Obunabbi 2. Enjara

“Halibaho ebiihe.”​—MARAKO 13:8.

● Omusaija airukira omu kyaro kya Quaratadji, Niger. Abanyabuzaale be nabo barugire omu biikaro ebya hagati y’ihanga obu nibalengaho kwiruka enjara. Baitu omusaija onu abyama wenka ha mukeeka. Habwaki ali wenka? Omwebembezi w’ekyaro ow’arukwetwa Sidi asoborra ati “Tarukusobora kuliisa eka ye nahabweki n’atiina n’okubarora ha maiso.”

AMANANU NIGOOLEKA KI? Omu nsi yoona haihi omuntu 1 omu bantu 7 tarukutunga ebyokulya ebirukumara buli kiro. Abantu baingi kukira muno omu irungu lya sahara erya Africa, omuntu 1 omu bantu 3 nabazibwaho kuba aine enjara ey’amaani. Kusobora kwetegereza kurungi omuhendo gunu, tekerezaaho eka enyakurumu omusaija, mukazi we n’omwana. Kakuba haba haroho ebyokulya ebirukwigusa abantu babiri bonka, n’oha arasigara ataliire? Omusaija? omukazi? rundi omwana wabo? Enu niyo encwamu abanyakwine amaka nk’ago eibasemeriire kukora buli kiro.

ABANTU BAGAMBA KI? Ensi eyeza ebyokulya ebirukumara buli omu. Ebintu ebiri omu nsi nibyo bisemeriire kukozesebwa kurungi.

MALI ENTEKEREZA EGI EHIKIRE? Ky’amananu ngu abalimi hati nibasobora kuturukya ebyokulya bingi n’okubitwara omu biikaro ebindi kukira na kara. Gavumenti z’abantu zisemeriire kukozesa kurungi ebyokulya ebyezere kumaraho ekizibu ky’enjara. Baitu, n’obukiraaba ngu zimazire emyaka nyingi nizirengaho, tizisoboire kukihikiiriza.

NOTEKEREZA KI? Ebigambo ebiri omu Marako 13:8 nibihikirizibwa? N’obukiraaba ngu habaireho enkurakurana omu byatekinologiya, ibura ly’ebyokulya likwasireho abantu omu nsi yoona?

Emisisa n’enjara nibyo bikira kurugamu ebizibu ebindi kandi nabyo ebinyakuli kicweka ky’akokurorraho ak’ebiro ebya ha mpero.

[Ebigambo ebikomerwemu]

“Abaana abarukuhingura kimu kyakasatu abaitwa ekihaso, okuturuka hamu n’endwaire ezindi tibakufiire obu gakubaire gatali malya mabi.”​—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Ekisisani Nambere Kiihirwe]

© Paul Lowe/Panos Pictures