Вәһий 20:1—15
20 Униңдин кейин мән асмандин қолида һаңниң ачқучи вә йоған зәнҗир бар бир пәриштиниң чүшүватқанлиғини көрдүм.
2 У әҗдиһани, йәни Иблис вә Шәйтан болғучи қедимий иланни тутуп, уни 1000 жилға кишәнлиди.
3 Хәлиқләрни әнди йолдин аздурмаслиғи үчүн, у әҗдиһани һаңға ташлап, уни қамап, һаңниң үстигә мөһүр басти. 1000 жил өткәндин кейин у қисқа вақитқа азатлиниши керәк.
4 Андин тәхтләрни вә униңда олтарғанларни көрдүм. Уларға сотлаш һоқуқи берилгән еди. Әйса вә Худа тоғрисида гувалиқ қилип, шундақла жиртқуч һайванға вә униң тәсвиригә ибадәт қилмай вә пешаниси билән қолиға бәлгү қобул қилмиғанлиғи үчүн, палта билән чепилғанларниң җанлирини көрдүм. Улар тирилип, Мәсиһ билән 1000 жил падишалиқ қилди.
5 (Өлгәнләрниң қалғанлири 1000 жил түгимигичә тирилмиди.) Бу — биринчи тирилиш.
6 Биринчи тирилиштә иштрак қилғанлар бәхитлик һәм муқәддәстур. Иккинчи өлүм уларға һөкүмранлиқ қилалмайду, әксичә улар Худаниң вә Мәсиһниң роһанийлири болуп, Мәсиһ билән 1000 жил падишалиқ қилиду.
7 1000 жил түгигәндин кейин, Шәйтан зиндандин азат қилиниду.
8 У йәрниң төрт булуңидики хәлиқләрни, Йәҗүҗ билән Мәҗүҗни аздуруп, уларни бирликтә җәңгә жиғиду. Уларниң сани деңиз қумидәк.
9 Улар пүткүл йәр йүзигә йейилип, муқәддәсләрниң қараргаһини вә әзиз шәһәрни қоршиди. Амма асмандин от чүшүп, уларни жутувәтти.
10 Хәлиқләрни йолдин аздурған Иблис болса, жиртқуч һайван билән сахта пәйғәмбәр көйүватқан от-гуңгутлуқ көлгә ташланди. Улар у йәрдә әбәттин-әбәт кечә-күндүз азап чекиду.
11 Кейин мән йоған ақ тәхтни вә униңда Олтарғучини көрдүм. Униң үзидин йәр билән асман қечивататти, лекин уларға җай тепилмиди.
12 Шундақла мән тәхт алдида турған улуқ вә әрзимәс өлгәнләрни көрдүм. Шу чағда түртәкләр ечилип, һаят түртиги дегән йәнә бир түртәкму ечилди. Өлгәнләр түртәкләрдә йезилған бойичә, қилған ишлириға яриша, сотланған еди.
13 Деңиз өзидики өлгәнләрни вә өлүм һәм қәбир өзидики өлгәнләрни қайтурди. Һәрбир киши ишлириға қарап сотланған еди.
14 Өлүм вә қәбир от көлигә ташланди. От көли иккинчи өлүмни билдүриду.
15 Исми һаят түртигигә йезилмиған һәрқандақ киши от көлигә ташланди.
