1, 2. Малы, аслыд улон сюрес бырйыкуд, кулэ Инмарлэсь визь-кенешъёссэ санэ поныны? (Учке статья кутсконысь суредэз.)

 ТОН егит ке, кыӵе гинэ визь-кенешъёс ӧд кыл ни, дыр, азьпал улонэд пумысен. Дышетӥсьёсыд но мукет адямиос тынэсьтыд мылкыддэ ӝуто, вылды, вылӥ образование басьтыны но трос уждунэн умой уж шедьтыны. Нош Иегова чылкак мукет визь-кенешъёс сётэ. Веранэз ӧвӧл, солэн потэ, тон школаын умой мед дышетскод шуыса, малы ке шуоно со юрттоз тыныд азьланяз улон понна коньдон поттыны (Кол. 3:23). Озьы ик, со вала, егит дыр — со сыӵе вакыт шуыса, куке кулэ луись ужпумъёс кутоно, кудъёсыз быдэс улонэд вылын шӧдӥськозы. Соин ик Инмар возетъёс сётӥз, кудъёссэ санэ поныса тон быгатысалыд та дуннелэн берпум нуналъёсаз сое шумпоттыса улыны (Матф. 24:14).

 ² Эн вунэты, Иегова ваньзэ тодэ шуыса. Со тодэ, мар милемыз азьланяз возьма но ку та дуннелы пум вуоз (Ис. 46:10; Матф. 24:3, 36). Со сяна, со милемыз но умой тодэ: мар милемыз шумпоттэ, нош мар ӝоже уськытэ. Соин ик кинлэн ке сётэм визь-кенешез визьмо кадь потэ ке но, со Инмарлэн Кылызлы пумит луэ ке, сыӵе визь-кенешез визьмо шуыны уз луы (Мад. 19:21).

3, 4. Кызьы Адамлэн но Евалэн Шайтанлэсь кылзӥськыса кутэм ужпумзы соослэн но нылпиоссылэн улонзы вылын шӧдӥськиз?

³ Нырысетӥ визь-кенеш, кудӥз адямиослы курадӟон вайиз, Едем садын сётэмын вал. Со визь-кенешез сётӥз Шайтан, вылтӥяськись пӧяськись. Со оскытӥз Еваез, со но солэн картэз шудогес луозы шуыса, соос асьсэос, Инмартэк, ужпумъёс кутӥзы ке (Ул.-выл. 3:1—6). Но Шайтан ачиз сярысь гинэ малпаськиз. Солэн потэ вал, Адам, Ева но соослэн вань нылпиоссы, Иеговалы йыбыртъям интые, солы мед йыбыртъялозы но солэсь мед кылзӥськозы шуыса. Нош Шайтан соос понна мар ке кариз-а? Ваньзэ, марзы соослэн вал: семья, чебер садын улон инты, тырбыдэс мугор но пырак дауръёс ӵоже улыны луонлык — соослы сётӥз Иегова.

⁴ Жаляса верано луэ, Адам но Ева Инмарлэсь ӧз кылзӥське но сотэк улыны ужпум кутӥзы. Кызьы тодӥськомы, кутэм ужпумзы туж урод бервылъёсы вуттӥз. Ишкалтэм сяська выллем, соос пумен шуязы но кулӥзы. Сьӧлык соослэн нылпиоссылы но курадӟонъёс вайиз (Рим. 5:12). Озьы ке но тросэзлэн адямиослэн Инмарлэсь кылзӥськыса улэмзы уг поты, соослэн ас тодэмзыя улэмзы потэ (Еф. 2:1—3). Сыӵе адямиослэн улонзы яркыт возьматэ, «Кузё-Инмарлы пумитъяськыны визьлык» ӧвӧл шуыса (Мад. 21:30).

5. Мае тодэ вал Инмар адямиос пумысен но быдэсмиз-а солэн малпамез?

