Niireke Muhaana Ororomela Etiini Voohimya sa Ekhotto?

Alberto aari toropa mwa iyaakha sowiiraka 10. Owo onnuupuwela iiraka: “Muhooleli a ekerexa aka aahinireeliha, ohimyaka so: ‘Muluku okhale ni nyuwosa’. Masi miyo kaanuupuwela so: ‘Miyo kinrowa owiiwa atthu, masi Biibiliya onihimya wira: “Muhimwivé mutthu”’”!

Rui aari nakhotto eetta ni pakiti okathi wa Ekhotto Yanenli ya Olumwenku wotheene. Mukwaha mmosa, owo aahimukoha muhooleli a ekerexa awe wira: “Nyuwo munnoorwa mpakitini-mu nto munaavekelela atoropa wira yaxintte. Masi awanani ahu khanipaka etthu emosaru?” Muhooleli a etiini ole, aakhunle wira Apwiya anikhaliherya mwa inamuna sootikiniha.

Akhala wira waakhuliwa iwo khonoohakalalihani, khahiyo muri mekhinyu.

EXEENI BIIBILIYA ONIIXUTTIHA AWE?

Yesu aahimmye wira yooruma emosa yuulupalexa ya Muluku ori ‘omphenta mukhw’ihu ntoko sinìphentahu’. (Marko 12:31) Niireke Yesu aahihela mukano voohimya sa waaphenta anamwaattamanani ihu ottharihelaka mapuro anikhala aya wala elapo aya? Nnaari. Owo ahaahimeerya awiixutti awe wira: “Atthu othene anosuwela wira mwá awixutti aka, mwaphentana mukina ni mukw’awe”. (Yohani 13:34, 35) Ophentana nno waarowa okhala etthu yootepa wooneya ntoko ethoonyeryo. Awosa yaarowa oleva okumi aya, mwaha woophentana, ohiya wiivanana.

MaKristau oopacerya yaaniiwelela masu a Yesu. The Encyclopedia of Religion enihimya so: “Ahooleli oopacerya a ekerexa, omuhela muhina Tertuliano ni Orígenes, yaanihimya wira maKristau yaanikhoottiheriwa omwiiva mutthu. Eyo yaahiwiiriha maKristau okhootta okhala nakhotto ooRoma.”

ANAMOONA A YEHOVA ARI SAI MMWAHA OLA?

Okhala wira Anamoona a Yehova woonasa wene aniphwanyaneya khula elapo, awo annikhala eriyari ya maloko a atthu aniwana-wana. Hata vaari siiso, awo annipaka khula etthu eniwerya aya wira avikanihe wooniherya niphento.

Mwa ntakiheryo, okathi wa owana-wana wa atthu a nloko Hutu ni Tutsi oRuanda mwaakha wa 1994, Anamoona a Yehova yaahivikaniha ohiirela mpantta owana-wana iwo. Anamoona a nloko nimosa yahaakhapelela Anamoona a nloko nikina, imaara sinci mpakha ohaleela wiiviwa. Vaavo Anamoona anli axilopwana a nloko Hutu yaavinthe aya anna a nloko Tutsi yaavariwe, mamiliisia Interahamwe a nloko Hutu yaahihimya wira: “Nyuwosa muhaana wiiviwa mwaha woowi muhaakhaliheryasa aTutsi wira atthyawe”. Mooriipiha murima, Anamoona ale Hutu oowanli yaahiiviwa.​—Yohani 15:13.

Munoona sai? Niireke mweettelo wa Anamoona a Yehova onnivarihana ni moolumo a Yesu voohimya sa ophenta moophavela mureerelo wa akina?

[Elatarato epaaxina 5]

[Masu a elatarato]

Based on U.S. Army photo

[Eponto yuulupale ya epaaxina 5]

Niireke ahooleli a itiini anniixuttiha ophenta wekeekhai wa eKristau?