Ekigambo okuhana nikisobora kumanyisa kuragirra rundi kwegesa. Obwire obumu, eki kitwarramu kuterekereza omwana obwarukuba aine engeso embi. Baitu, obwire oburukukira obwingi, kitwarramu kwegesa kara omwana engeso ezisobora kumukonyera kukora encwamu enungi.

Kuruga omu myaka nke enyuma, okuhana tikukyaroho omu maka agamu habwokuba abazaire nibatiina ngu kuhabura abaana baabo nikyoleka ngu nibabarabyamu amaiso. Baitu abazaire ab’amagezi batekaho ebiragiro ebirukwetegerezebwa kurungi kandi batendeka abaana baabo kubyorobera.

“Abaana basemeriire kugambirwa ebibasemeriire kukora n’ebibatasemeriire kukora kusobora kukura kurungi. Kakuba abaana batahanwa, basisana nk’eryato eritaine engahi—ekisobora kulireetera kuhaba rundi kudikira.”—Pamela.

Gumira ha biragiro ebyotaireho. Kakuba omwana atahondera ebiragiro byawe, mufubire. Ha rubaju orundi, ikara oyetekaniize kusiima omwana wawe obwayorobera ebiragiro byawe.

“Nyikara ninsiima abaana bange habwokuba bahulizi omu nsi nambere obuhulizi butakanyire. Kubasiima kibakonyera kwikiriza okuhaburwa obukiba nikyetaagisa.”—Christine.

OMUSINGI GWA BAIBULI: “Omuntu ebyasiga nibyo aligesa.”—Abagaratiya 6:7.

Ba muntu arukwetegereza. Obworaaba nohana omwana wawe, tekerezaaho emyaka ye, obusobozi bwe, n’obukooto bw’ekibi ekyakozere. Ebifubiro bikora kurungi obubiba nibinganaingana n’omusango ogukozerwe—ekyokurorraho, kakuba omwana akozesa kubi esimu nikisobora kwetaagisa kugimwihaho kumara obwire. Baitu kandi werinde obusonga obutaito oburukubihiza kubufoora ensonga y’amaani.

“Ndengaho kwetegereza omwana wange obwaraaba anjemiire akigenderiire rundi akozere ensobi habwokuba atetegereze kurungi ekiragiro. Haroho embaganiza hagati y’engeso embi ey’amaani omwana ey’asemeriire kuleka n’ensobi ey’osemeriire kubazaaho kwonka.”—Wendell.

OMUSINGI GWA BAIBULI: “Mutabihiza abana banyu, baleke okugwa ensazi.”—Abakolosai 3:21.

Mube n’okugonza. Abaana kibanguhira kwikiriza okuhana n’okukuteeka omu nkora obubamanya ngu ekigendererwa ekikuru eky’abazaire nikyo ngu nibabagonza.

“Mutabani waitu obuyahwamuga amaani habw’ensobi eziyakoraga, twamwolekaga ngu nitumwesiimisa habw’encwamu enungi eziyakoraga. Twamugambiraga ngu ensobi eziyabaga akozere zikaba zitarukwija kumufoora mwana mubi kakuba yateekaga omu nkora okuhanwa okurukwetaagisa kandi ngu tukaba turoho kumukonyera.”—Daniel.

OMUSINGI GWA BAIBULI: “Okugonza kugumisiriza, kuba nembabazi.”—1 Abakolinso 13:4.