Luk 16:1-31
16 Ọyena vwọ wan nu, ọ da je ta kẹ idibo rọyen nẹ: “Ọshare ọvo rọ dia ọdafe vwo ọrọvwẹrote* ra tare nẹ o muẹ ekuakua rọyen muẹ ghwọrọ kuẹfia.
2 Ọtiọyena o de se, ọ da ta kẹ nẹ, ‘Ọnana die yen mi nyo kpahan owẹ na? Reyọ ọbe rẹ iyẹnrẹn rẹ iruo rẹ ẹroevwẹrote wẹn na rhe, kidie wọ rha cha sa vwẹrote uwevwin na ọfa-a.’
3 Ọrọvwẹrote na da ta kẹ oma rọyen nẹ, ‘Kẹ die yen mi che ru, rọ vwọ dianẹ onini mẹ guọnọ reyọ iruo rẹ ẹroevwote na mie vwe na? Me gan te asan ri mi de voro-o, oma je vo ovwẹ re me vwọ yare.
4 E! Me riẹn obo ri mi che ru, rere ọke re de si vwe nẹ ẹdia rẹ ọrọvwẹrote na, ihwo ki che dede uvwe ro iwevwin rayen.’
5 Ro vwo se ọvuọvo rẹ ihwo re riosa rẹ onini rọyen rhe, ọ da ta kẹ ọrẹsosuọ na nẹ, ‘Bro yen wọ riosa rẹ onini mẹ?’
6 Ọ da kpahen nẹ, ‘Ovwanvwọ* ujorin rẹ evwri rẹ oliv.’ Ọ da ta kẹ nẹ, ‘Reyọ ọbe ru wọ ghwobọphiyọ na rere wo chidia totọ wo brokpakpa si 50 phiyọ.’
7 Ọ da rha ta kẹ ọfa nẹ, ‘Wẹ na, bro yen wọ riosa rọyen?’ Ọ da tanẹ, ‘Ovwanvwọ ride* ujorin rẹ iwiti.’ Ọ da ta kẹ nẹ, ‘Reyọ ọbe ru wọ ghwobọphiyọ na rere wo si 80 phiyọ.’
8 Onini rọyen de jiri ọrọvwẹrote na dede nẹ ọyen ohwo ro jẹ ọvwata ẹdia, kidie o ru obo ri dje aghwanre* phia; kidie emọ rẹ eyeren* nana ghwanre vrẹ emọ rẹ urhukpẹ na vwẹ idjerhe rẹ ayen nene uvwiẹ robọ rayen yerẹn wan.
9 “Vwọba, me ta kẹ ovwan nẹ: Ovwan reyọ efe ri jẹ ọvwata ẹdia na vwo mu igbeyan kẹ oma rẹ ovwan, rere ọke rẹ ayen de shefia, kẹ ayen se rhiabọreyọ ovwan ro uwevwin ri bẹdẹ na.
10 Ohwo rọ fuevun vwẹ obo re hanvwere je fuevun vwẹ obo ri bunru, ohwo ro jẹ ọvwata ẹdia vwẹ obo re hanvwere je dia ọvwata vwẹ obo ri bunru-u.
11 Ọtiọyena ọ da dianẹ ovwan ji rhi dje oma rẹ ovwan phia kerẹ ihwo re fuevun kpahen efe ri jẹ ọvwata ẹdia-a na, kẹ ono yen che phi obo re dia uyota phiyọ ovwan obọ nẹ ovwan vwẹrote?
12 Ọ da dianẹ ovwan ji rhi dje oma rẹ ovwan phia kerẹ ihwo re fuevun vwọ kpahen orọnvwọn rẹ ohwo ọfa-a, kẹ ono yen cha kẹ ovwan orọnvwọn rọ dia ọ rẹ ovwan?
13 O vwo odibo vuọvo rọ sa dia ọviẹn vwọ kẹ inini ivẹ-ẹ, kidie o che vwo utuoma kpahen ọvo, o mi rhe vwo ẹguọnọ rẹ ọ ro chekọ, yẹrẹ o che churu mu ọvo, ọ me rha jẹ ọ ro chekọ fia. Ovwan cha sa dia eviẹn vwọ kẹ Ọghẹnẹ kugbe efe-e.”
14 Asaọkiephana ihwo ri Farisi ri vwo ẹguọnọ rẹ igho na, kerhọ rẹ eta nana eje, kẹ ayen reyọ vwọ jehwẹ.
15 Ọtiọyena ọ da ta kẹ ayen nẹ: “Ovwan yen se oma rẹ ovwan evwata vwẹ obaro rẹ ihwo, ẹkẹvuọvo Ọghẹnẹ riẹn ubiudu rẹ ovwan. Kidie oborẹ ihworakpọ niri nẹ a kpare kpenu, ọyen emu rẹ ẹgua vwẹ ẹro rẹ Ọghẹnẹ.
16 “Urhi na kugbe emraro na herọ re te ọke ri Jọn. Vwo nẹ ọke yena rhe, Uvie rẹ Ọghẹnẹ kọyen e ghwoghwo kerẹ iyẹnrẹn esiri, koka koka rẹ ihwo ke vwọtua vẹ oruru.
