1, 2. ა) მუშენ ვამკვენა მუჟამსით სირთულეეფს ფხვადუთ? ბ) მუს გუვარჩიენთ თე სტატიას?

 ᲘᲔᲰᲝᲕᲐᲨ მსახურეფს ვამკვენა, მუჟამსით სირთულეეფს ფხვადუთ დო მარჩქილენა თინა, მუდგას ბიბლია იჩიებ: „ღორონთიშ სამეფოშა მინაულარო ბრელ გაჭირება მაჸინა გინაღალარ“ (საქ. 14:22). თეს გეძინელ, ჯგირო მარჩქილენა, ნამდა ჩქინ ნამთინე პრობლემას საბოლათ ღორონთიშ დუნაპირებ ახალ ქვეყნიერებას მეღებუ ბოლო, სოდეთ ვეჸუაფ „ღურა ვართ ნგარა, თვალუა დო ჭუა“ (გამოცხ. 21:4).

² იეჰოვა ვა ფთხილანა განსაცდელეფშე, მარა მოხვარნა გარზებას. ყურადღება ქიმიაქცით, მუ უწუ პავლექ რომს მახორუ ქრისტიანეფს. დუდშე თიქ გაგმუკოროცხჷ სირთულეეფ, ნამდგას მუქ დო შხვა ჯიმალეფქ შეხვადეს დო უკულ ჭარჷ: „ჩქი ირფელს სრულაშე გივორჯგინანთ თიშ ჭყოლოფათ, მიდგაქ მიჸოროფეს“ (რომ. 8:35—37). თენა ნიშნენს, ნამდა იეჰოვას თიმწკუმა ხოლო შეულებ მიგეხვარან, რდათ წარმატებულ, მუჟამსით პრობლემეფს ობრძოლუთ. მორთ გუვარჩუათ, მუჭო მეხვარ იეჰოვაქ იოსების, ჸოფედკო წარმატებულ დო ქობძირათ, მუჭო შეულებ მიგეხვარან თქვა ხოლო.

3. ართუცფას მუქ დითირ იოსებიშ ცხოვრებას?

³ იაკობიქ არგამათ ოძირუ, ნამდა მუშ სქუალეფშე არძაშ უმოსო იოსებ უჸორდჷ (დაბ. 37:3, 4). თეშ გურშენ იოსებიშ უნჩაშ ჯიმალეფს ენჯარეს თიშ დო მუჟამსით საშვალებაქ ქიმიაჩეს, თინეფქ იოსებ მიდიანელ ვაჭარეფს ქიმეჸიდეს. თე ვაჭარეფქ იოსებ ოშობით კილომეტრიშ მაშორაშა, ეგვიპტეშა  მიდეჸონეს, სოდეთ ხოლო ართშა გეგმოჩეს. ასე თინა ფარაონიშ მცველეფიშ უნჩაშიქ, ფოტიფარქ, იჸიდ. მუშმამალას დითირ იოსებიშ ცხოვრებაქ! მუამუშიშ საჸოროფო სქუა ასე ეგვიპტეს ართ უბრალო მონა რდჷ (დაბ. 39:1).

4. მუჭო შილებე შეფხვადათ თიცალ სირთულეეფს, მუნერით იოსების უღუდ?

⁴ ბიბლიაშ ართ-ართ თარგმანს თეცალ სიტყვეფ ჭარჷ: „გლახა მუდგარენ ირკოჩის აღოლე“ (ეკლ. 9:11; „წმინდა ბიბლია – ადვილო გასაგებ თარგმან“ [ინგლ.]). მინშა ფხვადუთ თიცალ სირთულეეფს, ნამდგას ჩქინცალო შხვა ადამიანეფ ხოლო ხვადუნა (1 კორ. 10:13). მინშა სირთულეეფს თიშენ ფხვადუთ, ნამდა იესოშ მოწაფეეფ ვორეთ. მაგალთო, შილებე გუმოძიცანდან, ფთხოზუდან ვარდა რწმენაშ გურშენ ციხეს ქუდმოხუნუან (2 ტიმ. 3:12). მუდგა სირთულეს ვეშეფხვადათინ, რჯერდან, იეჰოვას შეულებ გიმორჯგინაფუან თინეფშა. მუჭო აკეთ თენა იოსებიშ შემთხვევას?

