NIIREKE yookhala etthu enivara anyu enilikana ni muteko waavariwa ni maprofeta a khalai? Biibiliya Tradução do Novo Mundo a 2013 nipuro nni “Glossário de Termos Bíblicos”, ninnitthokiherya nuulumo noowi profeta, niiraka: “Mutthu onirumeeliwa ni Muluku wira ohimye soolakela sa Muluku. Maprofeta yaanirumeela ntoko anamuhupi a Muluku, khahiyo yaalaleya itthu sa muhoolo paahi, masi yaanilaleya-tho sowiixuttiha, malamulo ni maphukelo a Yehova”. Nnaamwi muhilaleyaka itthu sa muhoolo, ntoko profeta, nyuwo-tho munnilavula muhupi wa Muluku, vaavo munilaleya anyu ihapari siri mBiibiliyani.​—Math. 24:14.

Tthiri eparakha yuulupale waalaleerya akina voohimya sa Muluku ahu Yehova, ni owiixuttiha yoolakela awe! Nave ninnivara muteko owo vamosa ni ‘malaikha anivava osulusulu’. (Wis. 14:6) Ikwaha sikina hiyo pooti oyeleela eparakha ela erina ahu mwaha wa mixankiho. Mixankiho xeeni sinniphwanya? Mixankiho iyo sinihela muhina okhulumuwa, wala wiixoona ohikhala a faita. Nave maprofeta oororomeleya a khalai saanaaphwanya mixankiho iyo, masi khiyaatthikela ottuli. Yehova aanaakhaliherya ovikaniha ovara muteko aya. Muthokorerye matakiheryo kamosa-kamosa, ni nwehe moota munrowa anyu waatakihaka.

Okathi mukina hiyo pooti okhulumuwa mwaha wa miteko sinivara ahu khula nihiku, nto nihinoona oreerela orowa olaleerya. Ekeekhai wira hiyo ninniphavela ophumurya; hata Yesu ni arummwa awe yaaniphumurya. (Mar. 6:31) Masi nkahaya mmuupuwele Ezekiyeli oryeene oBabilonia ovaraka muteko wowaaleela aIsarayeli yaakuxiwe oYerusalemu ntoko ipottha. Ekwaha emosa, Muluku aahimuleela Ezekiyeli wira okuxe nluku nimosa, olepe-vo muttetthe wa oYerusalemu. Nto Ezekiyeli aahaana wooniherya muttetthe owo orukureriwe ene ni anakhotto mahiku 390, moono woothiyana, ni mahiku 40, moono woolopwana. Yehova aahimuleela wira: “Numalá, miyo kinimotthukani ni mikhoyi: siso nyuwo khamuniwerya orukunuwela epantte ekina mpakha omaliha mahiku òhawa wanyu”. (Ezek. 4:1-8) Tthiri masu ala yaahaavara murima aIsarayeli  yaatthukiwe. Ezekiyeli aaheemererya otthukiwa siiso mahiku otheene, mwaakha ntero. Nto Ezekiyeli aarowa ovara sai muteko owo?

Ezekiyeli aanisuwelexa nthowa naya aarummwe awe oprofeta. Okathi Muluku aamurumme awe Ezekiyeli, aahimuleela wira: “Awo [aIsarayeli] . . . , yaiwelelá walá yahìwelele anosuwela wira eriyari aya òkhala profeta”. (Ezek. 2:5) Owo aanuupuwelela nthowa naya aarummwale awe. Aahiivahererya othoonyerya opwetexiwa wa Yerusalemu. Owo aahooniherya wira aari profeta eekeekhai. Namuhupi mmosa aatthyanwe oYerusalemu aahirwa okumana ni Ezekiyeli khumuhimeerya wira: “Muttetthe wokuxiwa”. Nto aIsarayeli yaahikupali wira ole aari profeta aya eekeekhai.​—Ezek. 33:21, 33.

Olelo-va, ninnaaleela atthu voohimya sa opwetexiwa wa olumwenku ola wootakhala wa Satana. Nnaamwi nikhulumuwaka, ninnirumeela ikuru sahu wira nilaleye Nuulumo na Muluku, otthikela waaxukurya atthu anaalaleerya ahu, ni opaka soosoma sa Biibiliya. Vaavo iprofesia sinlavula sa omala wa makhalelo ala a itthu, nto ninnihakalala osuwela wira na “atthu anirumeeliwa ni Muluku wira ahimye soolakela sawe”.

Ninniimananiha vanceene nikhaliheriwaka ni munepa wa Yehova; masi ikwaha sikina pooti okhulumuwa mwaha woowi atthu akina khaneemererya muhupi onilaleya ahu. Nto ti vootthuneya wuupuwelelaka ntakiheryo na profeta Yeremiya. Owo aaniruwaniwa ni oveehiwa mwaha wowaalaleerya aIsarayeli masu a Muluku. Nto mwaha wa mixankiho iyo owo aahihimya wira: “Nkiniwupuwela-tho Apwiya: nkinlaleya-tho masu ni nsina naya”. Yeremiya aari mutthu ntoko hiyo. Hata vari siiso, owo aahivikaniha olaleya masu a Muluku. Mwaha wa xeeni? Profeta aahincererya oriki: “Nto okathi yowo, mmurimani mwaka masu anyu yanikhala ntoko moro woviha, wanivarela mpakha mmakhuvani mwaka. Kaniphavela ottipiha n’ikuru saka sothene, kihinawerya”.​—Yer. 20:7-9.