17 Vwọrẹ uyota, ọ lọhọre rẹ odjuvwu vẹ akpọ vwọ wanvrẹ vwọ vrẹ ọ rẹ ubiota ọvo vwevunrẹ Urhi na vwo je ruogba.
18 “Kohwo kohwo rọ sen aye rọyen rọ da rọvwọn ọfa gbe igberadja, kohwo kohwo rọ rọvwọn aye rẹ ọshare rọyen senre gbe igberadja.
19 “O vwo ọshare ọvo rọ dia ọdafe, ro kuẹ ewun rẹ amwa oyoyovwin kugbe ọ rẹ ikọlọ rẹ ipọpo phiyọ, rọ riakpọ kuoma kẹdi kẹdẹ.
20 Ẹkẹvuọvo o vwo ọshare ọvo re se Lazarọs rọ yara emu, re muẹ phiyọ anurhoro rọyen kọke kọke, oma rọyen vọnre vẹ era
21 o vwo owenvwe rọ vwọ re emu* ri she nẹ imẹjẹ rẹ ọdafe na cha. E, eranko dede bro cha, kẹ ayen rara era rọyen.
22 Ọke vwọ yan obaro, ọ rọ yara emu na de ghwu, emekashe na de muo kẹrẹ Ebraham.*
“Ọdafe na de ji ghwu, e de sho.
23 Vwevunrẹ Ushi* na ọ da kpare opharo rọyen kpenu vwevunrẹ ẹdia rẹ odjadja rọ hepha, ọ da mrẹ Ebraham vwẹ ugboko, Lazarọs mudia kẹrẹ.*
24 Ọtiọyena o de se, ọ da tanẹ, ‘Ọsẹ, Ebraham, gbe arodọnvwẹ kẹ vwẹ, wo ji Lazarọs rere o re duvwun ẹroro rẹ urhiobọ rọyen phiyọ ame, o suon phiyọ ẹrẹnvwe mẹ, kidie me hẹ evunrẹ odjadja vwẹ ogidi erhanre nana.’
25 Ẹkẹvuọvo Ebraham da tanẹ, ‘Ọmọ, karophiyọ nẹ wọ riavwerhen rẹ erọnvwọn iyoyovwin buebun ọke wọ vwọ hẹ akpọ, ẹkẹvuọvo vwọ kẹ Lazarọs, erọnvwọn ebrabra yen te re obọ, jẹ asaọkiephana, ọ mrẹ urovwoma vwẹ etinẹ, ẹkẹvuọvo wo rhiẹromrẹ odjadja.
26 Vwọ vrẹ enana eje, a tọn ọgọdọ rode ọvo phiyọ uvwre rẹ avwanre vẹ owẹ, rere ihwo re guọnọ nẹ obonẹ bru we rhe vwo jẹ sa wan, ihwo je cha sa wanvrẹ nẹ oboyin bru avwanre rhe-e.’
27 Ọ da tanẹ, ‘Ọ da dia ọtiọyen, me rẹ wẹ, ọsẹ, gbe jo kpo uwevwin rẹ ọsẹ mẹ,
28 kidie mi vwo iniọvo eshare iyorin, rere o se vwo soseri ro fiotọ kẹ ayen, ayen vwo jẹ asan rẹ odjadja nana ẹcha.’
29 Ẹkẹvuọvo Ebraham da tanẹ: ‘Ayen vwo Mosis kugbe emraro na; e jẹ ayen kerhọ rẹ enana.’
30 Ọ da tanẹ, ‘Ẹjo, ọsẹ, Ebraham, ẹkẹvuọvo ọ da dianẹ ohwo ro ghwure bru ayen ra, ayen che kurhẹriẹ.’
31 Ẹkẹvuọvo ọ da ta kẹ nẹ, ‘Ọ da dianẹ ayen kerhọ ri Mosis kugbe emraro na-a, ayen ji che se wene ẹwẹn siẹrẹ ohwo de vrẹn nẹ ughwu rhe-e.’”
Eta rehẹ obotọ na
^ Yẹrẹ “ohwo rọ vwẹrote uwevwin rọyen.”
^ Yẹrẹ “ovwanvwọ rẹ ibati.” Ibati ọvo vẹ Ilita 22 (igalọni 5.81) abavo.
^ Yẹrẹ “ovwanvwọ rẹ ikọ.” Ikọ ọvo vẹ Ilita 220 abavo. Ni Eta re Vwomaphia.
^ Yẹrẹ “ọhọ.”
^ Yẹrẹ “oge.” Ni Eta re Vwomaphia.
^ Vwẹ Grik, “erọnvwọn.”
^ Vwẹ Grik, “muo phiyọ agada rẹ Ebraham.”
^ Yẹrẹ “Hades,” kọyen, ushi re shi ihwo phiyọ. Ni Eta re Vwomaphia.
^ Vwẹ Grik, “Lazarọs hẹ agada rọyen.”