5. მუ მეხვად ფოტიფარქ იოსებიშ წარმატებაშ გურშენ? (დაბ. 39:2—6)

⁵ (წეკითხით დაბადებაშ 39:2—6). ფოტიფარქ ქოძირ, ნამდა იოსებ მანგარ უნარიან დო მოხანდე ახალგაზრდა რდჷ დო თინა ხოლო უჩქუდ, მუ რდჷ თეშ მიზეზ. ფოტიფარქ ქოძირ, ნამდა იოსების არძა საქმეს „იეჰოვა არზენდჷ წარმატებას“, b ათეშენ თე ეგვიპტელ კოჩიქ იოსებ მუშ ჸუდეშ ზედამხედველო გიორინუ დო მთელ ქონება თის ჩაბარ. შედეგო, ფოტიფარ წარმატებულ რდჷ.

6. მუს გინაფლენდკონ იჸიდ იოსებ?

⁶ ეცადით, იოსებიშ ადგილს ქიგიორინუათ თქვან დუდ დო წერმიდგინათ, მუს გინაფლენდჷ თინა. მუჭო ფიქრენთ, მუ ოკოდ თის არძაშ უმოსო? ფოტიფარშე ყურადღება დო თიშე მოწონაშ მეღებაო? მუშო ოკო რაგად, ვარ. იოსების არძაშ უმოსო, მონობაშე გათავისფალება დო მუამუშშა დორთა ოკოდ. მართალ რე, იოსების ფოტიფარიშ ჸუდეს ქიანაშ პასუხიშმგებლობა უღუდ, მარა თინა იშენ მონა რდჷ თიცალ კოჩიშ, მით ვამსახურუდ იეჰოვას. იეჰოვაქ ვა დუშვჷ, ნამდა იოსებიქ მონობაშე გეთავისფალკო. დროშ მიკულაწკუმა ართო, თიშ მდგომარეობაქ ხოლო უმოსო გეუფრაშ.

7. მუჭო გეუფრაშ იოსებიშ სიტუაციაქ? (დაბ. 39:14, 15)

⁷ მუჭოთ დაბადებაშ 39-ა დუდშე ბგებულენთ, ფოტიფარიშ ოსურქ „თოლ ქიგედვჷ იოსების“ დო მუსხირენშა ეცად, მიოჩილითუკო თინა. მარა ირ თეცალ შემთხვევას იოსებ თის ვარიას ურაგადუდ. თეშ გურშენ ფოტიფარიშ ოსურქ გერისხჷ დო იოსების ბრალ ქიგედვჷ, ითამ თიშ გაუპატიურება ოკოდ (წეკითხით დაბადებაშ 39:14, 15). ფოტიფარქ თენა ქიგეგუნ იოსებ საპყრობილეს ქინაჸათ, სოდეთ მუსხირენ წანას ხედჷ (დაბ. 39:19, 20). მუნერ რდჷ თე საპყრობილე? იოსებიშ გიმორნაფილ ებრაულ სიტყვა „საპყრობილე“ შილებე ნიშნენდას ტომბას ეშანთხორილ ადგილს. მუთ ოძირანს, ნამდა თექ მანგარ უკმელა რდჷ დო იოსებ უიმენდოთ გინაფლენდკონ იჸიდ დუდის (დაბ. 40:15). თეს გეძინელ, ბიბლიაშე თის ხოლო ბგებულენთ, ნამდა იოსების კუჩხეფ დო კისერ ბორკილ აფუდ (ფსალმ. 105:17, 18). თიშ სიტუაცია ირდღას იუფრაშებუდ — ართ დროს მონა, ნამდგას ფოტიფარიშ ჸუდეს ონდუდეს დო აფასენდეს, ასე საცოდალ პატიმარ რდჷ.

8. მუშა შემლებნა ვორდათ დარწმუნებულ თიმწკუმა ხოლო, მუჟამსით სიტუაცია იუფრაშებ?

⁸ დღას ქუნორღვენანო შემთხვევა, მუჟამსით თქვან მდგომარეობაქ ხოლო უმოსო გეუფრაშ თიშ უმკუჯინუო, ნამდა ბრელს ლოცულენდით? მინშა, თექ შილებე მოხვადას. იეჰოვა ვა ფთხილანა თი განსაცდელეფშე, ნამდგას სატანაშ ქვეყნიერებას ფხვადუთ (1 იოან. 5:19). მარა ართ მუდგარენს დარწმუნებულ რდათ — იეჰოვას ბოლოშა არჩქილე, მუს გინაფლენთ დო ზრუნენს თქვანდე (მათ. 10:29—31; 1 პეტ. 5:6, 7). თეწკუმა ართო, თიქ დემეპირეს: „დღას ვა დოიტენქ დო დღას ვემგოტენქ“ (ებრ. 13:5). იეჰოვას შეულებ მიგეხვარან გარზებას, თიმწკუმა ხოლო, მუჟამსით მდგომარეობა უიმენდოთ იძირე. გუვარჩუათ, მუჭო მოხვად თექ იოსებიშ შემთხვევას.

