1, 2. а) Малы кышкано ӧвӧл, шуг-секытъёсын пумиськыкумы, огнамы кылёмы шуыса? б) Мае ми эскеромы та статьяын?

 БАДӞЫМ шуг-секытъёсын пумиськыса, куддыръя милемлы потэ, зарезь вылын кужмо сильтӧл дыръя огнамы пичи пыжен уяськомы шуыса. Но зэмзэ верано ке, шуг-секытъёсын пумиськыкумы, ми ноку но огнамы ӧвӧл. Яратӥсь инмысь Атаймы соосты адӟе но кылзэ сётэ, соос пыр потыны милемлы юрттоз шуыса. Иегова оскымон ужась-тыршисьёсызлы таӵе шуныт кылъёс вера: «Мон... юртто тыныд» (Ис. 41:10).

² Та статьяын ми эскеромы, кызьы Иегова милемлы юрттэ: 1) милемыз валтыса, 2) милемлы улон понна ваньзэ кулэзэ сётыса, 3) милемыз утьыса но 4) буйгатыса. Иегова оскытэ: маин гинэ ми медам пумиське, со ноку милемыз уз вунэты но уз кушты. Соин ик ми ноку но огнамы ум кыле.

ИЕГОВА МИЛЕМЫЗ ВАЛТЭ

3, 4. Кызьы Иегова милемыз валтэ? (Псалтирь 47:15).

³ Лыдӟе Псалтирез 47:15. Иегова уг возьма, ми асьмеды асьмеос валтомы шуыса. Со ачиз милемлы сюрес возьматэ. Кызьы Иегова туннэ оскымон ужась-тыршисьёссэ валтэ? Со милемлы Библиез сётӥз (Пс. 118:105). Солэн визь-кенешъёсыз возьмато, кызьы умой ужпумъёс кутылоно a но кызьы Инмарлы ярамон сямъёс будэтоно, кудъёсыз юртто али ик  ини шудогес луыны но пырак улонэ нуись сюрес вылтӥ мыныны. Кылсярысь, Иегова милемыз дышетэ простить карыны, котьку пӧяськытэк улыны но вань сюлмысьтымы мукетъёссэ яратыны (Пс. 36:8; 1 Пётр 1:22; Евр. 13:18). Иеговалэсь кылзӥськыса, ми умойгес анай-атайёс, картъёс, кышноос но эшъёс луомы.

⁴ Со сяна, Иегова аслаз Кылаз гожтӥз адямиос сярысь, кудъёсызлэн милям кадь ик шуг-секытъёссы но сюлмаськонъёссы вал (Иак. 5:17; 1 Кор. 10:13). Со адямиос сярысь лыдӟыса, ми тросэзлы дышетскыны быгатӥськомы. Кылсярысь, нырысетӥез, ми адӟиськомы, ми огнамы ӧвӧл шуыса — вал мукет адямиос но, кудъёсыз сыӵе ик шуг-секытъёс пыр потылӥзы (1 Пётр 5:9). Кыкетӥез, ми валаськомы, мар кароно, шумпотонмес ыштытэк, Инмарлы оскымон кылён понна (Рим. 15:4).

5. Кин пыр Иегова милемыз валтэ?

⁵ Озьы ик Иегова милемыз валтэ агайёс но сузэръёс пыр b. Кылсярысь, ёросэз чакласьёс, милесьтым мылкыдмес ӝутон понна, ялан кенешъёсы ветло. Соослэн речьёссы осконмес юнмато но огкылысь улыны юртто (Ап. уж. 15:40—16:5). Тӧроос но вань сюлмысьтызы тыршо кенешысь котькудӥзлы юрттыны Иеговаен матысь кусыпъёс возьыны (1 Пётр 5:2, 3). Анай-атайёс нылпиоссэс дышето Иеговаез яратыны, озьы ик юртто визьмо ужпумъёс кутыны но ӟеч сямъёс будэтыны (Мад. 22:6). Нош юн осконэн сузэр-апайёс егит сузэръёслы умой адӟем карон возьмато, пайдаё визь-кенешъёс сёто но соосты ушъяло (Тит. 2:3—5).

