას (ფსალმ. 8:5).

6, 7. მუჭო გენსხვავებუნა იეჰოვაშ მოწმეეფი შხვეფშე, მუჟამსით საქმე კოჩიშ პატიცემას ოხუ?

⁶ საჭირო რე გუვაწონასწორათ, მუნერ პატიცემა გიმიფრჩქინათ შხვეფწკუმა. ამდღა არასრულყოფილ კათაწკუმა მანგარო მოქმედენს სატანაშ ქვეყნიერებას გავრცელებულ შური. ათეშგურშენ უბრალოთ დაფასან დო პატი ცანინ თიშ მანგიორო, თინეფ აკერპენა კოც. თინეფ აღორონთენა რელიგიურ დო პოლიტიკურ ლიდერეფს, სპორცმენეფს, კინოშ მსახიობეფს დო შხვა გიმორჩქინელ კათას. არძა, ახალგაზრდა იჸი დო ვარ ხანშამიშულირ, ოცად თინეფცალო მიქცუას, მიკიქუნას დო თინეფიშ მანერეფ გეგნიღას.

⁷ ჭეშმარიტ ქრისტიანეფს უჩქუნა, ნამდა კოჩიშ თეცალ პატიცემა ვა რე სწორ. იესო ქრისტე რდუ ხვალე ართ სრულყოფილ კოჩი დედამიწას, მიდგაშე შემლებუნა ჯგირ მაგალით გინიბღათ (1 პეტ. 2:21). ჩქი ირიათო ფშუდან ოკო ართ ძირითად ჭეშმარიტება: „არძაქ შეცოდ დო მორკებულ რენა ღორონთიშ დიდებას“ (რომ. 3:23). ნამდვილო, ნამთინ კოჩიშ პატიცემა, ნამუთ გაკერპებაშა გინურსინ, ვა რე გამართლებულ.

8, 9. ა) მუჭო უჯინენა იეჰოვაშ მოწმეეფ მთავრობაშ წარმომადგენელეფს? ბ) მუნერ პატიცემას იმსახურენა ხელისუფლებაშ წარმომადგენელეფ?

⁸ ქვეყნიერებას ნამთინეს მაღალ მდგომარეობა უკებ. მთავრობაშ წარმომადგენელეფს ოვალუნა, ხე ქეშუნწყუან კანონიშ დო წესრიგიშ დაცვებას დო ქიზრუნან მუნეფიშ მოქალაქეეფიშ მოთხოვნილებეფშენ. თენა არძას ჯგირობუას მუღანს. ათეშგურშენ პავლე მოციქულ ქრისტიანეფს უზუკოლუნდ, ნამდა „უმაღლეს ხელისუფალო“ მეურჩქინუდესკო ხელისუფლებაშ წარმომადგენელეფ, ნამდგას ოკო დემორჩილან ქრისტიანეფქ. პავლექ თინეფს მითითება მეჩ: „მიდგას მუ  ოკუთნუნ, თინა ქიმეჩით: მიდგას ოგაფურ — ოგაფურ, . . . მიდგას პატი — პატი“ (რომ. 13:1, 7).

⁹ იეჰოვაშ მოწმეეფი პატის ცენა ხელისუფლებაშ წარმომადგენელეფს თეშ მუჭოთ მიღებულ რე თი ქიანას, სოდეთ მუნეფ ცხოვრენა. ჩქი ფთანამშრომლენთ თინეფწკუმა, მუჟამსით ასრულენა მუნეფიშ მოვალეობეფს. მუშო ოკო რაგად, ჩქინ პატიცემა დო თანამშრომლობა ვეგნურს თი ზღვარს, ნამუთ ბიბლიას რე მოჩამილ. ჩქი თი დონეშა ვემეფრთათ ოკო, ნამდა ღორონთშე უმოსო ხელისუფლებას დევემორჩილათინ დო გეგნურთათ ქრისტიანულ ნეიტრალიტეტიშ პრინციპის (წეკითხით 1 პეტრეშ 2:13—17).

10. მთავრობაშ წარმომადგენელეფწკუმა ურთიერთობაშ მუნერ მაგალით დომტუეს ჯვეშ დროს ცხოვრენდესინ თი იეჰოვაშ მსახურეფქ?