9. სოვრეშე იძირე, ნამდა იეჰოვა რდჷ იოსებწკუმა, მუჟამსით თინა ჭოფილ რდჷ? (დაბ. 39:21—23)

⁹ (წეკითხით დაბადებაშ 39:21—23). მართალ რე იოსებ გლახა მდგომარეობას რდჷ, მარა იეჰოვა ოხვარუდ, ჸოფედკო წარმატებულ. სოვრეშე იძირე თენა? დროშ მიკულაწკუმა ართო, თიქ თიცალ პატიცემა დო მოწონა დემსახურ საპყრობილეშ ზედამხედველიშ თოლს, მუნერით ართ დროს ფოტიფარიშ ჸუდეს უღუდ. იოსებ თიქ არძა პატიმარიშ უნჩაშო გიორინუ დო მუჭოთ ბიბლია იჩიებ, „საპყრობილეშ ზედამხედველს ვაფუდ ოზრუნებელ თი ირფელშა, მუთ იოსების ჩაბარ“. იოსებ თეს ველუდკონ იჸიდ. თის მნიშვნელოვან საქმე დავალეს თიშ უმკუჯინუო, ნამდა ბრალ გედვეს თიცალ კოჩიშ ოსურიშ გაუპატიურებას, მით მეფეშ სასახლეს მსახურენდჷ. მუ რდჷ თეშ მიზეზ? მუჭოთ დაბადებაშ 39:23 იჩიებ: „იეჰოვა რდჷ იოსებწკუმა დო არძა საქმეს იეჰოვა უნწყუნდჷ ხეს“.

10. გენწყით, მუშენ შილებე ფიქრენდკო იოსებ, ნამდა არძა საქმეს ვა რდჷ წარმატებულ.

¹⁰ ქეცადით, იოსებიშ ადგილს წერმიდგინათ დუდ. თი ირფელიშ უკულ, მუთ თინა გეგმოჩეს დო ციხეს ქუდახუნეს, ქეშემლებნანო თიშ რაგად, ნამდა ირნერ საქმეს წარმატებულ რდჷ? მუ რდჷ იოსებიშ მიზან? თის არძაშ უმოსო გათავისფალება ოკოდკონ იჸიდ, დო ვართ ხოლო თინა, ნამდა საპყრობილეშ ზედამხედველიშ თოლს ჯგირ სახელ უღუდკო. თიქ შხვა პატიმარს, ნამუთ მალას გიმიშ საპყრობილეშე თხუ, ფარაონწკუმა ქოშინუკო მუშ სახელ დო ქიმეხვარკო გათავისფალებას (დაბ. 40:14). სანარღოთ, თე პატიმარს გაჭყორდჷ თეშ კეთებაქ. ჟირ წანაშე უმოსიქ გემკორთჷ მარა იოსებ კინ ციხეს რდჷ (დაბ. 40:23; 41:1, 14). თეშ უმკუჯინუო, იეჰოვა იშენით ოხვარუდ თის. მუჭო ორთუდ თეს?

11. მუ განსაკუთრებულ უნარ მეჩჷ იეჰოვაქ იოსების დო მუჭო იმოქმედ თექ იეჰოვაშ განზრახვაშ შესრულებაშა?

 ¹¹ მუჟამსით იოსებ დიო ხოლო ციხეს რდჷ, იეჰოვაქ ფარაონს ჟირ სიზმარ გიოძირუ. თის სვანჯ მეუდინუ თე სიზმარეფქ დო ოკოდ, გეგუკო, მუს ნიშნენდჷ თინეფ. ათეშენ, მუჟამსით იოსებიშ გურშენ გეგჷ, ნამდა თის შეულებუდ სიზმარეფიშ ენწყუმა, ქიჭანუ თინა. იოსების იეჰოვაშ მოხვარათ შეიალებუ თე სიზმარეფიშ ენწყუმაქ დო ფარაონს თინა ხოლო უწუ, მუჭო ოკო მიქცუკო. მუჟამსით ფარაონქ ქოძირ, ნამდა იეჰოვა უნწყუნდჷ ხეს თე ახალგაზრდა კოჩის, მთელ ეგვიპტეს ოჭკუმალიშ განაწილება თის დავალ (დაბ. 41:38, 41—44). უმოს გვიანო, ეგვიპტეს დიდ შქირენაქ იჸუ. თექ ქანაანშა ხოლო იმოქმედ, სოდეთ იოსებიშ ოჯახ ოხორანდჷ. ასე თის უღუდ შესაძლებლობა, ირსხუკო მუშ ოჯახიშ წევრეფ დო გინასქილიდუკო მესიაშ ხაზ.

