“Abakaiso ba Yahwe batagarukire ha kwoleka abantu embabazi, baitu bakatwaza kurungi n’embwa zange. Kiro kimu Elaine, ow’akaba ayemeriire ha rubaju rw’akagaali ak’okutebeza akaha embwa zange ibiri bisikwiti. Hanyuma y’eki, buli murundi obutwagendaga haihi nambere bali, embwa zange zabaga nizigonza kugenda nambere Abakaiso ba Yahwe bali kutunga ‘bisikwiti.’

“Eki kikagumizaamu kumara ameezi. Embwa zasemererwaga kutunga bisikwiti, kandi nanyowe kyansemezaaga kubaza n’Abakaiso ba Yahwe baitu tinagonzaaga kubaza nabo bingi. Nkaba mpingwize emyaka 70 kandi nkaba ntamanyire Abakaiso ba Yahwe ebibarukwikiririzaamu. Hanyuma y’amakanisa maingi kuumaramu amaani, nkacwamu kwesomera Baibuli habwange.

“Omu kasumi ako, nk’arora n’Abakaiso ba Yahwe abandi omu bicweka ebindi eby’orubuga bemeriire haihi n’obugaali bwabo obw’okutebeza. Nabo bakaba bali bantu barungi. Bagarukamuga ebikaguzo byange byona nibasigikirra ha Baibuli, ekyandetiire kwongera kubesiga.

“Kiro kimu, Elaine akankaguza ati, ‘Nokiikiriza ngu ebisoro kisembo kuruga hali Ruhanga?’ Nkamugarukamu nti, ‘Ego, mali ninkiikiriza!’ Hanyuma Elaine akansomera Isaya 11:6-9. Kuruga obu nkagonza kwega ebirukukiraho ha Baibuli, baitu nabwo ntagonze kutwara ebitabu byabo.

“Omu biro ebyayongiireho, kikansemeza kugumizaamu nimbaza na Elaine hamu na iba Brent kandi tukabazaaho ebintu ebyankwasireho muno. Bakangambira kusoma Matayo kuhika ha Engeso Ezabakwenda nukwo kinkonyere kwetegereza nikimanyisa ki kuba Omukristaayo ow’amananu. Kandi eki nikyo nakozere. Hanyuma y’akasumi kake, nkaikiriza kwega Baibuli na Brent hamu na Elaine. Eki kikabaho hagati y’omwaka 2016.

“Nkaba nyine ekihika kingi eky’okwega Baibuli buli wiiki kandi n’okugenda omu nsorrokano ha Kyombeko ky’Obukama. Nkahurra nyine omugisa gw’amaani kandi nsemeriirwe habw’okwega mali Baibuli eby’eyegesa. Hanyuma y’omwaka nka gumu nk’abatizibwa nk’omu h’Abakaiso ba Yahwe. Hati nyine emyaka 79, kandi ninkigumya nkazoora ediini ey’amananu. Yahwe ampaire omugisa ogw’okunyikiriza kuba omu ka ye ey’ensi yoona.”