6. Кызьы возьматоно, ми Иеговалэсь юрттэмзэ дунъяськомы шуыса?

⁶ Иегова лэсьтэ ваньзэ, мае быгатэ, ми умой ужпумъёс мед кутомы но шудоесь мед луомы шуыса. Кызьы возьматоно, ми солэсь юрттэмзэ дунъяськомы шуыса? Мадёнъёсын 3:5, 6 гожтэмын: «Вань сюлмыныд Кузё-Инмарлы оскиськы, визьмыд вылэ эн пыкиськы». Озьы лэсьтӥмы ке, Инмар милесьтым сюресъёсмес шонертоз — трос шуг-секытъёслэсь палэнскыны юрттоз. Ми туж тау кариськомы Иеговалы, со милемыз умой тодэ, яратэ но котькудмылы кивалтэт сётэ шуыса! (Пс. 31:8).

ИЕГОВА МИЛЕМЛЫ УЛОН ПОННА ВАНЬЗЭ КУЛЭЗЭ СЁТЭ

7. Кызьы Иегова милемлы улон понна ваньзэ кулэзэ сётэ? (Филиппыослы 4:19).

⁷ Лыдӟе Филиппыослы 4:19. Милемыз валтэм сяна, Иегова тодэ, милемлы сиён-юон, дӥськут но улон инты кулэ шуыса. Соин ик Инмар милемыз бакель каре, куке ми тыршиськомы, милям асьмелэн но семьямылэн ваньмыз та мед луоз шуыса (Матф. 6:33; 2 Фес. 3:12). Куддыръя ми сюлмаськиськомы, милям улон понна ваньмыз кулэез луоз-а, уз-а шуыса. Сыӵе шӧдонъёс уродэсь ӧвӧл. Но Иегова вера, ми мултэс медам сюлмаське шуыса (Матф. 6:25). Малы? Малы ке шуоно Атаймы секыт дыръя милемыз ноку уз кельты (Матф. 6:8; Евр. 13:5). Иегова ми сярысь сюлмаськыны кылзэ сётӥз бере, ми солы быдэсак оскыны быгатӥськомы.

8. Кызьы Иегова юрттӥз Давидлы?

⁸ Малпаське, кызьы Иегова юрттӥз Давидлы. Сауллэсь пегаса улыкуз, Инмар Давидлы но солэн адямиосызлы улон понна ваньзэ кулэзэ сётылӥз. Иеговалэн юрттэмез сярысь малпаськыкуз, Давид гожтӥз: «Мон егит вал, пересьми ни, нош ӧй адӟы, шонер улӥсь куштэмын-кельтэмын мед луысал но солэн выжыосыз нянь кураса мед ветлысалзы» (Пс. 36:25). Тӥ но трос вераны  быгатӥськоды, дыр, кызьы Иегова тӥледлы яке мукет агайёслы но сузэръёслы секыт дыръя юрттылӥз.

9. Кызьы Иегова сюлмаське аслаз калыкез сярысь шугадӟонъёс дыръя? (Озьы ик учке суредъёсты.)

⁹ Иегова сюлмаське аслаз калыкез сярысь шугадӟонъёс дыръя. Кылсярысь, куке нырысетӥ даурын Иерусалимын «секыт сютэм ар» вал, пӧртэм интыосысь христианъёс агайёссылы но сузэръёссылы юрттэт ыстӥзы (Ап. уж. 11:27—30; Рим. 15:25, 26). Туннэ но Инмарлэн калыкез шырыт сямзэ возьматэ. Иегова ужась-тыршисьёсызлэсь яратыса мылкыдзэс ӝутэ шугадӟонэ сюремъёслы сиён, ву, дӥськут но эмъюм ыстылыны. Куд-ог ужась-тыршисьёс тупатъяло коркаосты но Эксэйлык юртъёсты, кудъёсызлы изъян ваемын вал. Озьы ик Иеговалэн Адӟись-Ивортӥсьёсыз, Библиез кутыса, соку ик тыршо буйгатыны но юнматыны соосты, кинъёс коркаоссэс яке матысь адямиоссэс ыштӥзы c.

