You Know?
For Bible time, which things de happen for city gates?
CITY gates no be just place wey you go pass enter city. Because many people de pass city gates, plenty different-different things de happen for there everyday. E pass 50 times wey Bible mention city gates, and e still talk about the things wey happen for there.
People de gather for city gates. For Hebrew language, the word wey them de use for “gate” no only mean the door wey dey front of city. E still carry the idea of area wey them build near the place wey them de pass enter the city. For some places, big open space wey plenty people fit gather dey near the gates inside the city.—Neh. 8:1.
Market people de sell their market near city gates. Some gates for Jerusalem, like the Fish Gate and the Sheep Gate, fit don get their name from the things wey them de sell near the gates.—Zeph. 1:10; John 5:2.
City gates na place where people de gather everyday to do different-different things
People de buy and sell things for city gates and de go there for other things. Both Abraham and Boaz make important agreement for front of people wey be their witness for city gates. (Gen. 23:10-15, 17, 18; Ruth 4:1, 10) People wey travel come the city fit sleep for the open space wey near the city gate if nobody invite them to come stay for their house. (Judg. 19:15-21) People still de go the city gates to hear latest news.—2 Sam. 18:24, 25.
Judges de settle matter near the city gates. Them de do this one for front of people wey gather to hear wetin happen and wetin them go decide. (Deut. 21:18-20) As them de judge matter for public, this one de help the judges make them no de do partial. After the judges don make decision, the people no de waste time do wetin the judges talk. (Deut. 25:2) For city gates, the people wey de judge suppose judge for way wey correct for God eye and help other people to de do the correct thing and behave well.—Deut. 16:18-20; Job 29:7, 11-17.
For the city gates, men wey de worship Jehovah well de encourage Israel people to trust Jehovah. Prophets and other people de go city gates go talk to people because them know say people de gather for there. (1 Ki. 22:10; Jer. 17:19, 20) For example, Jehu tell all the people for the city gate say Jehovah don punish the house of Ahab as E be don talk. (2 Ki. 10:8-10) King Hezekiah gather the chiefs of im army for one city gate to encourage them to trust say Jehovah go help them.—2 Chron. 32:6-8.
Bible talk say “correct sense” de shout and raise im voice loud “for the domot of the city gates.” (Prov. 1:20, 21) For Israel people time, na for city gates men wey de serve Jehovah well de give correct advice and judge well. Today, we de see the correct sense wey Jehovah get for Bible, and im servants for everywhere de help people learn better sense from Bible.