¹⁰ ჯვეშ დროს ცხოვრნედესინ ფერ იეჰოვაშ მსახურეფქ დომტუეს თიშ მაგალით, მუნერ ურთიერთობა ოკო მიღუდან მთავრობაშ წარმომადგენელეფწკუმა. მუჟამსით რომიშ იმპერატორქ მოსახლეობაშ ეჭარუა მითხუნ, იოსებიქ დო მარიამქ დემორჩილეს თე კანონს. თინეფქ მიდართეს ბეთლემშა, თიშ უმკუჯინუო, ნამდა მარიამ ორსულო რდუ დო მალას პირველ სქუაქ ოკო აშუკო (ლუკ. 2:1—5). მუჟამსით პავლეს გლახა საქმეშ კეთებას აბრალენდესინ, თიქ მუშ კანონიერ უფლება გეგმირინუ დო დუდ დეცვუ; თიქ თენა თეშ გაკეთ, ნამდა მეფე ჰეროდე აგრიპაშ დო იუდეაშ გამგებელ ფესტუსიშ პატიცემა გეგმირჩქინ (საქ. 25:1—12; 26:1—3).

11, 12. ა) მუშენ განვასხვავენთ ართიანშე ხელისუფლებაშ წარმომადგენელეფს დო რელიგიურ უნჩაშეფს? ბ) მუნერ შედეგიქ მაჸუნ, მუჟამსით ართ ავსტრიელ მოწმექ პოლიტიკოსიშ პატიცემა გიმირჩქინ?

¹¹ იეჰოვაშ მოწმეეფი ტყურა რელიგიურ უნჩაშეფიშ განსაკუთრებულ პატიცემას ვეგმირჩქინანა, თიშ უმკუჯინუო ნამდა, თინეფ შილებე ელუდან თეს. რელიგიეფიშ უნჩაშეფი ამახინჯენა ღორონთიშ სიტყვას დო თიშ გურაფეფს. მუჟამსით იესო დედამიწას რდუნ, თიქ თიმ დროს ცხოვრენდესინ ფერ რელიგიურ უნჩაშეფშენ თქუ, ნამდა თინეფ ფარისევლეფი დო ჸვერე აწმანჯღვერეფ რენა (მათ. 23:23, 24). მარა მუჟამსით ხელისუფლებაშ წარმომადგენელეფს პატისფცენთ დო ვაფასენთინ, თეს შილებე შურო ვეველუთუნ ფერ, ჯგირ შედეგეფქ ქუმაჸუნას.

¹² ლეოპოლდ ენგლაიტნერ ავსტრიელ იეჰოვაშ მოწმე რდუ, ნამუთ ნაცისტეფქ ოჭოფეს დო ბუხენვალდის საკონცენტრაციო ბანაკშა მატარებელით გინოჸუნდეს. შხვა პატიმარეფწკუმა ართო თე მატარებელს ავსტრიელ პოლიტიკოს, ჰაინრიხ გლაისნერი ხოლო რდუ, ნამუშ საქმიანობა ვა მოწონდეს ნაცისტეფს და ათეშგურშენ ჭოფილ აფუდეს. მატარებელს ჯიმა ენგლაიტნერქ თავაზიანო გეუნწყუ მუშ რწმენა გლაისნერს დო თიქ ხოლო დიდ ინტერესით ქუმურჩქილუ. მაჟია მსოფლიო ჩხუპიშ უკულ, გლაისნერქ ბრელშა გიმირინუ მუშ მდგომარეობა დო მეხვარ იეჰოვაშ მოწმეეფს ავსტრიას. თქვა შილებე შხვა ჯგირ მაგალითეფ ხოლო გიჩქუდან, მუჟამსით იეჰოვაშ მოწმეეფქ ხელისუფლებაშ წარმომადგენელეფიშ პატიცემა გიმირჩქინეს, თეშ მუჭოთ ბიბლია ოგურუანს ქრისტიანეფს.

13. განსაკუთრებულო მი იმსახურენს პატიცემას დო მუშენ?

