1-2. Exeeni yiiraneyale Pentekoositi a 33 nuumala Kristu orwa?

YAARI Ettiminku voosiisu oYerusalemu. Nihiku nne naari na Pentekoositi a 33 nuumala Kristu orwa. Egrupu ya awiixutti 120 yaahithukumana empa emosa esaala ya osulu. (Mit. 1:13-15; 2:1) Mahiku vakhaani yaavinre, Yesu aahaaleela wira yaahaana okhala oYerusalemu, mwaha woowi yaarowa ovahiwa etthu ya vameekhaaya. (Mit. 1:4, 5) Exeeni yiiraneyale moottharelana?

² Biibiliya onihimya wira “nananoru, wahìwanyeya oruma okhumaka wirimu, walikana n’ipheyo yòpaka n’ikuru”. Oruma iwe waahisareya empa yotheene yaathukumaniwe. Moottharelana, “yahakhumelela ntoko malumi a moro” yaamorela vamuru va khula mwiixutti, nto otheene aya “yahisareya eroho [munepa] yowarya”. (Mit. 2:2-4) Mwa enamuna eyo, Yehova aahaavaha munepa awe wootteela atthu ale yaathukumanne. (Mit. 1:8) Atthu awo ti yaapacenrye othanliwa ni munepa wootteela * ni yaahivahiwa nlipelelo na olamulela wiirimu vamosa ni Yesu.

3. Exeeni yaakupaliha awiixutti yaathukumanne nihiku na Pentekoositi, wira yaahithanliwa ni munepa wootteela?

³ Tthiri vaakhanle wira nyuwo mwaahikhala esaala ele ya osulu yaathukumanne awiixutti, khimwaarowa oliyala nihiku nne. Vano, etthu yaakhala ntoko malumi a mooro annimorela vamuru vanyu munapacerya olavula mattaava oovirikana!  (Mit. 2:5-12) Tthiri khiivo etthu yaarowa owiirihani waanyiherya wira moothanliwa ni munepa wootteela. Masi niireke atthu otheene anithanliwa ni munepa wootteela mwa enamuna yootikiniha ni okathi omosaru? Nnaari. Ninsuwela sai eyo?

4. Niireke maKristau otheene a eseekulu yoopacerya yaathanliwe okathi omosaru? Mutthokiherye.

⁴ Mwaha ola, ninrowa othokorerya etthu eniiraneya vaavo mutthu onithanliwa awe. Khahiyo paahi egrupu ya maKristau 120 tathanliwe ni munepa wootteela okhuma Pentekoositi a 33 nuumala Kristu orwa. Maana muhoolo mwaya, atthu oowiiraka 3.000 yaahaakhela munepa wootteela. Atthu akina yaathanliwe nuumala opatisiwa. (Mit. 2:37, 38, 41) Masi iyaakha saattharelana, khahiyo wira maKristau otheene oothanliwa yaakhela munepa wootteela okathi yaapatisiwa aya. Mwa ntakiheryo, aSamariya yaathanliwe nuumala opatisiwa. (Mit. 8:14-17) Masi othanliwa wa Kornelio ni amusi awe wiiraneyale ahinatthi opatisiwa.​—Mit. 10:44-48.

5. Moovarihana ni 2 aKorinto 1:21, 22, eniiraneya exeeni vaavo mutthu onithanliwa awe ni munepa wootteela?

⁵ Vano nrowe niwehe etthu eniiraneya vaavo mutthu onithanliwa awe ni munepa wootteela. Atthu akina oothanliwa, vannaaxankiha weemererya wira Yehova ohaathanla. Nto awo anniikoha so: ‘Xeeni Muluku ohalaka okithanla?’ Masi atthu akina kharina muupuwelo owo. Moohicikha moonelo wa mutthu, murummwa Paulo aahihimya etthu eniwiiraneela atthu otheene anithanliwa, vaavo aahimmye awe wira: “Nyuwo muhamini ehapar’iyo: siso motthittiwa * murohoni ni nlepa na eroho yowarya, yeyo Muluku yanlaihenryawe. Eroho yeyo ti nemexeryo na sorera sinrowahu wakhela”. (aÉf. 1:13, 14) Tthiri orumeelaka munepa awe, Yehova onnaakupaliha maKristau awo wira aathanliwa. Eyo enooniherya wira munepa wootteela ori ntoko “nemexeryo [na itthu  sileiheriwe]” nnaakupaliha wira aakhalana nlipelelo na orowa okhalaka wiirimu ohiya valaponi.​—Mmusome 2 aKorinto 1:21, 22.

