Ezekiel 21:1-32
21 Jehovah talk to me again say:
2 “Son of man, turn your face look Jerusalem, and announce the bad thing wey go happen to the holy place them, and talk the bad thing wey go happen to the land of Israel for future.
3 Tell the land of Israel say, ‘This na wetin Jehovah talk: “See, I dey against you, I go bring my sword come out from im cover, and kill both righteous person and wicked person wey dey inside you.
4 As e be say I go kill righteous person and wicked person wey dey inside you, I go draw my sword come out from im cover, and I go destroy all flesh,* from south go reach north.
5 All the people go know say me myself, Jehovah, don draw my sword come out from im cover, and e no go go back again.”’
6 “And you, son of man, make sound wey show say you de feel pain as you de shake for their front, yes, make sound wey show say you* really dey sad.
7 And if them ask you say, ‘Why you de make sound wey show say you de feel pain?’ you go tell them say, ‘Na because of one report.’ Because e go surely come, and everybody heart go weak because of fear, and every hand no go get power to move again, and every spirit go weak, and water* go de drop from every knee. See! E go surely come and e go happen,’ na so Jehovah the Lord Wey High Pass talk.”
8 Jehovah talk to me again say:
9 “Son of man, talk wetin go happen for future say, ‘This na wetin Jehovah talk: “Talk say, ‘One sword dey! One sword dey wey them don sharp, and e de shine.
10 Them sharp-am so that e go kill plenty; and them shine-am so that e go shine like thunder light.’”’”
“We no suppose de happy?”
“‘As e* de reject every tree, na so e go reject the king rod wey my own son get?
11 “‘Them don give-am to person make e shine-am and use-am kill people. Them don sharp this sword and shine-am, so that them go put-am for the hand of the person wey de kill people.
12 “‘Son of man, make you shout and cry well-well, because e don come attack my people; e go attack all the chiefs for Israel. The sword go kill them together with my people. So make you hit your lap to show say you dey sad.
13 Because them don check, and wetin go happen if the sword reject the king rod? E* no go dey again,’ na so Jehovah the Lord Wey High Pass talk.
14 “And you, son of man, talk wetin go happen for future. Clap your hands and talk ‘Sword!’ three times. Na sword wey them use kill people, the sword wey kill plenty people wey surround them.
15 Their heart go melt because of fear, and plenty people go die for their city gates; I go use sword kill them. True-true, e de shine like thunder light and them shine-am to use-am kill!
16 Sword, make you cut well-well go right side! Wave go left! Go anywhere wey them direct your teeth go!
17 I go still clap my hands and bring judgment, then my vex go come down. Me myself, Jehovah don talk-am.”
18 And Jehovah talk to me again say:
19 “As for you, son of man, put mark for two roads wey the sword of the king of Babylon go pass come. The two roads go start from the same land, and make you put signpost* for where the road divide enter the two cities.
20 Make you mark one road wey the sword go pass come attack Rabʹbah wey be Amʹmon people city, and mark the other road wey e go pass go attack Jerusalem wey get strong protection, wey dey Judah.
21 Because the king of Babylon stop for where the road divide, so that e go use demon power know wetin people no know. E de shake the arrows. E de ask im idols* for direction; e de check the liver.
22 Wetin e use demon power know wey dey im right hand show say make them go Jerusalem to arrange big-big woods wey them de use break wall, to give command say make them kill, to shout war shout, to arrange big-big woods wey them go use break the gates, to gather plenty sand to form hill to attack-am, to build wall to attack-am.
23 But the people* wey swear and make different-different promise to them, go think say wetin e use demon power know na lie-lie. But e de remember the bad thing wey them do, and e go catch them.
24 “So this na wetin Jehovah the Lord Wey High Pass talk: ‘Una don make them remember una sin as una expose the bad things wey una de do and una make una sins show clear for the things wey una do. Now wey them don remember una, them go carry una comot by force.’*
25 “O, you wey be wicked chief for Israel, wey them wound well-well, your day don come, the time for your final punishment don reach.
26 This na wetin Jehovah the Lord Wey High Pass talk: ‘Comot the special headtie, and comot the crown. This one no go continue to dey as e dey. Carry person wey dey low go up, and bring the person wey dey high come down.
27 I go turn-am to wetin don spoil, wetin don spoil, wetin don spoil. And e no go be any person own until the person wey get the right according to law come, and I go give-am to-am.’
28 “And you, son of man, talk wetin go happen for future and talk say, ‘This na wetin Jehovah the Lord Wey High Pass talk about Amʹmon people and about their insults.’ Talk say, ‘One sword dey! One sword dey wey them don draw come out to use-am kill; them don shine-am to use-am finish people, and make e de shine like thunder light.
29 Even with the lie-lie visions and the lie-lie things wey them use demon power know about you, them go pack your people ontop the people wey them kill,* the wicked men wey their day don come, wey the time of their final punishment don reach.
30 Put the sword back inside im cover. I go judge you for the place wey them create you, for the land wey you come from.
31 I go pour my vex ontop you. I go blow the fire of my serious vex ontop you, and I go put you for the hand of wicked men, the men wey really sabi destroy people.
32 You go become wetin fire go burn; them go troway your own blood for the land, and them no go remember you again, because me myself, Jehovah, don talk-am.’”
Footnotes
^ Or “people.”
^ For Hebrew na, “your hips.”
^ This one na, as them piss because of fear.
^ This one na, Jehovah sword.
^ Or “The king rod.”
^ For Hebrew na, “hand.”
^ For Hebrew na, “the teraphim.” Check the part, Meaning of Words, Teraphim.
^ This one na, people wey de live for Jerusalem.
^ For Hebrew na, “go hold una for hand.”
^ For Hebrew na, “the neck of people wey them don kill.”