12. მუ აკეთ იეჰოვაქ იოსებშო?

¹² დეფიქრით იოსებიშ ცხოვრებას მოხვალამირ მოვლენეფშე. მიშ ჭყოლოფათ მიაქცუ ყურადღება ფოტიფარქ იოსებცალ უბრალო მონას? მიქ მიოღებაფუ მოწონა ციხეშ ზედამხედველიშ თოლს, საცოდალ პატიმარს? მიქ გიოძირუ ფარაონს გლახა სიზმარეფ დო მიქ მეჩჷ იოსების თინეფიშ ენწყუმაშ უნარ? მიქ გინაჭყვიდირაფუ ფარაონს, ნამდა იოსებ გიორინუკო ეგვიპტეს ოჭკუმალიშ გუმანაწილებერო? (დაბ. 45:5). არგამა რე, თე ირფელიშ უკახლე იეჰოვა მიკორდჷ დო თიქ მიოჭირნაფუ იოსების წარმატებაშა. საბოლათ, იოსებიშ ჯიმალეფიშ უბადო განზრახვა, იეჰოვაქ მუშ ნებაშ შეიოსრულებერო გეგმირინუ.

13. აკონტროლენსო იეჰოვა ირფელს, მუთ ჩქინ ცხოვრებას ხვადუ? გენწყით.

¹³ მუს ბგურაფლენთ იოსებიშ შემთხვევაშე? ნიშნენსო თენა თის, ნამდა იეჰოვა აკონტროლენს არძა სიტუაციას ჩქინ ცხოვრებას? ვარდა ოკო იფიფქრათო, ნამდა იეჰოვა გლახა მუდგარენეფს თიშენ უშვენს, ნამდა საბოლათ ჯგირ შედეგეფ მიბღათ? ვარ, ბიბლია თეს ვაგურუანს (ეკლ. 8:9; 9:11). თეშ გინაწონს მიჩქნა, ნამდა იეჰოვა ორწყე ჩქინ სირთულეს დო მირჩქილენა, მუჟამსით მოხვარას ფთხულენთ (ფსალმ. 34:15; 55:22; ეს. 59:1). ხვალე თენა ვარინ, იეჰოვა მოხვარნა, გივორჯგინათ სირთულეეფს. მუჭო ორთჷ თინა თეს?

14. მუჭო მოხვარნა იეჰოვა სირთულეეფიშ დროს?

 ¹⁴ ართ-ართ საშვალება, მუდგათ იეჰოვა მოხვარნა, რე გურიშელაკინა დო გურიშექექაფა თიმწკუმა, მუჟამსით თენა არძაშ უმოსო მოსაჭირნა (2 კორ. 1:3, 4). ზუსტას თაშ მოხვად ჯიმა ეზიზიშ შემთხვევას, ნამუთ თურქმენეთშე რე. თინა რწმენაშ გურშენ ჟირ წანას ციხეს ქუდახუნეს. ეზიზ იშინანს: «სასამართლო მიღუდუნ თიმ ოჭმარეს ართ ჯიმაქ ესაიაშ 30:15 გეშამკითხჷ, სოდეთ ჭარჷ: „თქვან ძალა მშვიდას რინას დო მენდებას იჸუაფ“. თე მუხლიშ ჭყოლოფათ სიმშვიდე ვამდინუაფ დო ირფელ იეჰოვაშა მაფუდ მენდებულ. თე სიტყვეფშე დაფიქრებაქ მანგარო მიმეხვარ, მუჟამსით ციხეს ვოხედ». პირადო თქვა, შეილებნანო ქიგიშინათ, მუჭო ელაიკინეს დო ეიქექუეს გურშა იეჰოვაქ თიმწკუმა, მუჟამსით თენა არძაშ უმოსო გოსაჭირდეს?

15, 16. მუ დიგურეთ ტორიშ შემთხვევაშე?