6. MuKristau oothanliwa ohaana opaka exeeni wira aakhele etthuvo awe?

⁶ Niireke vaavo muKristau onithanliwa awe, eyo entaphulela wira onoorowa tthiri wiirimu? Nnaari. Masi owo onnikupali wira oothanliwa wira akhaleke wiirimu. Hata vari siiso, owo ohaana wuupuwela yoolopola ela eni: “Tivó, axinn’aka, mutepeke olipiha wihaniwa wanyu n’uthanliwa wanyu: mwira siso, khamunira-tho sotakhala”. (2 Ped. 1:10) Nto nnaamwi muKristau othanliwe ene wira akhaleke wiirimu, owo onrowa waakhela paahi etthuvo eyo akhala wira onnivikaniha ororomeleya.​—aFil. 3:12-14; aHéb. 3:1; Wis. 2:10.

7. Mutthu onisuwela sai wira oothanliwa wira akhaleke wiirimu?

⁷ Mutthu onisuwela sai wira oothanliwa wira akhaleke wiirimu? Waakhuliwa wa nikoho nlo, ninniphwanya moolumo Paulo aalepenle awe aRoma, yaawo ‘yathanleliwe okhala atthu’ a Muluku oowaarya. Vano Paulo aahaaleela wira: “Tthiri, eroho yakhenlyanyu khinokhalihani-tho ipottha, walá khinoruhelani-tho wova: eroho yakhenlyanyu enokhalihani àna a Muluku. Tivó hiyo vankhuwelelahu wa Muluku, wira: ‘Abbá-Tithi!’ Eroho yeyo ennilavula mmurimani mwahu, enikupalihaka wira hiyo n’àna a Muluku”. (aRoma 1:7; 8:15, 16) Moohaanyiherya, orumeelaka munepa awe wootteela, Muluku onnaakupaliha ale oothanliwa wira anrowa okhalaka wiirimu.​—1 aTes. 2:12.

8. 1 Yohani 2:20, 27 onooniherya sai wira khivanitthuneya ale oothanliwa oleeliwa ni mutthu mukina wira aathanliwa?

⁸ Yehova onnaasuweliha mmuupuweloni ni vamurimani vaya atthu ale alattuliwe wira yakhaleke wiirimu. (Mmusome 1 Yohani 2:20, 27.) Tthiri ntoko maKristau makina, maKristau oothanliwa ahaana wiixuttihiwa ni Yehova orumeelaka muloko awe. Masi, khokhanle mutthu okhanle oowaaleela wira aathanliwa. Maana Yehova oorumeela ikuru sootepexa owerya olumwenku wotheene, eyo piiyo, munepa awe wootteela wira aakupalihe maKristau awo wira aathanliwa!

9. Okathi mutthu onithanliwa awe, etthu xeeni eniturukeya yeeyo enilavuliwa aÉfeso 1:18?

⁹ Olelo-va, arumeyi anceene a Yehova vannaavila wiiwexexa etthu eniiraneya vaavo Muluku onimuthanla awe mutthu wira akhaleke wiirimu. Mwaha wa xeeni? Mwaha woowi awo khathanliwe. Nave Muhiliyale wira Muluku aapattunxe apinaatamu wira akhaleke valaponi ohiya wiirimu. (Maph. 1:28; Esal. 37:29) Hata vari siiso, Yehova ohaathanla apinaatamu akina wira yakhaleke wiirimu. Nto vaavo Yehova onaathanla awe, owo onnituruka nlipelelo naya mwa enamuna anoonela aya ni anuupuwela aya. Nto muupuwelo aya wotheene oniwehexexa wiirimu.​—Mmusome aÉfeso 1:18.

