Сиз қорққан чағда немә қилисиз? ~ Бәлким, апиңиз яки дадиңиздин берип, ярдәм сорайсиз. Лекин сизгә ярдәм берәләйдиған йәнә бир Шәхс бар. У һәммидинму күчлүк. Униң ким екәнлигини биләмсиз? ~ Тоғра, У — Йәһва Худа. Келиң, Муқәддәс китаптики Давут исимлиқ бир жигит тоғрилиқ оқайли. Йәһва Худа униңға дайим ярдәм беридиғанлиғини билип, у һеч нәрсидин қорқмиған.

Ата-аниси Давутни кичигидин Йәһвани яхши көрүшкә үгәткән. Бу Давутқа һәтта қорқунучлуқ вәзийәтләрдиму қорқмаслиққа ярдәм бәргән. У Йәһва Худа униң Дости болуп, униңға ярдәм беридиғанлиғини билгән. Бир күни Давут қой беқиватқанда, йоған шир келип, бир қойни елип қечипту. Давутниң немә қилғанлиғини биләмсиз? У ширниң кәйнидин қоғлап, гәрчә қолида қурал болмисиму, уни өлтүрди! Кейинки қетим қойларға ейиқ һуҗум қилғанда, Давут униму өлтүрди! Қандақ ойлайсиз, Давутқа ким ярдәм бәрди? ~ Әлвәттә, Йәһва Худа.

Давут әҗайип батурлуқ көрсәткән йәнә бир вәзийәт болған. Исраил хәлқи филистийәликләр дегән адәмләргә қарши уруш қилған. Филистийәлик әскәрләрниң бири наһайити егиз, йоған адәм еди! Униң исми Голият болған. У Исраил хәлқини вә Йәһва Худани заңлиқ қилатти. Голият Исраил әскәрлирини өзи билән уруш қилишқа чақирди. Лекин уларниң һәммиси Голият билән уруш қилишқа қорқатти. Давут буни аңлиғанда, Голиятқа: «Мән сениң билән урушимән! Йәһва Худа маңа ярдәм берип, сени йеңивалимән!»— деди. Сизчә, Давут батур болғанму? ~ Һә, у наһайити батур болған. Андин кейин немә болғанлиғини билишни халамсиз?

Давут салғисини (бурунқи таш етиш қурали) вә бәш силиқ ташни елип, Голиятқа қарши чиқти. Голият Давутниң қанчилиқ яш болғанлиғини көрүп, уни заңлиқ қилди. Лекин Давут униңға: «Сән маңа қилич билән қарши чиқсаң, мән саңа Йәһваниң исми билән қарши чиқимән!»— деди. Андин кейин у салғисиға таш салди вә Голиятқа қарап жүгрәп, ташни униңға қаритип атти. Таш дәл униң пешанисигә тәгди! Бу ғайәт йоған адәм өлүп, йәргә жиқилди. Буни  көргән филистийәликләр қорқуп, қечип кәтти. Давут шунчилик яш болуп, қандақларчә бу йоған адәмни йеңивалди? ~ Униңға Йәһва ярдәм бәрди. Чүнки Йәһва бу йоған адәмгә қариғанда күчлүгирәк!

Давутниң мисалидин қандақ савақ алалайсиз? ~ Йәһва һәммидин күчлүктур! Шуниң билән, У сизниң Достуңиздур. Бирәр нәрсидин қорққан чағда, Йәһваниң сизгә җасарәтлик болушқа ярдәм беридиғанлиғини унтумаң!