Moolikanasa, akhala wira nnookhulumuwa mwaha wa atthu ahiniphavela owiriyana ihapari sa Muluku sinilaleya ahu, nihaana wuupuwelelaka otthuneya waya ihapari sinilaleya ahu. Ihapari iyo pooti okhala ntoko ‘moro woviha onivarela mmakhuvani’. Omusoma Biibiliya khula nihiku, onookhaliherya mooro owo ovikaniha ovarela.

MaKristau makina annixanka okathi onaakhela aya muteko yoowo wanipacerya ahinisuwela aya ovara oratteene. Profeta Hoseya woonasa wene aahikhalana muxankiho owo. Yehova aamurumme wira: “Murowé, mwamuthele muthiyana namararuwa: muyareliwe an’inyu anlikana ni yowo”. (Hos. 1:2) Nkahaya muupuwele vaakhanle wira muniphavela othela, masi Muluku oolakiheryani wira muhaana omuthela namararuwa. Hoseya aaheemererya etthu eyo. Aahimuthela Gomeri, nto aahimuyara mwaana. Ohoolo waya, Gomeri aahimuyara mwaana mwaamuthiyana ni mwaamulopwana. Woonasa wene, anamwane ala anli ookiserya, yaari ooraruuwa. Yehova aahimuleela Hoseya wira mwaarawe owo aarowa omakelaka ‘watthara aximwaset’awe’. Nwehe wira Biibiliya oniira ‘aximwaset’awe’, ooniheryaka wira yaari anceene. Nuumala-vo, Gomeri ammuhokolowelaka Hoseya. Nyuwo mwaari Hoseya, niireke mwamweemererya omwaakhela mwaarinyu owo? Nto eyo ti etthu Yehova aamurumme awe Hoseya opaka. Nave-tho Hoseya aahiliva musurukhu wira omukuxe.​—Hos. 2:7; 3:1-5.

Woonasa wene Hoseya aaniikoha wira itthu sotheene iya saarummwa awe saarowa okumiherya exeeni? Masi moororomeleya aahivara sotheene saalakiheriwe awe, nto eyo enninikhaliherya oweha moota Yehova oonale awe owereya okathi aIsarayeli yaamuhiyale aya. Nto aIsarayeli akina oororomeleya yaahimuhokolowela Muluku.

Olelo-va, Yehova khonimuleela mutthu ‘omuthela muthiyana namararuwa’. Masi hata vari siiso, nnoowerya wiixutta etthu ni moota Hoseya aakhulenle awe ele Muluku yaamurumme awe. Etthu yoopacerya tiila: weemererya ni murima wotheene muteko ovahiwe ahu wa olaleerya ihapari  sooreera sa Omwene, mapuro oowaatta atthu, ni empa ni empa. (Mit. 20:20) Woonasa wene, inamuna sikina sa olaleerya khasinoosivelani. Atthu anceene animusoma Biibiliya ni Anamoona a Yehova annilavula wira annisiveliwa vanceene omusoma Biibiliya, masi khanikhala-khala aweryaka olaleerya empa ni empa. Muhoolo mwaya, anceene a yaawo annivara muteko yoowo yoona aya wira khiyaawerya ovara. Niireke yookhala etthu eniixutta ahu?

Ninniwerya wiixutta etthu ekina mwaha wa Hoseya weemererya ovara itthu Muluku aamurumme awe. Owo anwerya okhootta wiirela mpantta ele Muluku aaphavela awe wira opake. Khuuvo mutthu aarowa osuwela etthu yaamwiiranenle Hoseya, vahaakhanle wira oolepa itthu sene. Hiyo-tho pooti oniiraneela etthu emosaru. Ikwaha sikina ninnikhalana eparakha ya omulaleerya mutthu mmosa, nto khuuvo mukina onisuwela eyo. Etthu eyo yaahiiraneya ni Ana, yoowo onisoma exikola secundaria, wEstados Unidos. Prusoore awe aahaaruma anaxikola olepa mwaha onaasivela, ni yeererye waakupaliha anaxikola otheene a eturma ele. Ana anwerya othanla ohilavula etthu ya mBiibiliyani. Masi owo aanoona wira ele yaari eparakha aavahiwe awe ni Muluku. Osuwelaka etthu yaarowa okhumelela, owo aahinvekela Yehova, nto aahiphavela orumeela okathi ola wira ovahe onamoona. Nto aahilepa mwaha oni: “Niireke Itthu Siroothatuwa”?

Nuumala olavula mwaha awe, mwali mmosa onikupali wira itthu siroothatuwa, aahimpaka makoho manceene. Ana aahitthokiherya oratteene ele yaakupali awe. Prusoore awe Ana aahisiveliwa vanceene nto aahimutthuvela mwaha wa otthokiherya oratteene mwaha ole. Okhuma vaavo, Ana onnivaanela ni mwali ole itthu sinceene voohimya sa yowiixuttiha ya othatuwa. Nto mwaha wowaakhulela “eparakha” Yehova yanvahale awe, Ana onihimya so: “Vano kinnilaleerya ihapari sooreera kihoovaka etthu”.

Nnaamwi nihikhanle maprofeta, otthara ntakiheryo na maprofeta ntoko Ezekiyeli, Yeremiya ni Hoseya, onoonikhaliherya okhumela saana muteko oninvarela ahu Yehova olelo-va. Okathi onimulompa anyu Muluku vatthokoni, musomeke soohimmwa kamosa-kamosa sa maprofeta a khalai, ni muupuweleleke moota munrowa anyu otthara ntakiheryo naya.