Dawatsédé hã ma tinhanaꞌrata Tiꞌai ãma Satanás ĩmorĩꞌrata na tsadawa nhipetse wamhã. Duréihã, ta hã dawatsuꞌuꞌwa aré ĩwẽ, tadzahã, ‘tidzadawa nhipetse na ma tô tsãnaꞌrata’. (João 8:44, 45) Ta hã, ma tô tsima wẽ õhõ ãma dawata dzaꞌra da, tane nherẽ, dawatadzé Höimanaꞌuꞌö ãma tsi. Satanás ma tô tidzadawa nhipetse Eva ma te te tsadawa dzamarĩ da Höimanaꞌuꞌö upana. Adão Eva me ma tiwatsété dzahuré Höimanaꞌuꞌö dzada. Adão watsété wa, te tihöiba robdzépada duré dadö.—Tsoré na Gênesis 3:1-6, 19.

Ãne, Satanás ma tô ãma tsãnaꞌrata dahöimanadzé poꞌreꞌõ na Höimanaꞌuꞌö nhimiromhuri dzada Danhipaiꞌwa na. Satanás ne, aré uburé Tiꞌai ãma ma tô tsiwi wẽꞌõ Jeová Rotiꞌwa na. Ãne na hã, Satanás ma tô tsirotiꞌwa ‘ĩtsadzeiꞌõꞌwa norĩ’ ãma.—Tsõré na João 14:30, 31; 1 João 5:19.

Höimanaꞌuꞌö nhimipodo hã ĩwẽ tsi. Taha wa, aꞌuwẽ norĩ duré dawatsuꞌuꞌwa norĩ te te tsadawa dzamarĩ waihuꞌu petse dzaꞌra di aré watsété dzaꞌra ãna. (Tiago 1:17) Wa te pitsutu waihuꞌu petse dzaꞌra di ĩwẽ hã niwamhã ĩwatsédé hã. Wanhimipitsutu dzaꞌra te dza watsuꞌu Höimanaꞌuꞌö wa te tsawi dzaꞌra dzô.—Tsõré na Tiago 1:13-15; 1 João 5:3, 4.

Jeová te te ꞌre tsaꞌréi mono aꞌö ta hã dahöimanadzé poꞌreꞌõ tinhimiromhuri dzada Rotiꞌwa na. E marĩ da. Te te höiꞌré da niꞌwa te te daꞌãma ĩroti waihuꞌu õ na rowẽ na ĩtsimipawaptom ãna. (Marcos 7:9; Êxodo 1:13, 14) Bötöꞌahö na ãma morĩ nherẽ taha parimhã, niꞌwa dama ĩpire te te uprotsi waihuꞌu õ di datsiꞌwapé hã, dadzahi hã, duré dahödzé hã, Bíblia te te nharĩdzéb dzarina Jeremias ãma 10:23: “Ĩma waihuꞌu petse di, Jeová, aibö ꞌre ĩmorĩ mono tei õ na, ĩmorĩdzé hã. Aibö ꞌre ĩmorĩ mono hã tsitsaprõni waihuꞌu õ di, timorĩdzém na hã”.—Tsõré na Romanos 9:17. 

Taha waꞌrãmi, Höimanaꞌuꞌö nhimiroti te pawapto te te tsima ĩwẽ dzaꞌra norĩ hã. (Isaías 48:17, 18) Romhutu na, Jeová te dza uprotsi aihĩni dama ĩpire norĩ hã. Te te ĩpitsutu dzaꞌra norĩ tsi Höimanaꞌuꞌö Rotiꞌwa na te dza ꞌre höimana dzaꞌra Tiꞌai ãma. — Hebreus 8:10, 11.—Tsõré na Apocalipse 11:15.

ꞌMadöꞌö ĩropodo E marĩ wa, te robdzépata dzaꞌra ni.

Satanás te tinha niꞌwa te te ĩromhuri õ na hã Jeová ma ĩtsawi dzarina. E wa te höiꞌré waihuꞌu petse dzaꞌra di Satanás ĩtsadawa nhipetse na. Ĩhe! Höimanaꞌuꞌö ꞌre tsimipari mono ré hã, wa dza watsima pitsutu dzaꞌra ni: Höimanaꞌuꞌö Nhimiꞌmadö niwamhã aibö nhimiꞌmadö. Wa dza wanhimipitsudu hã höiꞌré dzaꞌra ni wahöimanadzém na.—Tsõré na Apocalipse 12:10; Tiago 4:8.

Wa dza pitsutu dzaꞌra ni Höimanaꞌuꞌö Rotiꞌwa na wa te watsiwi waihuꞌu wamhã ãma dawada ĩꞌuptabi Bíblia na, duré taha dzarina ꞌre wahöimana dzaꞌra mono wamhã. (João 4:22-24)Wa dza watsiwi wẽꞌõ ni Satanás rotiꞌwa na dame wahöimana dzaꞌra õ na política ꞌre niwamhã datsiꞌwapéi ꞌremhã, Jesus dame ĩhöimana õ ne.—Tsõré na João 6:14, 15; 18:36.

Satanás te te dama ꞌre ropé dawatsédé hã. Dawatsédé hã wa te watsiwi wẽꞌõ wamhã, ãté watsiwaihu norĩ duré niꞌwam norĩ te dza waꞌãma tito dzaꞌra duré te dza wadzada tihöimana dzaꞌra. (1 Pedro 4:3, 4) Ãne wamhã, marĩ wa te ĩpitsutu dzaꞌra da tsi. E wa dza ꞌre aiꞌabaꞌré ni Höimanaꞌuꞌö dzawiꞌwa norĩ me. E wa dza wapari petse dzaꞌra ni ĩtsimiroti wama rowẽ dzaꞌra da. Ãne wa te ꞌre ꞌmanharĩ dzaꞌra mono wamhã, wa dza höiꞌré dzaꞌra ni Satanás ĩtsadawa nhipetse na te te nharĩ wamhã niꞌwa ꞌre ĩhöimana mono õ na Höimanaꞌuꞌö nhimiroti dzarina ropire wamhã.—Tsõré na 1 Coríntios 6:9, 10; 15:33.

Höimanaꞌuꞌö ma dadzawi petse wa, te dza tô uprotsi dawatsédé hã duré robdzépada. Te te ĩhöiꞌré dzaꞌra norĩ hã ãma ĩtsimidzadze dzaꞌra, te dza ꞌre höimana uꞌötsi dzaꞌra mono Tiꞌai ãma.—Tsõré na 1 João 2:17.