MUTTHU ooloka ti yoole ori ooreera murima, oovaha ni oothokorerya. Otheene ahu, nimphavela wira nooniweke okhala atthu ooloka. Masi olelo-va ti vooxankiha okhala mutthu ooloka. Nthowa nimosa, okhala wira atthu anceene ‘annivirikanya sorera sothene’. (2 Tim. 3:3) Maana khaniiwelela malamulo a Muluku, siiso itthu ‘sorera annihana sotakhala’ ni ‘sotakhala annihana sorera’. (Yes. 5:20) Nave-tho, vannixankiha okhala mutthu ooloka mwaha wa itthu sinikhumelenle khalai ni mwaha wookhala atthu oohimalela. Nto pooti wira nnoona ntoko Anne,  * yoowo ovirinhe iyaakha sinceene omurumeelaka Yehova. Owo onihimya so: “Vannikixankiha okupali wira kinookhala mutthu ooloka”.

Ti voohakalaliha osuwela wira otheene ahu nnoowerya okhala atthu ooloka! Oloka onikumiheriwa ni munepa wootteela wa Muluku, nto munepa owo ti wootepa owerya ni khiivo etthu ekhanle oowooceeliha. Nrowe nthokorerye ele ontaphulela aya oloka ni moota nikhanle ahu oowunnuuherya mukhalelo owo.

Moovarihana ni Biibiliya, oloka ontaphulela oreera murima ni osyaka owiirela sootakhala atthu akina. Mutthu ooloka onniimananiha opaka itthu sooloka khula okathi. Nto mutthu owo onnimananiha opaka ele oniwerya awe wira aakhaliherye atthu akina.

Mwaha wookhala atthu oohimalela, khanniwerya wooniherya oloka mwa enamuna yoomalela. Hata niwiirelaka itthu sooloka amusi ihu ni apatthani, khanniwerya wooniherya oloka moomalela. Maana Biibiliya onihimya wira: “Mulaponi khavo onìra sa xariya mahiku othene, ahiweryaka ovonya”. (Mus. 7:20) Nave-tho, murummwa Paulo oohimya wira: “Kosuwela wira mwa miyo, eyo p’iyo, mmakhaleloni mwaka motakhala, khivo etthu yorera”. (aRom. 7:18) Nto vannooneya wira naaphavelaka okhala atthu ooloka nihaana onvekela Yehova wira onikhaliherye.

Yehova Muluku paahi tokhanle oohimya ele eri yooloka ni yohiloka. Maana Biibiliya onihimya wira: “Apwiya! Nyuwo munnikìrela sorera n’urera wanyu murima: mukixuttihe molumo anyu.” (Esal. 119:68) Vano nrowe nthokorerye mikhalelo miili sa oloka Yehova orina awe siniromoliwa Esalimo ela.

Yehova tooloka. Oloka oniirela mpantta omutthu wa Yehova. Nkahaya muthokorerye ele yiiraneyale nuumala Yehova olavula ni Moise. Yehova aahimmye wira: “Miyo kinowirelani sorera sothene”. Tthiri okathi Yehova aavira awe ni ovuwa ohoolo wa Moise, aahihimya wira: “Miyo k’Apwiya, Apwiya Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osùlu aya mpakha oholo onkelelahu; miyo kinnileva sottheka saya n’uhìwelela waya n’itampi saya. Masi nkinliyal’etthu: kinniwerya ohukhumu sotakhala s’atthu”. (Okhum. 33:19; 34:6,  7) Nto eyo enninikhaliherya osuwela wira Yehova tooloka, maana itthu sotheene Yehova opanke awe sinnooniherya mukhalelo owo. Tivonto, hata Yesu aari mutthu ooloka, owo aahimmye so: “Khavo òrera murima, ahikhanle Muluku pahi”.​—Luka 18:19.

Miteko sotheene sa Yehova ti sooloka. Itthu sotheene Yehova opattunxe awe sinnooniherya wira tooloka. Esalimo 145:9 enihimya wira: “Apwiya annarerela murima atthu othene: annamorela ikharari atthu othene apattunxaya”. Nto okhala wira Yehova tooloka ni khorina nthalu, owo ohaavaha  okumi apinaatamu ni sotheene sinitthuneya wira akhaleke akumi. (Mit. 14:17) Nave-tho, ninnoona oloka wa Yehova vaavo onnilevelela awe. Nto nasaalimo aalempe so: “Apwiya! Nyuwo mòrera murima ni òlevelela, òsareya othunku w’ale othene anovekelani”. (Esal. 86:5) Tivonto, nihaana okupali wira “Apwiya t’annivaha ikuru n’uvuwa: khankhotta wareriha ale anettela exariya”.​—Esal. 84:12.