¹³ ჩქინ და დო ჯიმალეფ იმსახურენა პატიცემას დო დაფასებას; განსაკუთრებულო უხუცესეფ, მიდგას კრებაშ ხემძღვანელობა ოვალნა (წეკითხით 1 ტიმოთეშ 5:17). ჩქი პატის ფცენთ თე ჯიმალეფს ეროვნებაშ, განათლებაშ, სოციალურ  დო ფინანსურ მდგომარეობაშ უმკუჯინუო. ბიბლია თინეფს მიშინუანს, მუჭოთ „ძღვინი“ დო ღორონთი თინეფიშ საშვალებათ ზრუნენს მუშ ხალხშო (ეფეს. 4:8). ქიფიქრით კრებაშ უხუცესეფიშ, რაიონულ ზედამხედველეფიშ, ფილიალიშ კომიტეტიშ დო ხემძღვანელ საბჭოშ წევრეფიშ გურშენ. პირველ საუკუნეს ცხოვრენდესინ თი და დო ჯიმალეფ მანგარო აფასენდეს ხემძღვანელობა ოვალუდუნ თი ჯიმალეფს დო თინეფცალო ჩქი ხოლო ამდღა თაშ იფქციებუთ. ჩქი ვავაკერპენთ ორგანიზაციაშ წარმომადგენელეფს, ნამდგას ირკოჩ იჩინენს დო თინეფწკუმა ვორეთინ თი დროს თეშ ვეფქციებუთ, ითამ ანგელოზეფიშ ხოლოს გივორდათინ. ჩქი ვაფასენთ დო პატის ფცენთ თე ჯიმალეფს, თიშენ ნამდა ღორონთიშ საქმეშო ბრელს ხანდენა დო თანდაბალეფ რენა (წეკითხით 2 კორინთელეფიშ 1:24; გამოცხადებაშ 19:10).

14, 15. მუთ ვაგუნა ნამდვილ ქრისტიან ჭყიშეფ თინეფს, მიდგას სულიერ ჭყიშეფო მოუღ დუდ?

¹⁴ თეცალ უხუცესეფ თანდაბალ სულიერ ჭყიშეფ რენა. თეს თით ოძირანა, ნამდა ვაკონა თეშ მექცუან, მუჭოთ ქვეყნიერებას გიმორჩქინელ კათას ოქცუნა. თინეფ ვაგუნა ამდღანერ დო პირველ საუკუნეშ რელიგიურ უნჩაშეფს, ნამუშ გურშენ იესოქ თქუ: „უჸორა საპატიო ადგილეფ ოსერშეფს დო წოხოლენ ადგილეფ სინაგოგეფს, მოედანეფს ესალმებნა დო ხალხი რაბის უძახუნ“ (მათ. 23:6, 7).

¹⁵ ნამდვილ ქრისტიან ჭყიშეფ ომორჩილუნა იესოშ სიტყვეფს: „ვადოიძახან რაბი, მუშენდა ართ რე თქვან მოძღვარი დო თქვა არძა ჯიმალეფ რეთ. ვართ მუმა დუძახათ მითინს დედამიწას, მუშენდა ართ მუმა რჸუნა — ზეციერი. ვართ აწმანჯღვერე დოიძახან, მუშენდა ართ რჸუნა აწმანჯღვერე — ქრისტე. თქვან შქას უდიდაშ თქვან მსახურ რდას. მიდგა დუც იმაღალენსინ, დემდაბალებ დო მიდგა დუც დემდაბალენსინ, ემაღალებუ“ (მათ. 23:8—12). თქვანო ალბეთ ადვილ გასაგებ რე, მუშენ იმსახურენა მთელ მსოფლიოს კრებეფიშ უხუცესეფი თანამორწმუნეეფიშ ჸოროფას, პატიცემას დო დაფასებას.

16. მუშენ ოკო გაგრძელათ გურაფა დო ბიბლიურ რჩევეფიშ გიმორინაფა, ნამუთ პატიცემაშ გიმორჩქინას ოხუ?

¹⁶ დრო მოსაჭირუნა თიშო, ნამდა ქიდიბგურუათ, მის ბცათ პატი დო მუჭო. თენა პირველ საუკუნეშ ქრისტიანეფს ხოლო ოხუდ (საქ. 10:22—26; 3 იოან. 9, 10). მარა ჩქინ მონდმა დასურო ღირ  თიშა, ნამდა გეგმიბრინუათ ბიბლიურ რჩევეფ, ნამუთ პატიცემას ოხუ. პატიცემაშ გაწონასწორებულო გიმორჩქინას ბრელ ჯგირობუა მოუღ.

17. მუ ჯგირობუა მოჸუნს თინეფიშ პატიცემას, მიდგას შხვადოშხვა თანამდებობა უკინებ?