10, 11. Малы тӥледыз дышетэ Борислэн учырез?

¹⁰ Иегова сюлмаське соос сярысь но, кинъёс солэн ужась-тыршисьёсыз ӧвӧл на. Шырыт сямо Инмармылэсь адӟем карыса, ми но котькуд тупась учыре тыршиськомы Адӟись-Ивортӥсьёс луисьтэм адямиослы ӟеч ужъёс лэсьтыны (Гал. 6:10). Ӵем дыръя солы луыса адямиослэн ми сярысь но Инмармы сярысь тросгес тодэмзы потэ. Тани мар луиз Украинаысь Борисэн, кудӥз школаын директор луыса ужа. Со Иеговалэн Адӟись-Ивортӥсез ӧвӧл ке но, со котьку ассэ лякытэн но гажаса возиз Адӟись-Ивортӥсьёс луись дышетскисьёсыныз. Куке Борис малпаз кошкыны  отысь, кытын ожмаськонъёс мыно, агайёсмы солы юрттӥзы. Берлогес Борис ветлӥз Христослэсь кулон нуналзэ Тодэ ваён ӝытанэ. Тани мар со вераз Иеговалэн Адӟись-Ивортӥсьёсыз сярысь: «Соос монэ туж шуныт пумитазы но мон сярысь сюлмаськизы. Туж бадӟым тау соослы!»

¹¹ Милемлы но гажась-жалясь Инмармылэсь адӟем кароно. Ми котькинлы яратонмес возьматыны тыршиськомы: огъя оскисьёсмылы но, мукет адямиослы но, кудъёсыз шугадӟонэн пумиськизы (Лука 6:31, 36). Ми оскиськомы, яратонмы адямиослэсь сюлэмзэс небӟытоз но Христослэн дышетскисьёсыз луыны мылкыдзэс ӝутоз шуыса (1 Пётр 2:12). Озьы ӧз луы ке но, ми шумпотомы, малы ке шуоно «басьтон сярысь, сётыны умойгес» (Ап. уж. 20:35).

ИЕГОВА МИЛЕМЫЗ УТЕ

12. Малэсь уте Иегова аслэсьтыз калыксэ? (Псалтирь 90:1, 2, 14).

¹² Лыдӟе Псалтирез 90:1, 2, 14. Туннэ Иегова уте милемыз ваньмызлэсь, мар соин кусыпъёсмес лябӟытыны быгатэ. Со ноку уз лэзьы Шайтанлы зэмос йыбырттонэз быдтыны (Иоанн 17:15). Ми быдэсак оскиськомы, «туж бадӟым курадӟон-куректон» дыръя Иегова аслэсьтыз кылсётонзэ быдэстоз, милемлы юн осконэн улыны юрттоз но милемыз мозмытоз шуыса (Усьт. 7:9, 14).

13. Кызьы Иегова уте ми пӧлысь котькудзэ?

¹³ Нош кызьы Иегова уте ми пӧлысь котькудзэ? Библия пыр со милемлы валэктэ, мар умой, нош мар урод луэ (Евр. 5:14). Библиысь возетъёсъя улӥмы ке, ми Инмарен кусыпъёсмес утёмы, шудогес луомы но кышкытлыкъёслэсь палэнскомы (Пс. 90:4). Озьы ик Иегова милемлы христиан кенешез сётӥз (Ис. 32:1, 2). Агайёсмы но сузэръёсмы Инмарез ярато но солэсь кылзӥсько. Куке ми соосын ӵош дырмес ортчытъяськомы, кылсярысь, пумиськонъёсын, тодытыкумы яке шутэтскыкумы, милемлы капчигес уродэзлы пумит сылыны (Мад. 13:21).

14. а) Малы Инмар милемыз вань шуг-секытъёслэсь уг утьы? б) Кыӵе оскон милемлы сёто кылъёс, кудъёсыз гожтэмын Псалтирьын 9:11? (Озьы ик учке сноскаез.)