Yehova onipattunxe ailattanihaka yena, ti maana aya ninwerya ahu okhala ooloka ni opaka itthu sooreera. (Maph. 1:27) Hata vari siiso, wira nikhale atthu ooloka nihaana wiimananiha vanceene. Yehova onihimya wira: “Mwixutte wira sorera”. (Yes. 1:17) Nto ninrowa owerya sai wiixutta opaka sooreera? Nrowe nthokorerye inamuna tthaaru, nikhanle ahu oopaka eyo.

Yoopacerya, nihaana ovekela munepa wootteela. Owo onoowerya waakhaliherya maKristau okhala ooloka vamaithoni va Muluku. (aGal. 5:22) Tthiri munepa wootteela onoowerya onikhaliherya wiixutta ophenta itthu siri sooloka ni okhootta itthu soohiloka. (aRom. 12:9) Tivonto Biibiliya onihimya awe wira Yehova onoowerya ‘onlipiha wira netteleke sorera sothene’.​—2 aTes. 2: 16, 17.

Ya nenli, nihaana omusoma Biibiliya. Vaavo nimmusoma ahu Biibiliya, Yehova onniniixuttiha “itthu sa xariya ni soloka” ni onoonikhaliheryaka “ovara miteko sothene sorera”. (Mir. 2:9; 2 Tim. 3:17) Nto vaavo nimmusoma ahu Biibiliya ni wuupuwelela ele ninsoma ahu, ninnisarya murima ahu itthu sooloka voohimya sa Muluku. Nto okathi nintthuneya ahu wooniherya oloka, itthu iyo sinoonikhaliherya.​—Luka 6:45; aÉf. 5:9.

Ya neeraru, nihaana wiimananiha ‘otthara sorera’. (3 Yoh. 11) Tthiri, mBiibiliyani aakhala matakiheryo manceene nikhanle ahu ootthara. Nto ntakiheryo nuulupale ti na Yehova ni Yesu. Nave-tho nnoowerya wiixutta etthu ni matakiheryo oohiloka. Ntakiheryo nikina nooloka ti na Tabithá ni Baarnaba. (Mit 9:36; 11:22-24) Vakhala wira munimwiixutta ele Biibiliya onihimya awe sa atthu awo, munoottottela mureerelo ntakiheryo naya noolokexa. Nave okathi munisoma anyu mmananihe oweha itthu yaapaka aya wira yaakhaliherye akina. Nto muupuweleke itthu mukhanle anyu oopaka wira mwaakhaliherye amusi inyu, aahiiso anna mmulokoni. Nave-tho, mmananihe woona itthuvo aphwanye aya mwaha wookhala atthu ooloka. Tthiri mwiira siiso, munoophwanya mareeliho.

Olelo-va, aakhala atthu aniimananiha opaka itthu sooloka. Nkahaya nwuupuwele axitokweene a mmulokoni yaawo aniimananiha vanceene okhaliherya muloko ni ‘ophenta itthu sooreera’. Nave-tho, nkahaya nwuupuwele arokora oororomeleya, yaawo anooniherya ni moolumo ni miteko wira ‘annisuwela ovaha miruku sorera’. (Tito 1:8; 2:3) Murokora oniihaniwa Roslyn, onihimya so: “Mpatthani aka, onniimananiha vanceene wira aakhaliherye ni waalipiha  anna a mmulokoni. Owo onniweha muxankiho aya ni ikwaha sinceene onnaavaha itthu aahiiso onnaakhaliherya mwa inamuna soovirikana. Nto miyo, kinoona wira tthiri owo mutthu ooloka”.

Yehova onnaatumererya arumeyi awe ‘wettela sorera’. (Am. 5:14) Nto vakhala wira nnimweettelaka sooreera, itthu iyo sinoonikhaliherya ophenta itthu Yehova onihimya awe wira ti sooloka ni sinoonikhaliherya opaka itthu sooloka.

