Жаляса верано луэ, будэмъям мон Иеговалэсь палэнскыны кутски. Мон малпай: ӵош дышетскисьёсы кызьы улэмзы потэ, озьы ик уло, нош мон мае ке ыштӥсько кадь. Анай-атаелэсь но Иеговалэсь курон-косонъёссэс мон укыр чурытэсь шуыса лыдъяй. Иеговалы ужан-тыршон мыным секыт потыны кутскиз. Мон котьку оски, Иегова вань шуыса, но соин кусыпъёсы лябӟыны кутскизы.

Воксё тодытэмысь мон ӧй дугды, но мон туж ӧжыт тодытӥ. Тодытонлы мон ноку ӧй дасяськы. Со понна адямиосын вераськыны мыным туж секыт вал. Соин ик тодытон уже пыриськеме мыным нокыӵе шумпотон но пайда ӧз вайы. Нош соин сэрен та уж мыным ӧжытгес но ӧжытгес кельшыны кутскиз. Мон котьку но малпай: кызьы та ужен вырыны луэ арняысь арняе, толэзьысь толэзе?

Куке мыным 17 арес тырмиз, мынам сокем потӥз эрико луэме, мон котырме бичай но Австралие кошки. Анай-атаелы туж секыт вал адӟыны, кызьы мон дорысьтым кошкисько. Соос мон понна сюлмаськизы но оскизы, выль  интыын мон азьло сямен ик Иеговалы ужало-тыршо шуыса.

Австралиын мынам осконэ эшшо но лябӟиз. Кенешлэн пумиськонъёсаз мон дырын-дырын гинэ ветлӥ. Нош эшъяськи егитъёсын, кудъёсыз, мон сямен ик, туннэ Эксэйлык юртэ пумиськонэ мыно вал, нош ӵуказеяз — клубе, вина юон но эктон понна. Ортчемез шоры учкыса, мон валасько, одӥг пыдыным зэмлыкын вал шуыса, нош мукетыныз — та дуннеын. Но нокытын мыным умой ӧй вал.

Ог кык ар ортчыса, мон тодматски одӥг сузэрен, кудӥз, ачиз но валатэк, мынэсьтым мылкыдме ӝутӥз малпаськыны, кызьы мон улӥсько. Мон улӥ ньыль егит сузэръёсын. Одӥг пол ми куное ӧтимы ёросэз чакласьмес но солэсь кышнозэ, Тамараез. Ми куримы соосты ми доры арнялы кыльыны. Куке ёросэз чаклась кенешлэн ужъёсыныз выре вал, Тамара ми доры кыльылӥз. Ми туж шулдыр дырмес ортчытъямы. Мыным со туж кельше вал. Тамара туж огшоры вал, соин вераськон мыным трос шумпотон вайиз. Мон туж пайми, юн осконэн адями озьы шулдыръяськыны быгатэ шуыса.

Тамара котьку но капчи мылкыдын улӥз. Со шоры учкыса, мылкыд ӝутске вал со кадь зэмлыкез но ужан-тыршонэз яратыны. Со Иеговалы самой умойзэ сётылӥз но шумпотыса улӥз. Нош мон ӧжыт гинэ ужай-тырши но шумпотонэ ӧй вал. Мынам сюлмам ик пыриз солэн умой мылкыдыз но шумпотыса улэмез. Тамара мыным валаны юрттӥз одӥг кулэ луись зэмлыкез: Иеговалэн потэ, ваньмы ми солы шумпотыса мед ужаломы-тыршомы шуыса (Пс. 99:2).

Мынам потэ вал Тамара кадь шумпотыса улэме, нош со понна мыным троссэ воштоно вал. Валамон, син куспын ваньзэ тупатыны ӧз луы, но мон тырши пичиен-пичиен ужпумме быдэстыны. Нырысь мон кутски тодытон ужлы дасяськыны но дырын-дырын юрттӥсь пионер луыса ужаны-тыршыны. Та юрттӥз мыным ӧжытгес сюлмаськыны. Тодытыкум мон кутски Библиез ӵемгес уже кутыны но, со мыным тросгес но тросгес шумпотон вайиз. Ӝоген мон кутски котькуд толэзе юрттӥсь пионер луыса ужаны-тыршыны.

 Мон эшъяськыны кутски пӧртэм аресъем вын-агайёсын но сузэр-апайёсын, кудъёсыз зэмлыкез яратӥзы но вань сюлмысьтызы Иеговалы ужазы-тыршизы. Соос юрттӥзы мыным малпаськыны, мар мынам улонам тужгес но кулэез луэ, озьы ик юрттӥзы кутскыны котькуд нунал Библиез лыдӟыны. Ужан-тыршон мыным тросгес но тросгес шумпотон вайыны кутскиз. Дыр ортчыса, мон пионер луи. Трос аръёс ӵоже мынам шумпотонэ ӧй вал, нош табере мон зэмзэ ик шудо луи но кенешын асме ас дорам кадь шӧдӥ.

Ар ортчыса, мон тодматски Алексэн, лякыт сямо агаен, кудӥз Иеговаез но ужан-тыршонэз яратӥз. Соку со кенешлы юрттӥсь вал но куать ар ӵоже ини пионер луыса ужаз-тыршиз. Со сяна, Алекс кӧня ке толэзьёс ӵоже улӥз Малави шаерын, кытын тросгес тодытӥсьёс кулэ вал. Отын со тодматскиз миссионеръёсын. Соосын эшъяськыса, солэн мылкыдыз ӝутскиз Эксэйлыклэсь ужзэ ас улоназ нырысетӥ интые пуктыны.

