Twizire nitwetegereza mpora mpora ekikaguzo kyaitu, Ruhanga Nuwe Oha? Tutandikire nitwega kuruga omu Baibuli ngu ibara lya Ruhanga nuwe Yahwe kandi n’omulingo gwe omukuru nugwo ogw’okugonza. Kandi tubalizeeho n’ebintu eby’akozere hamu n’ebyarugenda kukora kugasira abantu. N’obukiraaba ngu haroho ebintu ebindi ebingi eby’osobora kwega hali Ruhanga, n’osobora kwekaguza omulingo oragasirwamu obw’orakikora.

Yahwe nakuraganiza ngu ‘obworamuserra, oramuzoora.’ (1 Ekyebyomubusinge 28:9) Tekerezaaho omugisa ogw’amaani ogw’oratunga obworayeyongera kuserra n’okumanya Ruhanga​—omuganjano ogw’amaani nauwe! (Zabuli 25:14) Omuganjano nka gunu nigusobora kukugasira guta?

Okusemererwa kwonyini. Baibuli n’eyoleka ngu Yahwe ali “Ruhanga ow’okusemererwa.” (1 Timoseo 1:11, NW) Obworamwirra haihi kandi okekamba kuhondera emiringo ye n’oija kutunga okusemererwa kwonyini, okurakugasira omu bitekerezo hamu n’omu mubiri gwawe. (Zabuli 33:12) Kandi noija n’okutunga okusemererwa omu bwomeezi bwawe​—kuraba omu kwetantara engeso eziteka obwomeezi bwawe omu kabi, kuba n’engeso enungi, kandi n’okwikara oine enkoragana enungi n’abantu abandi. Naiwe noija kwikiraniza n’ebigambo by’omuhandiiki wa Zabuli ayagambire ati: “[Kirungi] nyowe kuirra haihi Ruhanga.”​—Zabuli 73:28.

Kukufaaho nk’omuntu kandi n’okukurolerra. Yahwe akaraganiza abaheereza be ati: “Ndakuhaburaga neriso lyange liikaire haliiwe.” (Zabuli 32:8) Kinu nikimanyisa ngu Yahwe nafaaho buli omu ha baheereza be kandi n’abakonyera kusigikirra ha byetaago by’abo. (Zabuli 139:1, 2) Obw’oramara kutunga enkoragana enungi na Yahwe, noija kukyetegereza ngu aikara ayetekaniize kukukonyera.

Ebiro eby’omu maiso ebirungi. Kwongerra ha kutuha obwomeezi oburungi kandi oburumu okusemererwa kasumi kanu, Yahwe Ruhanga atukinguliireho n’omugisa ogw’okutunga ebiro eby’omu maiso ebirungi. (Isaya 48:17, 18) Baibuli negamba eti: “Bunu nubwo bwomezi obutahwaho, okumanya iwe Ruhanga omu owamananu nogu ouwatumire, Yesu Kristo.” (Yohana 17:3) Okunihira Ruhanga okw’arukutuha kuli nk’enanga y’eryato, ey’etukonyera “okutatengetatengeta” omu busumi bunu obugumangaine.​—Abaheburaniya 6:19.

Zinu nizo zimu ha nsonga enkuru habwaki tusemeriire kweyongera kumanya Ruhanga kandi n’okutunga enkoragana enungi nauwe. Nitukusaba ohikirre omu h’Abakaiso ba Yahwe akusoborre ebirukukiraho rundi genda ha mukura ogwa jw.org.