Ruhanga n’agonza abantu begondeze omu nsi. Habwokuba agonza muno abantu, akahanga ensi n’ebintu byoona ebigirumu. Omu kasumi akatali kahara naija kwihaho ebintu byoona ebirukubonabonesa abantu, abahe obusinge okwehinguliriza ensi yoona.​—Soma Yeremiya 29:11.

Tiharoho gavumenti erasoboire kwihaho omwaga, oburwaire, n’okufa. Baitu haroho amakuru amarungi. Omu kasumi akatali kahara Ruhanga naija kwihaho gavumenti z’abantu, omu kiikaro kyazo agarremu eye. Abantu boona abaraaba hansi y’obulemi obu nibaija kusemererwa omu businge obwingi n’obwomezi oburungi.​—Soma Isaya 25:8; 33:24; Danieri 2:44.

Okubonabona nikwija kuhwaho hanyuma ya Ruhanga okwihaho abantu ababi boona. (Zefaniya 2:3) Ekyo kiribaho ddi? Ekigambo kya Ruhanga kikoleka ira ebintu ebirukutuntuza abantu hati. Ebintu ebibi ebiroho omu nsi hati nibyoleka ngu akasumi ka Ruhanga okugira eki y’akoraho kali haihi.​—Soma 2 Timoseo 3:1-5.

Tusemerire kwega hali Ruhanga nituraba omu Kigambo kye, Baibuli. Baibuli n’esisana ebbaruha ekuruga hali taata ow’engonzi. N’etugambira omulingo ogw’okutungamu obwomezi oburungi hati, n’obwomezi obutahwaho omu kasumi ak’omu maiso. Abantu abamu tibarukwija kusemererwa kurora n’otunga obukonyezi kwetegereza Baibuli. Baitu ekyo tiwakukikirize kukulemesa kumanya omulingo ogw’orukusobora kutungamu obwomezi obutahwaho.​—Soma Enfumo 29:25; Okusuku’rwa 14:6, 7.