10. Ontaphulela exeeni “oyariwa vasyá”? (Nwehe enoota.)

¹⁰ Vaavo maKristau anithanliwa aya ni munepa wootteela, awo ahaana “oyariwa vasyá”. * Nave, Yesu aahitthokiherya wira vannivila omutthokiherya mutthu ohithanliwe moota onoonela awe “oyariwa vasyá” aahiiso ‘oyariwa n’iroho’ wala munepa.​—Yoh. 3:3-8.

11. Mutthokiherye marukunuxo aniiraneya vaavo mutthu onithanliwa awe.

¹¹ Marukunuxo xeeni a muupuwelo anikhumelela vaavo muKristau onithanliwa awe?  Ohinatthi Yehova waathanla, maKristau awo annisiveliwa ni annivaha efaita nlipelelo na okhalaka mahiku otheene valaponi. Awo annilipelela vanceene okathi Yehova onrowa awe opaka elapo okhala eparayiisu ni omaliha otakhala wotheene okhanle. Woonasa wene, awo annuupuwela okathi yaarowa aya owaakhelaka amusi aya akhwiiye vaavo anrowa aya ohihimuxiwa. Masi, nuumala othanliwa, awo annipacerya wuupuwela mwa enamuna ekina. Mwaha wa xeeni? Khahiyo wira awo anuupuwela wira okhala mahiku otheene etthu yoohiloka. Nave khahiyo wira anturuka nlipelelo naya mwaha woowi aroophweeleya ohaawa aahiiso arootepa oxanka. Nave khahiyo anuupuwela wira okhala mahiku otheene valaponi ti voophweela. Ohiya-vo, orumeelaka munepa awe wootteela, Yehova onnituruka muupuwelo ni nlipelelo, nenno yaavaha aya efaita vanceene.

12. Moovarihana ni 1 Pedru 1:3, 4, ale oothanliwa anoonela sai nlipelelo naya?

¹² Mutthu othanliwe pooti opacerya wuupuwelaka wira khoniphwanela ovahiwa eparakha eyo ya vameekhaaya. Masi eyo khentaphulela wira onimwaanyiherya wira Yehova oomuthanla. Maana owo onnihakalala ni oxukhurela vanceene vaavo onsuwela awe wira ookhalana eparakha ya orowa okhalaka wiirimu.​—Mmusome 1 Pedru 1:3, 4.

13. Ale oothanliwa anoonela sai okumi aya valaponi?

¹³ Nto niireke eyo enitaphulela wira ale athanliwe amphavela okhwa? Murummwa Paulo onnaakhula nikoho nna. Olikanyihaka erutthu aya ntoko etenta, owo aahimmye so: “Vekekhai, nikhalaka mmuxaxani-mu, ninnìpulela, niweriwaka n’uhawa: tthiri khinatthuna ohiya erutthu ila, nto nintthuna owarihiwatho vamosá erutthu ya nanano, wira erutthu ila enipweteya ewarihiwe n’ikumi”. (2 aKor 5:4) MaKristau awo khaphweeleyale okhala valaponi nto anaphavela wira ahaana okhwa naanaanoru. Ohiya-vo, onnaasivela okhala akumi ni aniphavela wira khula nihiku amurumeeleke Yehova ni amusi aya vamosa ni apatthani aya. Moohicikha ele anipaka aya, okathi wotheene annuupuwela nlipelelo arina aya na muhoolo.​—1 aKor. 15:53; 2 Ped. 1:4; 1 Yoh. 3:2, 3; Wis. 20:6.

