Nlelo Yesu ori ene oYerusalemu, aYuda anceene yaahimwaattamela. AYuda akina yaaphavela wiixuttihiwa ni Yesu, masi akina yaaphavela omweehererya paahi. Mmosa aasuwela Nlamulo, aahimukoha Yesu wira: “Mwixuttihi, kìreke-ni wira kiphwanyé ekumi yohimala?”​—Luka 10:25.

Yesu aahisuwela ele mulopwana ole uupuwela awe. Maana aaphavela wira Yesu aakhule mwa enamuna yaarowa waaveeha aYuda. Yesu aahoona wira mulopwana ole, khahiyo aaphavela osuwela ele aakoha awe. Tivonto, Yesu aahimwaakhula mwa enamuna yoonihenrye ele yaari vamurimani va mulopwana ole.

Yesu aahimukoha wira: “Mulivuruni mwa ikano mulempwe-ni-mo? Nyuwo munsoma-mo sai?” Okhala wira mulopwana ole aanisuwela Nlamulo na Muluku, aahaakhula moovarihana ni nlamulo. Aaromonle masu a Otumererya 6:5 ni Onamukuttho 19:18, oriki: “Mwaphenteke Apwiya Muluku anyu, ni murim’anyu wothene n’iroho anyu yothene n’ikuru sanyu sothene n’usuwela wanyu wothene” ni “Mumphenteke mukhw’inyu ntoko sinìphentanyu”. (Luka 10:26, 27) Niireke aahaakhula saana?

Yesu aahimuleela wira: “Muhakhula orattene. Mwireke siso: munophwanya ekumi”. Niireke mwaha ole waamalenle vaavale? Nnaari. Okhala wira aaphavela wiihimya okhala naxariya ni wooniherya wira moonelo awe waari wooloka ni aanaathokorerya saana atthu akina. Nto aahimukoha-tho Yesu wira: “Masí, mukhw’aka t’ani?” (Luka 10:28, 29) Nikoho nle naari nookhweya masi noolavilavi. Moota xeeni?

AYuda yaakupali wira ‘akhw’aya’ yaari paahi ale yaatthara soolema sa aYuda, nave vaakhala wira Onamukuttho 19:18 aanikhaliherya moonelo owo. Mwekeekhai, aYuda yaanihimya wira waari “mwikho” weetta ni atthu yahaakhanle aYuda. (Miteko 10:28) Tivonto woonasa wene, mulopwana ole ni awiixutti akina a Yesu yiixoona okhala anaxariya okhala wira yaanaathokorerya saana aYuda akhwaaya. Masi awo khiyaathokorerya saana ale yahaakhanle aYuda; maana khiyaawoona okhala ‘akhw’aya’.

Yesu aarowa omukhaliherya sai mulopwana ole ni aYuda akina moohaaveeha? Yesu aahilavula nlikanyiho nna: “Ahikhala mulopwana mmosá akhumme oYerusalemu, akhuruwelaka oYerikhó. Mphironi ahimorela mmatatani mw’alavilavi. Awo yahimwakha sothene sarinawe, yahimmanakasa, khumuhiya ahanlene vakhani okhwa. Okathi uwo, ahivira ephiro eyo namukuttho mmosá: ahimona mutth’ule, khumuxerema. Siso-tho, muLevi mmosá ahiphiya nipuro nenlo, ahimona mutth’ule, khumuxerema-tho. Nto mulopwana mmosá òSamariya, arowa ekwah’awe, ahiphiya vavale, khummorela ikharari”.—Luka 10:30-33.

Mulopwana ole Yesu aamuleela awe nlikanyiho, aahisuwela wira anamukuttho anceene ni aLevi yaawo yaarumeela otemplo, yaakhala oYerikho. Atthikaka otemplo, awo yaanivira ephiro ele yaarina ikiloomo 23. Ephiro ele yaari yowoopiha mwaha wa anatarawu ni anasusukhi. Niireke vaakhanle wira namukuttho ole ni muLevi amphwannye muYuda mukhwaawe oxankale ene, khaarowa omukhaliherya? Nlikanyiho nle, Yesu onihimya wira khiyaamukhalihenrye. Masi mutthu aamukhalihenrye aari muSamariya, mulopwana aakhuma nloko naanyokhiwa ni aYuda.​—Yohani 8:48.

MuSamariya ole aamukhalihenrye sai muYuda? Yesu aahivikaniha oriki: “Ahimwattamela, ahihela makhwatt’awe makhura n’ivinyu, khutthukwa. Numalá, ahimukuxa vaburuni vawe, ahimuroiha vatthokoni vamakaya aletto, khumukhapelela. Vaxiyaya, ahikumiha musurukhu wa paratha, ahinvaha mwanene etthoko, khumuhimerya wira: ‘Mmukhapelele mulopwan’ola: wahiphiyerye musurukh’ula, miyo kinrwá wolivakani kahokolowaka’”.​—Luka 10:34, 35.

 Nuumala okontari nlikanyiho nna, Mwiixuttihi Yesu, aahimukoha mulopwana ole wira: “W’atthu ale ararú, t’ani ommonanyu okhala mukhw’awe ole akumanne n’alavilavi?” Mulopwana ole khoona oreerela ohimya wira “muSamariya”, nto aakhunle wira: “T’ule ammorenle ikharari”. Vano Yesu aahihimya etthu yaaphavela awe omwiixuttiha mulopwana ole oriki: “Muroweke! Ni nyuwo mwireke siso”.​—Luka 10:36, 37.

Tthiri ele yaari enamuna yowiixuttiha yoovara murima! Vaamukhweya Yesu omwiirela mulopwana ole wira ale ahikhanle aYuda nave anamwaattamanani awe. Niireke mulopwana ole ni aYuda akina yanwiriyana, yaamweemererya? Woonasa wene nnaari. Masi mwaha woolavula nlikanyiho nle ni olavula itthu saakhaliherya ale yaawiriyana woona etthu ene, waahimukhaliherya waakhula nikoho noowi: “Masí, mukhw’aka t’ani?” Mutthu oonihenrye okhala namwaattamanani eekeekhai, tuule amphentale ni omureerela murima ntoko Soolempwa sinihimya aya.