Malachi 2:1-17
2 “And now, O priests, this commandment na for una.
2 If una no gree listen and no gree put-am for heart to honor my name,” na so Jehovah of armies talk, “I go bring the curse ontop una, and I go turn una blessings to curses. Yes, I don turn the blessings to curses, because una no de put-am for heart.”
3 “See! I go spoil* the seed wey una plant because of una, and I go scatter shit for una face, the shit of the animals wey una sacrifice for una festivals; and them go carry una comot go drop for there.*
4 Then una go know say I don give una this commandment so that my agreement with Leʹvi fit continue,” na so Jehovah of armies talk.
5 “The agreement wey I make with-am na the one wey de give life and peace, the one wey I give-am so that e go fit get fear.* E fear me, yes, e really respect my name.
6 The law* of truth dey im mouth, and no wicked thing dey im lips. The way e do things with me make peace dey and im way straight, and e make many people turn comot from sin.
7 Because the knowledge of God suppose dey the lips of person wey be priest,* and people suppose de ask about the law* from im mouth, because na im be the messenger of Jehovah of armies.
8 “But una don turn comot from the way. Una don make plenty people fall comot from the things wey concern the law.* Una don spoil the agreement wey I get with Leʹvi,” na so Jehovah of armies talk.
9 “So I go make all the people hate una and de see una as nothing, because una no follow my ways but una do partial for the way una de follow the law.”
10 “No be one papa all of us get? No be one God create us? So why we de treat each other for bad way, de make the agreement of our papa-papa them no dey holy?
11 Judah don show say e no dey faithful, and them don do serious bad thing for Israel and for Jerusalem; because Judah don spoil Jehovah holiness,* wey E love, and e don take the daughter of lie-lie god as wife.
12 Jehovah go cut anybody wey de do this kind thing comot from the tent of Jacob, no matter who the person be,* even though say e bring gift offering to Jehovah of armies.”
13 “And e get another* thing wey una de do, wey de make people de cover the altar of Jehovah with tears and cry-cry and complain, sotey e no de put mind for una gift offering again, or de use better eye look anything from una hand again.
14 And una talk say, ‘Wetin be the reason?’ Na because Jehovah don be witness between you and the wife wey you marry when you dey young, wey you no dey faithful to, even though say na your partner and your wife according to agreement.*
15 But e get person wey no do-am, because e still get the spirit wey remain. And wetin that person de find? The children* of God. So make una de watch una spirit,* and no treat the wife wey you marry when you dey young for bad way.
16 Because I hate* divorce,” na so Jehovah the God of Israel talk, “and the person wey don use wicked things cover everywhere for im cloth,”* na so Jehovah of armies talk. “And make una de watch una spirit,* and make una no ever treat each other for bad way.
17 “Una don make Jehovah tire with the things wey una de talk. But una talk say, ‘How we don make-am tire?’ Na when una de talk say, ‘Everybody wey de do bad thing dey good for Jehovah eye, and e really like the person,’ or na when una de talk say, ‘Where the God wey de judge well?’”
Footnotes
^ Or “I go talk against.”
^ This one na, the place where them de troway the shit from the animals wey them use do sacrifice.
^ Or “respect; big honor.”
^ Or “teaching.”
^ Or “Because the lips of person wey be priest suppose protect the knowledge of God.”
^ Or “teaching.”
^ Or e fit be, “because of the things wey una de teach.”
^ Or e fit be, “holy place.”
^ For Hebrew na, “who dey awake and who de answer.”
^ For Hebrew na, “second.”
^ Or “your wife wey you marry according to law.”
^ For Hebrew na, “seed.”
^ This one na, the way person de think and behave.
^ For Hebrew na, “e hate.”
^ Or “wey de put hand for wicked things.”
^ This one na, the way person de think and behave.