⁵ Озьы ке но Иегова тодэ вал, куд-ог адямиослэн, озьы ик егит пиослэн но нылъёслэн, со сярысь тодэмзы но солы ужамзы-тыршемзы потоз шуыса (Пс. 102:17, 18; 109:3). Макем со дунъя сыӵе адямиосты! Тон но астэ соос пӧлы пыртӥськод-а? Пыртӥськод ке, соку, веранэз ӧвӧл, тон шумпотӥськод ӟеч кузьымъёслы, кудъёсыз тынэсьтыд улондэ шудо каро. (Лыдӟе Псалтирез 102:2, 3, 5; Мад. 10:22.) Кызьы ми адӟомы, со кузьымъёс пӧлын Инмар доры матэ кариськыны юрттӥсь тодон-валан, умой эшъёс, Инмарлы ужан-тыршонын пуктэм ужпумъёс но зэмос эрик.

6. Малы тыршыны кулэ Иегова доры матэгес кариськыны? Кызьы Иегова милемлы юрттэ со удысын?

⁶ Пудо-животъёслэн Кылдытӥсь сярысь тодон-валан басьтыны кулэяськонзы ӧвӧл, нош милям вань (Матф. 4:4). Ми Инмарен сётэм визь-кенешъёсты санэ басьтӥмы ке но соос понна тау каримы ке, визьнод, визьлык  люкаломы но шудо луомы. Иисус вераз: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:28). Инмар милемлы аслэсьтыз Кылзэ сётӥз, но «оскиськымон, визьмо ляльчиез» пыр со милемлы пӧртэм публикациос сётэ, кудъёсыз милесьтым осконмес юнмато (Матф. 24:45). Ми туж шумпотӥськомы солы, мар мында милям публикациосмы! (Ис. 65:13, 14).

7. Кыӵе пайда вае милемлы тодон-валан, кудзэ сётэ Иегова?

⁷ Иеговалэсь тодон-валан басьтыса, тон визьлыко луыны быгатод но малпаськыса улыны дышод, нош со тонэ утёз, кыӵе гинэ югдуре тон медад шедьы. (Лыдӟе Мадёнъёсты 2:10—14.) Тон валалод, куд-ог учконъёс шонертэм луо шуыса, кылсярысь, кин ке вера ке, Инмар ӧвӧл шуыса яке шуд коньдонэн но ваньбурен герӟаськемын шуыса. Со сяна, тон палэнскыны быгатод сямъёслэсь но мылкыд каронъёслэсь, кудъёсыз тыныд изъян ваёзы. Соин ик вань кужмысьтыд тыршы визьлык люканы но визьмо луыны. Соку тон ас вылад шӧдод, Иегова тонэ яратэ но тыныд самой умойзэ сӥзе шуыса (Пс. 33:9; Ис. 48:17, 18).

8. Малы али ик ини инмысь Атаймы доры матэ кариськыны кулэ? Кызьы со милемлы азьланяз юрттоз?

⁸ Ӝоген ваньмыз, мар вань Шайтанлэн дуннеяз, куашкалоз. Милемыз утьыны Иегова гинэ быгатоз. Оло нош, со вакытэ ми Иеговатэк сиён но ум шедьтэ (Авв. 3:2, 12—19). Соин али ик ини кулэ инмысь Атаймы доры матэ кариськыны но дышетскыны быдэсак солы оскиськыны (2 Пётр 2:9). Соку, котырад котьмар мед луоз, тон, Давид сямен, вераны быгатод: «Котьку но азьысьтым Кузё-Инмарез адӟисько, Со мынам бурпалам — уг куалекты» (Пс. 15:8).

9. а) Иоаннлэсь 6:44 верамъя, мар каре Иегова? б) Маин огъя оскисьёсынымы тодматскон пӧртэм луэ мукет адямиосын тодматсконлэсь?

