Hali Tito 2:1-15

  • Enyegesa ezirukugasa hali abato n’abakuru (1-15)

    • Yanga okutatiina Ruhanga (12)

    • Kwekamba kukora ebikorwa ebirungi (14)

2  Baitu iwe ikara noobaza ebirukuhikaana n’enyegesa ezirukugasa. 2  Leka abasaija abakuzire babe abarukwetanga omu ngeso zaabo, ab’obujunaanizibwa, abarukwetegereza kurungi,* abaine okwikiriza okugumire,* abaine okugonza, n’okugumiisiriza. 3  Omu mulingo nugwo gumu, leka n’abakazi abakuzire babe n’engeso enungi, batali bahangirizi, batali bairu ab’okunywa amaarwa maingi, baitu abeegesa ebirungi, 4  nukwo basobole kuhabura* abakazi abato kugonza baibabo, abaana baabo, 5  kuba abarukwetegereza kurungi, kuba abarukwera omu ngeso, abarukukora emirimo ey’omu ka,* kuba abantu abarungi, n’okworobera baibabo, nukwo ekigambo kya Ruhanga kitabazibwaho kubi. 6  Omu mulingo nugwo gumu, ikara nooteererra abasigazi kuba abarukwetegereza kurungi, 7  noobateeraho ekyokurorraho ekirungi omu kukora ebikorwa ebirungi omu buli kintu. Yegesa ebintu ebirukwera* otarukuzaanazaana, 8  nookozesa ebigambo ebirungi* ebitasobora kujumiirirwa nukwo abo abahakaniza basobole kuswara habwokuba tibaine kintu kyona ekibi eki baraatubazaaho. 9  Leka abairu boorobere bakama baabo omu bintu byona, balengeho kubasemeza, batarukubahakaniza, 10  batarukubaiba, baitu babe beesigwa omu byona, nukwo omu buli mulingo booleke oburungi bw’enyegesa* za Ruhanga, Omujuni waitu. 11  Habwokuba embabazi enyingi muno* eza Ruhanga ezirukuleetera abantu aba buli mulingo kujunwa, zoolekerwe. 12  Zitutendeka kwangira kimu ebintu byona Ruhanga ebi anoba, n’okwegomba okw’ensi, kandi zitutendeka kwetegereza kurungi,* kuba n’okuhikirra, kwemarra hali Ruhanga* omu nteekaniza ey’ebintu* ey’akasumi kanu, 13  obu tulindiriire okunihira okw’okusemererwa n’okwolekwa okw’ekitiinisa okwa Ruhanga waitu omukuru, hamu na Yesu Kristo Omujuni waitu, 14  ayayehaireyo habwaitu kutujuna* kuruga omu kukora ebibi ebya buli mulingo, nukwo ayesemerereze wenka abantu abanyakuli ekintu kye eky’embaganiza,* abarukwekamba kukora ebikorwa ebirungi. 15  Ikara noobaza ebintu binu, nooteererra* kandi noohana n’obusobozi bwona. Otaikiriza omuntu weena kukujooga.

Obugambo Obuli Hansi

^ Rundi, “abarukucwamu kurungi.”
^ Nkooku kiri, “aboomeezi omu kwikiriza.”
^ Rundi, “kutendeka.”
^ Rundi, “abarukurolerra kurungi amaka gaabo.”
^ Rundi nikisobora kuhindurwa, “yegesa n’oburukwera.”
^ Rundi, “ebirukugasa.”
^ Rundi, “bahunde enyegesa.”
^ Rundi, “kucwamu kurungi.”
^ Rora, Kusoborra Ebigambo; “Enteekaniza ey’ebintu.”
^ Nkooku kiri, “kutucungura.”
^ Rundi, “ab’omuhendo muno hali uwe.”
^ Rundi, “nooyekambisa.”

Obujunanizibwa bwaitu ha Kitabu Kinu