Vwo Rhe Ihwo ri Rom 4:1-25
4 Ọ vwọ dia ọtiọyena, erere vọ yen a sa tanẹ o te Ebraham rọ dia ọsẹ rẹ avwanre rode vwọrẹ ugboma na obọ?
2 Kerẹ udje, ọ da dianẹ e se Ebraham ọvwata fikirẹ iruo, kọyen o vwo oboresorọ rọ vwọ yonma, ẹkẹvuọvo ọ dia vwọ kẹ Ọghẹnẹ-ẹ.
3 Die yen isiesi ọfuanfon na tare? “Ebraham vwo esegbuyota kpahen Jihova,* e de kere phiyọ ọvwata.”
4 Vwọ kẹ ohwo ro ruiruo, ọ dia ẹse re muwan rọye-en ọyen e kere osa rọyen phiyọ-ọ, ukperẹ ọtiọyen, e kere phiyọ obo ra riosa rọyen.
5 Ẹkẹvuọvo, vwọ kẹ ohwo ro ruiruo-o, jẹ o vwo esegbuyota kpahen Ohwo ro se ọ ro muọghọ kẹ Ọghẹnẹ-ẹ ọvwata, ke kere esegbuyota rọyen phiyọ ophiọnphiọn.
6 Ọtiọyen Devid je ta ota kpahen omavwerhovwẹn ro rhe ohwo rẹ Ọghẹnẹ kere phiyọ ọvwata ababọ rẹ iruo:
7 Omavwerhovwẹn dia vwọ kẹ ihwo ra vwẹ irueru ri jurhi ẹyọnrọn rayen vwo ghovwo, re ji phoro* imwemwu rayen.
8 Omavwerhovwẹn dia vwọ kẹ ohwo ri Jihova* kere umwemwu ba obọ kakaka-a.
9 Ihwo re yanvwere ọvo yen che vwo omavwerhovwẹn nana, gbanẹ o ji che te ihwo re yanvwere-e obọ? Kidie avwanre tare nẹ: “E kere Ebraham phiyọ ọvwata fikirẹ esegbuyota rọyen.”
10 Ẹdia vọ yen ọ hepha ọke re vwo kere phiyọ ọvwata? Ọke rọ vwọ yanvwe nu gbanẹ ọke rọ je rhe yanvwe-e? Ọ dia ọke rọ vwọ yanvwe nu-u, ọke rọ je rhe yanvwe-e.
11 A da vwẹ oka vwọ kẹ, kọyen oyanvwe, kerẹ oseri* rẹ ophionphion rọyen womarẹ esegbuyota ro vwori ọke rọ je rhe yanvwe-e, ọ sa vwọ dia ọsẹ vwọ kẹ ihwo eje ri vwo esegbuyota ọke rẹ ayen je yanvwe-e, rere e vwo kere phiyọ ophionphion vwọ kẹ ayen;
12 ọ sa vwọ dia ọsẹ rẹ ihwo re yanvwere, ọ dia ihwo re yanvwere ọvo-o, ẹkẹvuọvo ji te ihwo re nabọ vwẹrokere udje rẹ esegbuyota rọyen ọke rọ je yanvwe-e.
13 Kidie ọ dia womarẹ urhi yen e vwo ve ive kẹ Ebraham yẹrẹ ọmọ* rọyen nẹ ọ riuku rẹ akpọ na-a, ẹkẹvuọvo fikirẹ ophiọnphiọn womarẹ esegbuyota.
14 Kidie ihwo re yọnrọn urhi na da dia iriuku, kọyen esegbuyota rhe fi emuọvo-o, ive na ki jẹ ofefe.
15 Vwọrẹ uyota, Urhi na ghwa ophu cha, ẹkẹvuọvo asan rẹ urhi hepha-a, a mrẹ urhiẹchọ vwọ-ọ.
16 Kọyensorọ ọ vwọ dia womarẹ esegbuyota, rere ọ sa vwọ dia ẹse re muwan rọye-en, ive na me je dia obo ri muẹro vwọ kẹ emọ* rọyen eje, ọ dia ihwo re yọnrọn Urhi na ọvo-o, ẹkẹvuọvo ji te ihwo re vwẹrokere esegbuyota rẹ Ebraham rọ dia ọsẹ rẹ avwanre eje.
17 (Kirobo re siro: “Me vwẹ owẹ ru ọsẹ rẹ ẹgborho buebun.”) Ọtiọyen ọ hepha vwẹ ẹro rẹ Ọghẹnẹ, ohwo ro vwo esegbuyota kpahen na, rọ rhọvwọn ihwo ri ghwuru, ji se erọnvwọn re herọ-ọ kerẹ erọnvwọn re herọ.
18 Dede nẹ ọ vrẹ obo ro se vwo iphiẹrophiyọ kpahen, jẹ womarẹ iphiẹrophiyọ, o vwo esegbuyota nẹ ọyen cha dia ọsẹ rẹ ẹgborho buebun kirobo ra tarọ jovwo: “Ọtiọyen emọ* wẹn cha dia.”
19 Dede nẹ esegbuyota rọyen doghori-i, jẹ o niro nẹ oma rọyen ghwure (kidie o te omarẹ ẹgbukpe 100 re), uwevwiẹ ri Sera ji ghwure.*
20 Ẹkẹvuọvo, fikirẹ ive rẹ Ọghẹnẹ, esegbuyota rọyen rhe phieghe-e; o de rhi vwo ẹgba womarẹ esegbuyota rọ vwọ vwẹ urinrin kẹ Ọghẹnẹ
21 ji vwo imuẹro kokoroko nẹ oborẹ Ọghẹnẹ veri na, O se ruo.
22 Ọtiọyena, “e de kere phiyọ ọvwata.”
23 Ẹkẹvuọvo, eta na “e de kere phiyọ” na, ọ dia fikirẹ ọyen ọvo e vwo si aye-en,
24 e ji sio fikirẹ avwanre re che kere phiyọ evwata, kidie avwanre vwo esegbuyota kpahen Ohwo rọ kpare Jesu Ọrovwavwanre vwo nẹ ughwu.
25 E hwe re fikirẹ imwemwu rẹ avwanre, a da rha kparọ vrẹn rere e se vwo se avwanre evwata.
Eta rehẹ obotọ na
^ Ni Eta re Vwomaphia.
^ Yẹrẹ “rhurhu.”
^ Ni Eta re Vwomaphia.
^ Yẹrẹ “imuẹro.”
^ Vwẹ Grik, “ubi.”
^ Vwẹ Grik, “ubi.”
^ Vwẹ Grik, “ubi.”
^ Yẹrẹ “ẹgan.”