⁹ Иегова ачиз доры кылзӥськись адямиосты вае но ӧте соосты солы йыбыртъясьёсын одӥг семья луыны. (Лыдӟе Иоаннлэсь 6:44.) Пукты син азяд, тон али гинэ кинэн ке тодматскид шуыса. Мар тон тодӥськод со адями сярысь? Со Иеговалы уг йыбыртъя ке, туж ӧжытсэ тодӥськод, дыр. Оло нош, солэсь нимзэ но вылтуссэ гинэ. Нош тон огъя оскисьёсмы пӧлысь кинэн ке тодматскиськод ке, тон тодӥськод, со адями Иеговаез яратэ шуыса. Кыӵе гинэ интыын со медам вордӥськы но кытын гинэ медам буды, тон со сярысь троссэ тодӥськод ини, нош со — тон сярысь.

10, 11. Мар огазея Иеговалэсь вань ужась-тыршисьёссэ? Малы ми со понна тау кариськомы?

¹⁰ Иеговалэн Адӟись-Ивортӥсьёсыз ог-огзэс «чылкыт кылын-ымын» вераськемзыя тодмало (Соф. 3:9). Вын-агаедлэсь «чылкыт кылын-ымын» вераськемзэ кылыса, тон валаськод: со, тон кадь ик, Иеговалы оске, вылӥ эсэпъёсъя улэ, вуоно умой улонлы оске но мукет. Нош со самой валтӥсез, мае тыныд адями сярысь тодоно, малы ке шуоно со юрттэ ог-огедлы осконэз будэтыны но умой эшъёс луыны.

¹¹ Тон верад ке, Иеговалы ужаськод-тыршиськод, соин ик тынад самой умой эшъёсыд шуыса, со бадӟыматыса верам уз луы. Соос быдэс дунне вылын уло, но троссэ соос пӧлысь тон уд тодӥськы на ке но, со тынад эшъёсыд! Иеговалэн калыкезлы сяна, кинлы ке сыӵе паймымон луонлык сётэмын на-а?

12. Кыӵе ужпумъёс пуктыны луэ Инмарлы ужан-тыршонын?

¹² Лыдӟе Екклесиастэз 11:9—12:1. Инмарлы ужан-тыршонын тон кыӵе ке ужпумъёс пуктӥд-а? Оло нош, тон тыршиськод котькуд нунал Библиез лыдӟыны, кенешлэн пумиськонъёсаз умой малпам валэктонъёс сётъяны но дасям ужъёстэ сцена вылысен умой возьматыны, нош озьы ик ужан-тыршонын Инмарлэсь Кылзэ быгатыса уже кутыны. Кыӵе тынад шӧдонъёсыд кылдо, куке тон ужам ужедлэсь емышъёссэ адӟиськод яке тыршемдэ мукетъёсыз адӟо но ушъяло тонэ? Тон шумпотӥськод, дыр. Озьы ке, солы паймонэз ӧвӧл, малы ке шуоно со возьматэ, тон, Иисус выллем, Инмарлэсь эриксэ нырысетӥ интые пуктӥськод шуыса (Пс. 39:9; Мад. 27:11).

13. Маин умойгес луо Инмарлы ужан-тыршонын пуктэм ужпумъёс та дуннеысь ужпумъёслэсь?

¹³ Иеговалы ужан-тыршонлы вань саклыктэ висъяськод ке, тон лэсьтӥськод сыӵе ужез, кудӥз зэмзэ ик шумпотон но пайда вае. Апостол Павел гожтӥз: «Юнэсь, шонаськисьтэмесь  луэ, Кузё-Инмарлы ужаны берекетты мед луоз. Тодэлэ: Кузё-Инмар азьын тӥляд ужамды юнме ӧвӧл» (1 Кор. 15:58). Нош соосты, кинъёс та дуннеысь ужпумъёсты быдэстыны тыршо, кылсярысь, трос коньдон поттыны яке нимо-дано адями луыны, шудо адямиосын уд нима. Соос кыӵе ке удысын азинлыко луо ке но, шумпотон уг басьто (Лука 9:25). Со яркыт адӟиське Соломон эксэйлэн улонысьтыз (Рим. 15:4).