¹⁴ Азьвыл Иегова аслэсьтыз ужась-тыршисьёссэ куддыръя уте вал, соосты вӧсь медам каре но медам вие шуыса. Но Инмар соосты котьку ӧз утьы. Библия дышетэмъя, котькуд адями малпамтэ шорысь шуг-секытъёсын пумиськыны быгатэ (Екк. 9:11, ВД). Со сяна, Иегова ужась-тыршисьёссэ уйылон-уллянъёслэсь котьку ӧз мозмытылы. Оскымон кыльыса, соос возьматӥзы, Шайтан пӧяське шуыса (Иов 2:4—6; Матф. 23:34). Туннэ но ми быгатӥськомы со выллем шуг-секытъёсын пумиськыны. Но ми оскиськомы: Иегова милемыз шуг-секытъёслэсь ӧз мозмыты ке но, со ноку уз кельты адямиосты, кудъёсыз сое ярато (Пс. 9:11) d.

ИЕГОВА МИЛЕМЫЗ БУЙГАТЭ

15. Кызьы Иегова милемыз буйгатэ вӧсяськон, Библия но кенеш пыр? (2 Коринфъёслы 1:3, 4).

¹⁵ Лыдӟе 2 Коринфъёслы 1:3, 4. Куддыръя ми туж куректыса улӥськомы. Оло нош, али тӥледлы туж секыт. Соин ик тӥ малпаськоды, огнады кылиды шуыса. Тӥлесьтыд шӧдонъёстэс кин ке вала-а? Вала, Иегова. Сюлэм вӧсь луэммес валам сяна, со «котькыӵе куректон-кайгуосмы дыръя... асьмеды буйгатэ». Кызьы? Куке ми вӧсяськыса Иеговалы сюлэммес усьтӥськомы, со сюлэммес «Инмарлэн каньыллыкеныз» тырмытэ, кудӥз «котькыӵе визьлэсь но вылӥын» (Флп. 4:6, 7). Озьы ик милемлы капчигес луэ, куке ми лыдӟиськомы, мар вера милемлы Иегова Библия пыр. Со оскытэ, милемыз туж яратэ шуыса, озьы ик милемыз  дышетэ визьлыкоесь луыны но вуоноезлы осконэн улыны. Со сяна, ми буйгатскиськомы христиан пумиськонъёсын. Отын ми Библиысь мылкыдэз ӝутӥсь малпанъёсты кылӥськомы но яратӥсь эшъёсмылэсь яратэмзэс шӧдӥськомы.

16. Малы тӥ дышетскиды Нейтан но Присцилла кузпалъёслэсь?

¹⁶ Ойдолэ эскеромы, кызьы Иегова Библия пыр аслэсьтыз ужась-тыршисьёссэ буйгатэ но юнматэ. Кӧня ке ар талэсь азьвыл Огазеяськем Штатъёсысь Не́йтан но Присци́лла кузпалъёс кошкизы отчы, кытын Эксэйлыклэн ивортӥсьёсыз ӧжыт вал. Нейтан вера: «Ми оскиськомы вал, Иегова милемыз бакель кароз шуыса». Но выль интыын соослы уж шедьтыны секыт вал, озьы ик кыкназылэн но малпамтэ шорысь тазалыксы лябӟиз. Соин ик соослы доразы берытсконо луиз. Бертыса но соослэн коньдонзы ялан уг тырмы вал. Нейтан тодаз вае: «Мон малпасько вал, Иегова милемлы уг юртты шуыса. Малы ке шуоно со уг лэсьты вал сое, мае ми солэсь возьмамы. Мон малпаны кутски, Инмар азьын янгышай шуыса». Дыр ортчыса, Нейтан но Присцилла валаны кутскизы, Иегова соосты ӧз кельты, со котьку соосын ӵош вал шуыса. Нейтан вера: «Со секыт вакытэ Библия ми понна зэмос эш вал, кудӥз милемлы ӟеч кыл вераны но пайдаё визь-кенеш сётыны быгатэ вал. Шуг-секытъёсмылы саклыкмес висъям интые, ми адӟыны тыршимы, кызьы Иегова милемлы юрттэ соос пыр потыны. Озьы милям осконмы юнмаз, Инмар милемыз азьланяз но уз кельты шуыса».