14. Itthu xeeni sinooniherya wira mutthu khothanliwe ni munepa wootteela?

¹⁴ Woonasa wene, nyuwo munniikoha akhala wira moothanliwa aahiiso nnaari. Akhala wira ti siiso, nkahaya muupuwele makoho ala ootthuneya: Kiireke onnikisivela vanceene opaka yootthuna ya Yehova? Niireke munoona wira munnitepa oluttuweliwa muteko woolaleerya? Niireke onnoosivelani vanceene omusoma Biibiliya ni wiixutta itthu “sotikiniha sa Muluku”? (1 aKor. 2:10) Munoona wira Yehova onnookhaliheryani vanceene muteko woolaleerya? Niireke munniphavela vanceene waakhaliherya atthu akina omusuwela Yehova? Niireke sookhala itthu sinceene munoona anyu wira Yehova ohookhaliheryani mookumini mwanyu? Akhala wira munaakhula “aayo” makoho awo, niireke eyo enitaphulela wira moothanliwa? Nnaari. Mwaha wa xeeni? Mwaha woowi arumeyi otheene a Yehova annikhalana mareeliho awo, akhale ale oothanliwa aahiiso nnaari. Nave orumeelaka munepa awe wootteela, Yehova onnaakhaliherya arumeyi awe opaka itthu iyo moohicikha nlipelelo arina aya. Tthiri, akhala wira munniikoha aahiiso munnaanyiherya akhala wira moothanliwa ni munepa wootteela, waanyiherya iwo onooniherya wira khamuthanliwe. Ale athanliwe ni Yehova khaniikoha nnakhala waanyiherya wira  aathanliwa aahiiso nnaari! Maana awo annisuwela oratteene!

15. Exeeni ennikupaliha wira khahiyo wira atthu otheene anivahiwa munepa wootteela anrowa wiirimu?

¹⁵ MBiibiliyani aakhala matakiheryo a alopwana ni athiyana oowaamini, yaawo yaavahiwe munepa wootteela. Tthiri arumeyi awo a Yehova khiyaarina nlipelelo na orowa okhalaka wiirimu. Mmosa a alopwana awo, aari Davidi, yoowo aavahiwe munepa wootteela. (1 Sam. 16:13) Munepa wootteela waahimukhaliherya wiiwexexa itthu sootikiniha sa Yehova ni aahuupuxeriwa olepa mipantta sikina sa Biibiliya. (Mar. 12:36) Hata vari siiso, murummwa Paulo ohimmye wira Davidi “khawenle wirimu”. (Mit. 2:34) Ntakiheryo nikina ti na Yohani Mbatiza yoowo ‘asarihiwe eroho [munepa] yowarya’. (Luka 1:13-16) Yesu aahimmye wira khuuvo mutthu aari muulupale onvikana Yohani, masi khaahimmye wira Yohani aarowa wiirela mpantta Omwene wa wiirimu. (Math. 11:10, 11) Tthiri orumeelaka munepa awe wootteela, Yehova aahaavaha arumeyi awe awo ikuru wira apakeke itthu sinceene ni sootikiniha. Masi hata vaari siiso, Yehova khaathanlale ni munepa awe wira yakhaleke wiirimu. Niireke eyo enitaphulela wira khiyaaroromeleyale vanceene wira athanliwe orowa wiirimu? Nnaari. Masi Yehova onrowa waahihimuxa wira akhaleke mahiku otheene Mparayiisu valaponi.​—Yoh. 5:28, 29; Mit. 24:15.

16. Arumeyi anceene a Yehova olelo-va, arina nlipelelo xeeni?

¹⁶ Arumeyi anceene a Yehova olelo-va, kharina nlipelelo na orowa okhalaka wiirimu. Ntoko Abrahamu, Sara, Davidi, Yohani Mbatiza ni arumeyi anceene alopwana ni athiyana aniromoliwa mBiibiliyani, anlipelela okhalaka valaponi alamuleliwaka ni Omwene wa Muluku.​—aHéb. 11:10.

17. Mwaha onittharelana, ninrowa waakhula makoho xeeni?

¹⁷ Olelo-va, aakhala arumeyi a Yehova oothanliwa, nto hiyo pooti okhalanaka makoho makina. (Wis. 12:17) Mwa ntakiheryo, ale oothanliwa yiithokoreryeke sai? Akhala wira mmulokoni mwanyu ookhala mutthu onipacerya okhuura ithoonyeryo sa Wuupuwelela, mmuthokoreryeke sai? Ankhi akhala wira nummuru na atthu anihimya wira aathanliwa nnootepa wuncerereya? Niireke muhaana oxanka? Makoho ala, ninrowa waakhula mwaha onittharelana.