14. Малы дышетэ милемыз Соломонэн ортчытэм эскерон?

¹⁴ Соломон туж узыр вал, но солэн кужымез туж бадӟым вал. Со малпаз эскерон ортчытыны. Со аслыз шуиз: «Вай мон тонэ шулдыръяськон пыр чаклало-эскеро, ӟечлык пӧлын эзылыса мед улод» (Екк. 2:1—10). Соломон коркаос пуктылӥз, садъёс но арамаос мерттӥз, аслэсьтыз вань мыл потонъёссэ быдэстӥз. Мар со солы вайиз? Куанон? Шумпотон? Шуд? Милемлы, сое малпаса, йырмес тӥяно ӧвӧл — Соломон ачиз со сярысь вераз. Со гожтӥз: «Ас киосыным лэсьтэм вань ужъёсы шоры мон учки... но тани, валай: ваньмыз — алекъяськон — юнме дыр быдтон... та ужъёс бордысь нокыӵе но пайда уг поты!» (Екк. 2:11). Малы тон дышетскыны быгатӥськод Соломонэн ортчытэм эскеронысь?

15. Малы кулэ осконэз юнматыны? Псалтирь 31:8 верамъя, мар сётэ сыӵе оскон?

¹⁵ Иеговалэн тонэ куректон вайись янгышъёслэсь утемез потэ. Соин ик тыныд оскон кулэ, тон Инмарлэсь кылзӥськыны но солэсь эриксэ нырысетӥ интые пуктыны мед быгатод шуыса. Сыӵе оскон туж дуно луэ, со ноку но куректон уз вайы. Тодад возь: Иегова ноку но уз вунэты яратондэ, кудзэ тон солэн нимыз понна ужаса-тыршыса возьматӥд (Евр. 6:10). Соин ик оскондэ юнматыны тыршы. Со юрттоз тыныд шонер ужпумъёс кутыны но оскыны, инмысь Атаед тыныд самой умойзэ сӥзе шуыса. (Лыдӟе Псалтирез 31:8.)

16. Малы эрикез дунъяно но визьмо уже кутоно?

¹⁶ Павел гожъяз: «Кытын ке Кузё-Инмарлэн Духез вань, отын эрик» (2 Кор. 3:17). Зэм, Иегова эрикез яратэ. Со тынад но сюлмад сыӵе яратонэз понӥз. Но Инмарлэн потэ, тон со эрикез визьмо мед кутод шуыса, малы ке шуоно со тонэ уте. Оло нош, тон тодӥськод, кин ке огъёзъёсыд пӧлысь порнография учке, азыса-калгыса улэ, улонлы кышкытлык вайись спортэн выре, наркотикъёсты кутэ яке трос вина юэ шуыса. Оло нош, со соослы ӝамдэлы шумпотон вае ик, но со понна соослы туж бадӟым дун тыроно луэ. Кылсярысь, соос быгато сыӵе урод ужъёслэн ляльчизы луыны, висён кутыны яке кулыны но (Гал. 6:7, 8). Сыӵе «эрик» — астэ пӧян гинэ (Тит. 3:3).

17, 18. а) Кызьы Инмарлэсь кылзӥськон милемыз эрико каре? б) Маин Адамлэн но Евалэн эриксы пӧртэм луэ асьме вакытысь адямиослэн эриксылэсь?