17. Кызьы Иегова буйгатылӥз Хельга сузэрез? (Озьы ик учке суредэз.)

¹⁷ Со сяна, Иегова милемыз буйгатэ агайёс но сузэръёс пыр. Кызьы? Ойдолэ эскеромы Венгриысь Хе́льга сузэрмылэсь учырзэ. Трос аръёс ӵоже со пӧртэм шуг-секытъёсын пумиськылӥз. Соин сэрен солэн ӵем дыръя мылкыдыз куашка, озьы ик со ассэ номырлы ярантэм адямиен лыдъя вал. Но ортчемзэ тодаз вайыса, Хельга валаз, Иегова сое агайёс но сузэръёс пыр котьку но буйгатылӥз  шуыса. Со гожъя: «Мон уж дорам зол жадисько, висись нылпиме утялтӥсько но мукет шуг-секытъёсын нюръяськисько вал. Соин сэрен мон воксё катьтэммисько вал. Но Иегова котьку мыным юрттылӥз. Со кылзэ сётӥз монэ буйгатыны. Берло 30 аръёс ӵоже Иегова зэм но котькуд нунал мыным юрттылӥз. Ӵем дыръя со монэ юнматэ агайёс но сузэръёс пыр. Трос пол самой кулэ дыръя соос мыным ӟеч кылъёсын сообщение яке открытка ыстылӥзы, озьы ик ушъян кылъёс веразы».

18. Кызьы ми мукетъёсты буйгатыны быгатӥськомы?

¹⁸ Мукетъёсты буйгатыса, ми Инмармылэсь адӟем кариськомы. Мар ми соос понна лэсьтыны быгатӥськомы? Ми соосты сак кылзӥськомы, гажаса-жаляса соосын вераськиськомы но соослы уж вылын юрттӥськомы (Мад. 3:27). Ми ӝегатскытэк буйгатӥськомы ваньзэс, кин курадӟе, соос Иеговалэн ужась-тыршисьёсыз ӧвӧл на ке но. Куке матысь адямиосмы куректо, висё яке мар ке понна зол сюлмасько, ми соос доры лыктӥськомы, соосты кылзӥськомы но соослы Библиысь юнматӥсь малпанъёсты вераськомы. Иеговалэсь, «котькыӵе буйгатсконлэн Инмарезлэсь», адӟем карыса, ми огъя оскисьёсмылы шуг-секытъёссэс чиданы юрттӥськомы. Озьы ик соослэсь но, кинъёс Иеговалы уг оско на, мылкыдзэс ӝутыны быгатӥськомы Инмаренымы тодматскыны (Матф. 5:16).

ИЕГОВА КОТЬКУ МИЛЕМЫН ЛУОЗ

19. Мар лэсьтэ Иегова ми понна но кызьы ми солэсь адӟем карыны быгатӥськомы?

¹⁹ Иегова туж сюлмаське соос сярысь, кинъёс сое ярато. Шуг-секытъёсын пумиськыкумы, со милемыз уг кельты. Анай но атай сямен, кудъёсыз нылпизэс туж ярато, Иегова но оскымон ужась-тыршисьёссэ ноку но уг кельты. Со милемыз валтэ, милемлы улон понна ваньзэ кулэзэ сётэ, милемыз уте но буйгатэ. Яратӥсь инмысь Атаймылэсь адӟем карыса, ми но мукетъёсты секыт дыръя юнматӥськомы но буйгатӥськомы. Та дуннеын трос шуг-секытъёс но куректонъёс. Но ми оскиськомы, Иегова милемын шуыса, малы ке шуоно со ачиз шуиз: «Эн кышка, Мон — тонэн огазьын» (Ис. 41:10). Та кылъёс милемыз оскыто, Иегова котьку милемын, ми огнамы ӧвӧл шуыса!