2003-тӥ арын ми Алексэн кузпалъяськимы но со дырысен, вань дырмес сётыса, ӵош ужаськомы-тыршиськомы. Та аръёс куспын ми тросэзлы дышетскимы но адӟимы, кызьы Иегова милемлы трос бакель каронъёссэ сётэ.

2009-тӥ арын милемлы ӵектӥзы миссионеръёс луыса ужаны-тыршыны Шундыӝужан Тиморын, пичи шаерын, кудӥз интыяськемын Малайской архипелаглэн одӥгаз шормуӵаз. Ми паймимы но, шумпотӥмы но, озьы ик кышкамы но, малы ке шуоно ӧм тодэ, мар милемыз возьма. Вить толэзьёс ортчыса ини, ми вуимы Дили каре, та шаерлэн шоркараз.

Шундыӝужан Тимор — чылкак мукет дунне. Милемлы дышоно вал выль сям-йылолъёслы, кыллы, сиёнлы но улонлы. Тодытыкумы ми ӵем дыръя пумитамы куанер, дышетскымтэ но ултӥяса возем адямиосты. Лек ожмаськон дыръя тросэз  сӧсырмизы. Соослэн сюлмазы мур яраос кылизы a.

Ноку уг вунэты, кызьы ми Шундыӝужан Тиморын ужамы-тыршимы. Кылсярысь, одӥг пол мон пумитай 13 аресъем Мария b нылашез. Солэн мылкыдыз куашкамын вал. Кӧня ке аръёс солэсь азьло солэн анаез кулӥз, нош атаеныз со туж шер адӟиськылӥз. Со кадь ик аресъем трос егитъёс сямен, Мария ӧз тоды, кыӵе ужпумъёс улоназ пуктоно. Тодӥсько на, кызьы, шӧдонъёсыз сярысь веракуз, со бӧрдыны кутскиз, нош мон чик но ӧй вала солэсь верамзэ, малы ке шуоно солэсь кылзэ уг тодӥськы на вал. Мон Иеговалы вӧсяськи но кури солэсь, со мыным та нылашез юнматыны мед юрттоз шуыса. Собере мон солы лыдӟыны кутски Библиысь буйгатӥсь кылбуръёсты. Кӧня ке аръёс ӵоже мон адӟи, кызьы зэмлык Мариялэсь улонзэ воштэ. Со пылатӥськиз но али ачиз адямиосын Библиез дышетэ. Табере Мариялэн вань бадӟым духовной семьяез, кудаз сое туж ярато.

Иегова бакель каре Шундыӝужан Тиморын нуиськись тодытон ужез. Тросэз ивортӥсьёс берпуметӥ дас ар куспын пылатӥськизы ке но, соос пӧлысь тросэз пионеръёс, кенешлы юрттӥсьёс но тӧроос луыса ужало-тыршо. Нош кин ке но ужа-тырше палэнын берыктон ужез нуись офисын но юрттэ берыктыны со интыысь кылъёсы публикациосмес. Мон шумпотӥ кылыны, кызьы соос кенешлэн пумиськонъёсаз кырӟало, пальпото но Иеговаен кусыпъёссэс юнмато.

Австралиын ужан-тыршонэн ӵошатыса, Шундыӝужан Тиморын ужан-тыршон чылкак мукет вал, но мон понна та самой умой улон вал. Куддыръя ми ветлоно луимы туж пичи автобусын, кудаз, ми малпамъя, адямиослы но инты ӧй вал, нош соос сьӧразы нуизы на базарысь басьтэм куасьтэм чорыгез но пӧртэм емышъёсты. Куддыръя ми адямиосын Библиез дышетӥмы туж пичи коркаосын, кудъёсаз туж пӧсь вал но выжез ӧй вал, отӥ ик курегъёс бызьыло вал. Но вань шуг-секытъёс шоры учкытэк, ӵем дыръя мон малпай: «Кыӵе татын умой!»

Мон тау карисько анаелы но атаелы Иеговалэн катъёсызъя улыны дышетэмзы понна но егит дыръям юрттэмзы понна, куке мон Иеговалы ӧжыт ужай-тырши. Мон ас вылам шӧдӥ, макем зэм луо кылъёс, кудъёсыз гожтэмын Мадёнъёсын 22:6. Анае но атае монэн но Алексэн данъясько но шумпото, ми Иеговалы ужаськомы-тыршиськомы шуыса. 2016-тӥ арысен ми мыныса-ветлыса ужаськомы-тыршиськомы со интыын, кудӥз понна кыл кутэ австралазийской филиал.

Оскыны ик секыт, куке но тодытон уж мыным шумпотон ӧз вайы шуыса. Али мон туж яратӥсько тодытон ужез. Мон валай, мар гинэ улонамы медам луы, зэмос шумпотон ми басьтӥськомы соку гинэ, куке вань сюлмысьтымы Инмарлы ужаськомы-тыршиськомы. Берпуметӥ 18 аръёс ӵоже мон Иеговалы ужасько-тыршисько Алексэн ӵош. Та улонысьтым самой шудо аръёс! Табере мон тодӥсько, малы Давид одӥг псаломаз Иегова сярысь тазьы вераз: «Ваньмыз Тыныд оскиськыса улӥсьёс шумпотозы, пумтэм дауръёс ӵоже шумпотонэн пачылмыса улозы... Тынэсьтыд нимдэ яратӥсьёс Тонэн ушъяськыса улозы» (Пс. 5:12).