Wira nikhale ooloka, khinnitthuneya opaka itthu wira niivuwihe, aahiiso waavaha itthu sa musurukhu munceene. Nwehe nlikanyiho nla: Niireke vanooweryaneya mutthu ondesenyari, opintari edesenyo awe orumeela epinseeli emosa aahiiso piili paahi? Nnaari. Owo onnirumeela ipinseeli sinceene wira odesenyari ni opintari saana etthu eyo onipaka awe. Moolikanasa, vakhala wira ninnaakhaliherya atthu anceene ni itthu saamukhaani, iyo sinimooniherya wira na atthu ooloka.

Tivonto Biibiliya onnilopola awe wira nikhale atthu ‘òwìwelela’ ni “òlikanene” ovara miteko sooloka. (2 Tim. 2:21; Tito 3:1) Vakhala wira ninnaathokorerya akina nnasuwela itthu siniwiiraneela, nnimoona inamuna nikhanle ahu oowaakhaliherya atthu ni ‘itthu sorera, wira nakhomalihe wamini’. (aRom. 15:2) Eyo enihela muhina waavaha etthu nrina ahu. (Mir. 3:27) Nave hiyo pooti omulattula mutthu owo wira nalye hoothe aahiiso wira nimulipihe. Nto vakhala wira noosuwela wira ookhala oniwereiwa, pooti omulepela ewarakha, omuxukurya aahiiso omulikarela. Tthiri nnimoona inamuna nikhanle ahu oohimya moolumo ‘òrera, yawo anakhaliherya akhw’ihu, anaphwanyiha murerelo ale anniwa’.—aÉf. 4:29.

Okhala wira nimmutakiha Yehova, ninniimananiha owiirela itthu sooloka atthu otheene. Nave, khinnaathanla atthu. Enamuna emosa ya waathokorerya atthu ntoko Yehova oniira awe, ori waalaleerya ihapari sooreera sa Omwene atthu otheene. Ntoko Yesu onrumme awe, hiyo ninniwiirela itthu sooloka atthu otheene, hata ale anninyokha. (Luka 6:27) Tthiri okhala mutthu ooloka ni owiirela atthu akina itthu sooloka khahiyo vootthekeya, maana Biibiliya onihimya wira: “Khivo ekano envirikanya makhalelo ala òrera”. (aGal. 5:22, 23) Nto okathi ninwiirela ahu itthu sooloka atthu hata anilupatthaka, nnimwaakhaliherya atthu akina weemererya ekeekhai ni omukokhorela Yehova.​—1 Ped. 3:16, 17.

Miruku 14:14 onnooniherya wira “atthu òrera murima anotthuveliwa ni miteko saya”. Etthuvo xeeni anrowa aya ovahiwa atthu awo? Vaavo atthu anoona aya wira na atthu ooloka, vanimwaakhweelaka onithokorerya mwa enamuna yooloka. (Mir. 14:22) Hata atthu ahinithokoreryaka saana, nihaana ovikaniha owiirela itthu sooloka. Woonasa wene, awo anooturuka enamuna yaanithokorerya aya.​—aRom. 12:20.

Opaka itthu sooreera ni osyaka opaka itthu soonanara onniphwanyiha mareeliho. Anna anceene ni arokora anihimya wira ti etthu apanke aya. Muthokorerye yoowiraneya ya murokora oniihaniwa Nancy. Owo onihimya so: “Okathi kaari aka mwali, kaahikhalana mweettelo woohiloka, onamuttompe ni nkaarina nttittimiho. Nto vaavo kiixutta aka itthu Yehova onihimya awe wira ti sooloka ni wiiwelela seiyo, kaahipacerya ohakalala. Vano kihiixutta wiiphenta ni wiittittimiha”.

Nthowa nuulupale ninniiriha wunnuuherya mukhalelo owo wa oloka, okhala wira opaka eyo ennimuhakalaliha Yehova. Hata atthu anceene ahoonaka itthu sooloka nimpaka ahu, Yehova onnoona. Tthiri Yehova onnoona okathi wotheene nimpaka ahu ni wuupuwelela itthu sooloka. (aÉf. 6:7, 8) Nto Yehova onrowa onitthuvela sai? Biibiliya onihimya wira: “Mutthu a murettele onophwanya othunku w’ Apwiya”. (Mir. 12:2) Tivonto, nrowe nivikanihe wunnuuherya mukhalelo ola wa oloka. Maana Yehova onnileiherya wira ‘ononivaha ovuwa ni nttittimiho ni murettele’.​—aRom. 2:10.