Me ga sempre piasesto la naturesa. La nostra fameia la ghe piasea ndar a spasso nele floreste e laghi maraveiosi che ghen’era intorno dela nostra cità, Jyväskylä, nela Finlàndia Sentral. Anca de picoleto me piasea tanto le bèstie e struchea tuti i can e i gati che catea! Intanto che vegnea pi grando, me vegnea su la ràbia quando vedea le persone che le tratea mal le bèstie. Col tempo, go scominsià far parte de una organisassion che la tendea dei diriti dele bèstie e tanti lì i pensea come mi.

Noantri feino tante manifestassion par i diriti dele bèstie. Noantri deino foieti e marceino contra quei che i vendea robe de pele e i laboratòri che i fea speriense coi animai. Ghemo fin creà una nova organisassion par la protession dele bèstie. Anca èrino tanto fanàtichi in quel che feino e, par quela, tante volte gavemo bio problemi cole autorità. I me ga metesto in preson e i me ga piantà arquanti prosessi.

Mi no me preocupea sol cole bèstie, ma anca coi problemi che ghen’era nel mondo. Col tempo go scominsià a far parte de altre organisassion, che le lota contra la ingiustìssia e che le difende la naturesa. E questo l’era la roba pi importante par mi. E mi ndea in difesa dei diriti dei poareti, quei che i passea fame e quei che i sofria ingiustìssie.

Ma col tempo go visto che mi no podea mia cambiar el mondo. Anca quando queste organisassion le era bone de risolver i pìcoli problemi, quei grandi i deventea ancora pedo. L’era come se el demònio el influensesse el mondo e le persone no le badea gnente. E mi me sentia come se no podesse far gnente.

Mi me sentia disgustà e vedea che no podea far pi gnente. Alora mi go scominsià a pensar in Dio e nela Bìblia. Mi gavea belche studià una volta cole Testimònie de Geovà. Anca se con mi le era bona gente, mi no ero ancora pronto par cambiar la me maniera de viver. Ma adesso la situassion la era difarente.

Alora go ciapà nantra volta la Bìblia e go scominsià a léderla. Questo me ga consolà tanto. E go catà versìcoli nela Bìblia che i parlea de tratar ben le bèstie. Par esémpio, Proverbi 12:10 el dise che “el giusto el tende ben dele so bestiolete”. Anca go visto che Dio no’l ga la colpa dei problemi del mondo. Invesse, i problemi i deventa pedo parché le persone no le fà quel che Dio el vol. Me ga piasesto tanto de saver del amor e dela passiensa che Geovà el ga. — Salmo 103:8-14.

In quela època, go domandà che i me mandesse el libro Cossa che la Bìblia la pol Insegnarne?. Poco tempo dopo, un casal de Testimònie de Geovà i ze vegnesti casa mia e lori i volea insegnarme la Bìblia e mi go acetà. Anca go scominsià a ndar ale riunion nel Salon del Regno. Me ga piasesto suito de quel che imparea dela Bìblia.

La Bìblia la me ga giutà a far tanti cambiamenti. Me go fermà de bever massa e de fumar. Go cambià par meio la maniera de vestirme, la me maniera de parlar e anca la me atitùdine cole autorità. (Romani 13:1) E no go pi fato robe imorai.

El pi difìcile par mi l’è stà assar de apoiar queste organisassion che le lotea par i diriti dele bèstie e dele persone. Questo cambiamento no’l ga sucedesto de una ora par l’altra. Nel scomìnsio, mi pensea che ero drio tradir queste organisassion se mi no fesse pi parte de lore. Fin che go capio che el Regno de Dio l’è la ùnica speransa par i problemi del mondo. Go dessidio apoiar el Regno e giutar altre persone a imparar sora questo. — Mateo 6:33.

Vanti mi vedea le persone come due grupi: quei boni e quei rugni. E ero pronto par lotar contra quei che i era rugni. Ma, col aiuto dela Bìblia, no sento mia pi quel òdio par le persone. Invesse, fao sforso par dimostrar el vero amor par tuti. (Mateo 5:44) Una maniera de far questo l’è predicar le bone notìssie del Regno de Dio a tuti. Vedo che la predicassion la giuta le persone a gaver pace, felicità e vera speransa. E questo me assa contento.

Assar le robe ntele man de Geovà me dà pace. Son sicuro che lu, come Creador, no’l assarà che le bèstie e le persone le sìpia maltratade par sempre e gnanca no’l assarà che la nostra Tera la sìpia destruta. Invesse, par meso del Regno, Dio el va restaurar el pianeta. (Isaia 11:1-9) Resto tanto contento de saver queste verità e anca de giutar i altri a creder in queste verità. Ancoi, no penso pi che go de cambiar el mondo.