Yesu akeegesa abantu kuba n’obusinge hagati yabo. Baitu nabwo akagambira abegeswa be ati: “Mutatekereza ngu nkaija [kuleeta] obusinge hansi; Ntaije [kuleeta] obusinge, rundi empirima. Baitu nkaija okubaganiza omwana na ise, omuisiki na nyina, mukomwana na nyinazara.” (Mat. 10:34, 35) Kiki Yesu ekyakaba namanyisa?

Yesu akaba atarukugonza kubaganizaamu abanyabuzaale, baitu akaba akimanyire ngu enyegesa ze nizo zakubaganizeemu abanyabuzaale banu. Nahabweki abo abakaba nibagonza kufooka begeswa ba Kristo kandi bakabatizibwa, bakaba basemeriire kwetegereza ebyakurugire omu ncwamu yabo. Obwire obumu abali nabo omu buswere rundi abanyabuzaale abandi, bakubahiganiize ekyakubagumiire kwikara bali besigwa ha nyegesa za Yesu.

Baibuli n’eyekambisa Abakristaayo ‘kwikara omu businge n’abantu boona.’ (Bar. 12:18) Baitu enyegesa za Yesu nizisobora kufooka ‘nk’empirima’ omu maka agamu. Kinu kibaho omuntu omu, omu ka obwaikiriza enyegesa za Yesu baitu abandi bakazanga rundi bakazihakaniza. Kakuba eki kibaho abanyabuzaale abo bafooka ‘banyanzigwa’ b’ogu arukwega amananu.​—Mat. 10:36.

Abegeswa ba Kristo abarukwikara omu maka agarumu enyikiriza ezirukwahukana, obwire obumu baraba omu nyikara ezirenga okugonza kwabo hali Yahwe na Yesu. Ekyokurorraho abanyabuzaale baabo abatali omu mananu nibasobora kulengaho kubahambiriza kujaguza ekiro kikuru eky’ediini. Omu nyikara nk’egi baba baine kucwamu oubarasemeza? Yesu akagamba ati: “Anyakugonza ise rundi nyina okubakiza nyowe, tansemerra.” (Mat. 10:37) Baitu Yesu akaba atarukumanyisa ngu kusobora kufooka abegeswa be, abo abarukwega amananu basemeriire kuleka kugonza muno bazaire baabo. Oihireho akaba n’abeegesa omulingo basobora kucwamu ekirukukirayo obukuru omu bwomeezi bwabo. Kakuba abanyabuzaale baitu abatali omu mananu balengaho kutulemesa kuramya Yahwe, tusemeriire kugumizaamu nitubagonza, baitu tusemeriire kukiijuka ngu kugonza Ruhanga nukwo tusemeriire kwebembeza omu bwomeezi bwaitu.

Hataroho kugurukyagurukya abanyabuzaale baitu obubatuhakaniza kitusaaliza muno. Baitu, abegeswa ba Yesu basemeriire kwijuka ebigambo bye ebirukugamba ngu: “Nauwe atayetweka omutigwe nankuratira, tansemerra.” (Mat. 10:38) Nahabweki Abakristaayo barora okuhakanizibwa abanyabuzaale baabo nka kumu ha kubonabona abegeswa ba Kristo okubasemeriire kugumira. Baitu baikara nibanihira ngu habw’engeso zaabo enungi, abanyabuzaale baabo nibaija kuhindura entekereza yabo kandi bagonze kwega amananu.​—1 Pet. 3:1, 2.