Куке христиан мурт выльысь кузпалъяське, кенеш сое но азьвыл кышнозэ кузпалъёсын уг лыдъя ини. Со интые, та пиосмурт но выль кышноез шоры кенеш кузпалъёс шоры кадь учке. Малы ми озьы вераськомы? Тае валан понна, ойдолэ эскеромы Иисуслэсь люкиськон но выльысь кузпалъяськон сярысь кылъёссэ.

Иисус вераз, Инмарлэн малпамезъя, люкиськон понна одӥг гинэ муг вань шуыса. Со сярысь гожтэмын Матфейлэсь 19:9: «Кин, азон-калгон сьӧлыке пырымтэ кышноеныз люкиськыса, мукетсэ кышно басьтэ ке, со азон-калгон сьӧлыке пыре». Та кылбурысь адӟиське: 1) Библия верамъя, люкиськон понна одӥг гинэ муг вань — со азон-калгон; 2) куке пиосмурт мукет муген люкиське но мукет кышномуртэз кышно басьтэ, со азон-калгон сьӧлыке пыре a.

Возьматэ-а со, Библия верамъя, пиосмурт, кудӥз азон-калгон сьӧлыке пыриз но кышноеныз люкиськиз, выльысь кузпалъяськыны быгатэ шуыса? Со котьку ик озьы ӧвӧл. Куке карт азон-калгон сьӧлыке пыре, нош кышноез солы оскымон кыле, кышно бырйыны быгатэ, картсэ простить кароно-а, ӧвӧл-а. Со простить уг кары ке но соос люкисько ке, соос кыксы ик мукет адямиосын выльысь кузпалъяськыны быгато.

Но луыло учыръёс, куке кышно картсэ простить каре, та сярысь солы вера, нош картэз, та шоры учкытэк, соин люкиське. Та учырын, кышно картсэ простить карыны но семьязэс утьыны тырше бере, Библия уг лэзьы картлы выльысь кузпалъяськыны. Нош со, Библилэн верамез шоры учкытэк, выльысь кышно басьтэ ке, со нош ик азон-калгон сьӧлыке пыре. Соин ик тӧроос нош ик правовой комитет люканы кулэ (1 Кор. 5:1, 2; 6:9, 10).

Христиан мурт выльысь кузпалъяськиз ке, нош Библияя люкиськыны солэн мугез ӧй вал ке, кызьы кенешлы учконо азьвыл кузпалъяськонэз но выльысь кузпалъяськонэз шоры? Библия верамъя, учконо-а та пиосмурт шоры но нырысетӥ кышноез шоры кузпалъёс шоры кадь? Кышноез сое простить карыны дась ке, быгатэ-а со семьязэс утьыны? Лыдъяно-а та пиосмуртлэсь выль кышноеныз кусыпъёссэ азон-калгонэн?

Кызьы кенеш азьвыл учкиз таӵе кузпалъяськонъёс шоры? Ми малпамы тазьы: оскымон кышно улэп ке, со выльысь ӧз кузпалъяськы ке но азон-калгон сьӧлыке ӧз пыры ке, картэзлэн кыкетӥ кышноеныз кусыпъёсыз шоры учконо азон-калгон шоры кадь. Но ойдолэ нош ик учкомы Иисуслэсь кылъёссэ, кудъёсыз гожтэмын Матфейлэсь 19:9. Отын номыр уг вераськы оскымон кузпал сярысь. Иисус валэктэ гинэ, пиосмурт люкиське ке но выльысь кузпалъяське ке, нош нырысетӥ кузпалыз солы оскымон вал ке, со азон-калгон сьӧлыке пыре шуыса. Солэсь люкиськемзэ но выльысь кузпалъяськемзэ Иисус азон-калгонэн нимаз. Соин сэрен та пиосмурт но нырысетӥ кышноез кузпалъёсын уг лыдъясько ини.

 Пиосмурт люкиськиз ке но выльысь кузпалъяськиз ке, оскымон кышноез сое простить карыны дась ке но, семьязэс утьыны со уг быгаты ини. Соос кузпалъёс ӧвӧл ини. Табере солы быръёно ӧвӧл, картсэ простить кароно-а, ӧвӧл-а шуыса. Со сяна, кенеш та пиосмуртлэсь выль кышноеныз кусыпъёссэ азон-калгонэн уз лыдъя b.

Ми эскеримы учыръёсты, куке карт азон-калгон сьӧлыке пыриз но кышноеныз люкиськиз. Нош куддыръя, карт азон-калгон сьӧлыке уг пыры ке но, со люкиське но мукет кышномуртэз кышно басьтэ. Яке карт кышноезлы оскымон вал ке но, со соин люкиське, собере азон-калгон сьӧлыке пыре но, нырысетӥ кышноез сое простить карыны дась вал ке но, со мукет кышномуртэз кышно басьтэ. Та учыръёсын люкиськон но выльысь кузпалъяськон — со азон-калгон. Соин ик та пиосмурт но нырысетӥ кышноез кузпалъёсын уг лыдъясько ини. Табере та пиосмурт но кыкетӥ кышноез кузпалъёс луо. Тани мар та сярысь вераськиз 2006-тӥ арын 15-тӥ куарусён понна поттэм «Возьмаськон башняын», 30-тӥ бамын (ӟуч): «Табере со выльысь кузпалъяськиз. Соин ик люкиськыны но нырысетӥ кышноез доры берытскыны со уг быгаты ини. Та пиосмурт нырысетӥ кышноеныз люкиськиз, азон-калгон сьӧлыке пыриз но выльысь кузпалъяськиз бере, нырысетӥ кышноеныз соос кузпалъёс уг луо ини».

Валанмы ӧжыт воштӥськиз ке но, ми азьло сямен ик кузпалъяськонэз святоен лыдъяськомы но азон-калгон шоры секыт сьӧлык шоры кадь учкиськомы. Библиысь куронъёс шоры учкытэк, агай нырысетӥ кышноеныз люкиськиз ке но выльысь кузпалъяськиз ке, со азон-калгон сьӧлыке пыриз. Соин ик солэсь учырзэ правовой комитет эскероз. (Кыкетӥ кышноез — Иеговалэн Адӟись-Ивортӥсез ке, солэсь но учырзэ правовой комитет эскероз.) Та пиосмуртлэн кыкетӥ кышноеныз кусыпъёсыз азон-калгонэн уг лыдъясько ке но, солы трос аръёс ӵоже кенешын нокыӵе дано ужъёсты уз оске. Солы кыӵе ке ужъёсты сётозы соку гинэ, куке вын-агайёс но сузэр-апайёс солэсь урод ужзэ вунэтозы но сое выльысь гажаны кутскозы. Солы кыӵе ке уж сётэмлэсь азьло тӧроос тодыны тыршозы: та пиосмурт нырысетӥ кышноеныз люкиськон вылысь азон-калгон сьӧлыке пыриз-а? Со быдэ вуымтэ нылпиоссэ кельтӥз ке, кызьы соос али уло? (Мал. 2:14—16).

Куке, Библиысь куронъёсты лыдэ басьтытэк, адями люкиське но выльысь кузпалъяське, со аслыз но, мукетъёсызлы но трос куректон вае. Соин ик христианъёс кузпалъяськон шоры Иегова кадь учко, нош Инмар кузпалъяськонэз святоен лыдъя (Екк. 5:4, 5; Евр. 13:4).