¹⁷ მუჟამსით ხელისუფლებაშ წარმომადგენელეფიშ პატიცემას გიმოფხანტუნთინ, დიდ ალბათობა რე, ნამდა თინეფქ დეცვან ჩქინ უფლება დო მითინქ ვემეცილან ქადაქებას. ხშირას თეშ შედეგ თინა რე, ნამდა ჩქინ საქმიანობას დადებითო უჯინენა. მუსხირენ წანაშ წოხოლე ართ გერმანელ პიონერ და, ბირგიტ მუშ ძღაბიშ სკოლაშ თებაშ პროგრამას ოსწრუდ. მასწავლებელეფქ ბირგიტის უწუეს, ნამდა მოწმეეფიშ ბაღანეფწკუმა მუშობა სასიამოვნო რდუ დო თქუეს, ნამდა სკოლას მოწმეეფი ვაჸოფედესკონი, თექ მუშობა ძნელ იჸიდ. ბირგიტიქ მასწავლებელეფს უწუ: „ჩქინ ბაღანეფ გურაფლენა ღორონთიშ პრინციპეფით მოქციებას დო თეშა მასწავლებელეფიშ დო შხვეფიშ პატიცემა ხოლო მიშურს“. ართ მასწავლებელქ თქუ: „არძა ბაღანა თქვან ბაღანეფცალ ქორდასინ, სკოლას სამოთხე იჸიდ“. მუსხირენ მარაშ უკულ, ართ-ართ მასწავლებელქ ლაიპციგის კონგრესის დესწრუ.

18, 19. მუშენ რე მნიშვნელოვან უხუცესეფს გაწონასწორებულო ფცათ პატი?

¹⁸ ღორონთიშ სიტყვას მოჩამილ სრულყოფილ დო ბრძნულ პრინციპეფი მიმეხვარებუნა პატიცემათ მივექცუათ კრებაშ უხუცესეფს (წეკითხით ებრაელეფიშ 13:7, 17). ჩქი შემლებუნა ქუვოცქუათ თინეფს, ბრელს ხანდენან თიშენ; თეშ გარდა ოკო მივაჸუნათ თი მითითებეფს, ნამუსით მარზენა. ჩქინ თეცალ თამაშრომლობა მეხვარებ უხუცესეფს, ხიოლით აკეთან მუნეფიშ საქმე. მარა თენა თის ვა ნიშნენს, ნამდა ირფელშენ თინეფს ქუვაგურათ, მაგალთო მიკოქუნას, მოხსენებეფიშ კეთებას ვარდა რაგადის. თენა ვეჸუაფუდ სწორ, მუშენდა უხუცესეფი ხოლო არასრულყოფილეფი რენა. ჩქი ხვალე იესო ქრისტეშ მაგალითის ოკო მივაჸუნათ.

¹⁹ უხუცესეფს ვოხვარუთ, მუჟამსით პატიცემათ ვოქცუთ დო ვართ ხოლო თეშ, მუჭოთ გიმორჩქინელ კათას. თეშ გარდა, თეცალ საქციელით ხეს უნწყუნთ ვეგეამაყან, ვაშუან თიცალ აზრიქ, ნამდა შხვეფშე უმოს რენა ვარდა ნაბეტან მართალო ვეგინან დუდ.

20. მუჭო მიმეხვარებუნა ჩქი შხვეფიშ პატიცემა?

²⁰ შხვეფიშ პატიცემა დო დაფასება მოხვარუნა, ზედმეტო ვეპჸუათ ჩქინ დუდშა კონცენტრირებულ დო დიდ წარმოდგენაქ ვამაშუან ჩქინ დუდშე, მუჟამსით შხვეფშე პატიცემას ვორწყეთ. თენა თის ხოლო მოხვარუნა, მივაჸუნათ იეჰოვაშ ორგანიზაციაშ მითითებეფს დო ვეგმიფრჩქინათ ვა რე საჭირონ ფერ პატიცემა მუჭოთ ჩქინ თანამორწმუნეეფწკუმან თეშ, შხვეფწკუმა ხოლო. თეშ გარდა, ჩქი ვედებრკოლებუთ, მუჟამსით პიროვნება, ნამუსით პატის ფცენთინ, გურს მიტახუნა.

21. მუშენ რე მნიშვნელოვან შხვეფიშ პატიცემა?

²¹ არძაშ უმოს მთავარ თინა რე, ნამდა ღორონთიშ მოსაწონო იფქციებუთ, მუჟამსით თინეფიშ პატიცემას გიმოფხანტუნთ, მიდგას თინა ოკუთნუ. ჩქი ღორონთის ოკონ თეშ იფქციებუთ დო თიშ ართგურობას ვოძირანთ; თეთ პასუხის ვარზენთ არძას, მით ღორონთის ოწინააღმდეგ (იგავ. 27:11). ამდღა ბრელს ვა უჩქუ, მუჭო გიმირჩქინას შხვეფიშ პატიცემა საჭირო რენ თეშ. ჩქი დასურო მარდულეფ ვორეთ, ნამდა მიჩქუნა მუჭო გიმიფრჩქინათ შხვეფიშ პატიცემა ღორონთიშ მოსაწონო.