¹⁵ მუჟამსით მუდგაინ განსაცდელს გეგნიბღანთ, ხშირას ზუსტას თე დროს ფხვადუთ, მუჭო მიმეხვარეს იეჰოვაქ თიშ გარზებას. თენა მუშ დუდშა გიმოცად ართ დაქ, სახელო ტორიქ. თიშ ბოშ მეისონ 6 წანას კიბოს ობრძოლუდ დო სანარღოთ, თიქ დოღურ. მუშო ოკო რაგად, ტორი განადგურებულ რდჷ. თინა იჩიებ: „წარმოდგენა ვა მიღ, თეშ უმოს საშინელებაქ მუქ ოკო მოხვადკო ჩქიმ ცხოვრებას. ვა ფიფქრენქ თიშე უფრაშ მუთუნ რდას დიდაშო ვინემ თინა, უჯინედე, მუჭო იტანჯებ სქან სქუა. თეშა გისხუნ, სი გოჭირდას თი ირფელ. დარწმუნებულ ვორექ, თეს არძა მშობელ დემეთანხმებ“.

¹⁶ მუშო ოკო რაგად, ტორის მანგარო უჭირდჷ თიშ ჯინა, მუჭო იტანჯებუდ მუშ სქუა. მარა უკულ ქიმეხვად, მუჭო ოხვარუდ იეჰოვა თე სირთულეშ გარზებას. თინა იჩიებ: „მუჟამსით თი დროს იფშინანქ, ვორწყექ, ნამდა იეჰოვას ვემუტებუქ დო ირიათო მოხვარუდ. მაგალთო, თიმწკუმა  ხოლო, მუჟამსით მეისონ მანგარ გლახათ რდჷ დო მითინიშ ძირაფა ვეშულებუდ, და დო ჯიმალეფ ჟირ საათიშ შარას მიკმიშეს, ნამდა საავადმყოფოშა ქუმორთესკო. საავადმყოფოშ დერეფანს ირიათო რდეს ჩქინ თანაქრისტიანეფ, მით მზათ რდეს, ირნერო ალამდირთესკო. თინეფ ჩქინ მატერიალურ საჭიროებეფშე ხოლო ზრუნენდეს. მანგარ რთულ სიტუაციაშ უმკუჯინუო, დღას ვემებრკებნა თინა, მუთ მოსაჭირდეს“. იეჰოვაქ ტორის დო მეისონს გარზებაშ ძალა ქიმეჩ (ქოძირით ჩარჩო:  „იეჰოვაქ მუჩეს თინა, მუთ მოსაჭირდეს“).

17, 18. მუ მიმეხვარებნა, ქობძირათ დო მარდულობა გეგმოფხანტათ თი ირფელიშ მიმართ, მუდგას იეჰოვა ჩქინ მახვარებელო ორთჷ? (ფსალმ. 40:5)

¹⁷ (წეკითხით ფსალმუნიშ 40:5). გვალაშა ეკმაულარიშ მიზან რე, გვალაშ წვანდშა გეკორთას. მარა მუშო ოკო რაგად, შეულებ ნამთინე დიხას გაჩენდას დო სქვამ ხედეფით ქისიამოვნას. თეშნერო, შემლებნა ჩქი ხოლო, თაშ ქოფთქუათინ, გუვაჩენდათ დო დეფიფქრათ, მუჭო მიმეხვარეს იეჰოვაქ სირთულეეფიშ გარზებას. ირ დღაშ ბოლოს ქოკითხით თქვან დუდის: „მუჭო მაკურთხჷ ამდღა იეჰოვაქ?“, „თიშ უმკუჯინუო, ნამდა პრობლემა დიო ხოლო ვა ჩაფთხიებ, მუჭო მოხვარ იეჰოვა თიშ გარზებას?“. ქიდეკვირით, შეილებნანო ართ მუდგარენ ვარა ქოძირათ, მუდგათ იეჰოვაქ მიგეხვარეს გარზებას?

¹⁸ მუშო ოკო რაგად, ბუნებრივ რე, იბლოცათ თიშ გურშენ, ნამდა ჩქინ პრობლემაქ მიგვარას (ფილ. 4:6). მარა თეწკუმა ართო, ჯგირ იჸუაფ, ყურადღება გეგნიბღათ თი კურთხევეფშა, ნამუთ ასე მიღნა. იეჰოვა მოპირნა, ნამდა გუმამანგარენა დო ქიმმეხვარებნა, გავურზათ სირთულეეფს. ათეშენ, ირო მარდულობა გეგმოხანტით თიშ გურშენ, ნამდა იეჰოვა ელაირენა. თე ირფელიშ უკულ ქოძირუნთ, მუჭო გოხვარნა იეჰოვა, რდათ წარმატებულ. შხვა სიტყვეფით ქოფთქუათინ, მუჭო გოხვარნა, გაურზათ სირთულეეფს, მუჭოთ თენა იოსებიშ შემთხვევას აკეთ (დაბ. 41:51, 52).