¹⁷ Нош табере малпа: тодӥськод-а тон кинэ ке, кин висьыны кутскиз,  малы ке шуоно Библиысь эсэпъёсъя улӥз? Веранэз ӧвӧл, Иеговалэсь кылзӥськон тазалыко но эрико луыны юрттэ (Пс. 18:8—12). Со сяна, тон эриктэ визьмо уже кутӥськод ке, яке Инмар законъёслэн но возетъёслэн сьӧразы уд потӥськы ке, тон Иеговалы но анай-атаедлы возьматӥськод, тыныд тросгес эрик сётыны луэ шуыса. Азьланяз Инмар аслаз оскымон ужась-тыршисьёсызлы сыӵе эрик сётоз, кудӥз Библиын «Инмар нылпиослэн кадь ик данлыко эрик» шуыса нимамын (Рим. 8:21).

¹⁸ Адамлэн но Евалэн сыӵе эриксы вал. Иегова Едем садын соослы одӥгзэ гинэ ӧз лэзьы: соослы уг яра вал одӥг писпулэсь гинэ емышъёссэ сиыны (Ул.-выл. 2:9, 17). Секыт-а вал соослы солэсь кылзӥськыны? Ӧй вал! Туннэ адямиослы трос законъёсты тодоно но чаклано, нош Адамлы но Евалы Инмар одӥг гинэ закон сётӥз.

19. Кызьы Иегова дышетэ милемыз эрико луыны?

¹⁹ Иегова аслаз ужась-тыршисьёсыныз ассэ визьмо возе. Трос законъёс сётэм интые, со милемыз чидаса дышетэ яратонлэсь законзэ чакланы. Инмарлэн потэ, ми солэн возетъёсызъя мед уломы но уродзэ адӟемпотостэм мед каромы шуыса (Рим. 12:9). Гурезь йылын тодытыкуз, солэн Пиез, Иисус Христос, юрттӥз валаны, мар сьӧлыке вуттэ (Матф. 5:27, 28). Христос, Инмар Эксэйлыклэн Эксэез, милемыз выль дуннеын но дышетоз, но пумен ми шонерлык но законлы пумит улон шоры со кадь учкыны кутскомы (Евр. 1:9). Со сяна, милям визьмы но мугормы тырбыдэс луозы. Малпа гинэ: ӝоген ми сьӧлыклэсь мозмытскомы но вунэтомы, кыӵе урод бервылъёсы со вуттӥз. Соку тон быдэсак ас вылад шӧдод Иеговаен сӥзем «данлыко эрикез».

20. а) Кызьы Иегова эриксэ кутэ? б) Кызьы ми Иеговалэсь адӟем карыны быгатӥськомы?

²⁰ Зэм, ми ноку но быдэсак эрико ум луэ. Малы? Малы ке шуоно Инмарез но матысьёсмес яратон милемлы ноку но уз лэзьы сётэм эриклэн сьӧраз потыны. Иегова куре милемыз солэсь адӟем карыны. Инмар быдэсак эрико ке но, со малпаз, мар гинэ со уз лэсьты, соин котьку яратон валтоз шуыса (1 Иоанн 4:7, 8). Соин вераны луоз, зэмзэ ик эрико луыны быгатэ со гинэ, кин Инмарлэсь адӟем каре.

21. а) Мар вераз Давид Иегова сярысь? б) Мае ми эскеромы мукетаз статьяын?

²¹ Дунъяськод-а тон Иеговалэсь ӟеч кузьымъёссэ? Кылсярысь, Иегова сётӥз ачиз доры матэ кариськыны юрттӥсь тодон-валан, умой эшъёс, ужан-тыршонэн герӟаськем ужпумъёс но зэмос эрик. Дунъяськод ке, тынад но Давидлэн кадь шӧдонъёсыд кылдо, вылды, кудӥз гожтӥз: «Тон мыным улон сюрес возьматод: шумпотонлэн пачыл луэмез Тынад син азяд, шудо улон пумтэм дауръёслы Тынад бур ки улад» (Пс. 15:11). Мукетаз статьяын ми эскеромы 15-тӥ Псаломысь мукет пайдаё малпанъёсты. Со юрттоз милемлы умойгес валаны, мар адямиез зэмзэ ик шудо каре.