МОИСЕЙЛЭН законэзъя, адями кылзэ сётэ ке, отын номыр уродэз ӧй вал. Но, Иисус музъем вылын улыку, адямиос, верам кылзылы мед оскозы шуыса, дышизы котькуд верам кылзэс кадь, оскытон кылъёс вераса, юнматыны. Иисус кык пол курлаз сыӵе юнме верам оскытон кылъёсты. Со дышетӥз: «Тӥляд кылды „озьы, озьы“, „ӧвӧл, ӧвӧл“ гинэ мед луоз» (Матф. 5:33—37; 23:16—22).

«Выль Сӥзёнлэн теологической кыллюкамез» верамъя, Талмуд юрттэ милемлы адӟыны, макем дышемын вал еврейёс котькуд верам кылзэс кадь, оскытон кылъёс вераса, юнматыны. Отын пыр-поч верамын, кудъёссэ сётэм кылъёсты одно ик быдэсъяно, нош кудъёссэ быдэстытэк но яралоз (Theological Dictionary of the New Testament).

Сыӵе шонертэм сямез Иисус гинэ ӧз курла. Кылсярысь, иудей историк Иосиф Флавий но гожтӥз одӥг сектае ветлӥсь адямиос сярысь, кудъёсыз озьы ик оскытон кылъёсты веранэз курлазы. Иосиф Флавий верамъя, со сектае ветлӥсьёс малпало вал, адями оскытон кылъёс вера ке, со пӧяськемлэсь но уродгес луэ шуыса. Соос малпамъя, кыӵе ке адямилы, солы мед оскозы шуыса, оскытон кылъёс верано луэ ке, соку со адями — пӧяськись. Нош апокрифической книгаын, кудӥз Сирах пилэн Иисуслэн Визьлыкез шуыса тодмо луэ, верамын: «Ӵем оскытон кылъёс верась адями законлы пумит улонэн тыр луоз» (Сирах 23:11, Синодальной берыктэм). Озьыен, Иисус Христос курла вал, куке кулэтэм дыръя оскытон кылъёс верало. Ми котьку шонерзэ гинэ вераськомы ке, верам кылъёсмылы мед оскозы шуыса, оскытон кылъёс верано уз луы.