Okusuukururwa hali Yohaana 21:1-27
21 Kandi narora iguru erihyaka n’ensi empyaka; habwokuba iguru n’ensi ebyabandize bikaba bitakyaroho, kandi n’enyanja ekaba etakyaroho.
2 Nayongera narora orubuga orurukwera, Yerusaalemu Oruhyaka, nirusirimuka kuruga omu iguru hali Ruhanga kandi ruteekaniziibwe nk’omugole ow’ahunzirwe habwa iba.
3 Hanyuma nahurra iraka erikooto niriruga ha kitebe ky’obukama nirigamba liti: “Dora! Eheema ya Ruhanga eri hamu n’abantu, aliikara na bo, kandi baliba bantu be. Kandi Ruhanga weenyini araikaraga na bo.
4 Kandi alisiimuura amaziga goona omu maiso gaabo, okufa tikulyongera kubaho, noobu kwakuba okuteera empamo, noobu kwakuba okurra, noobu bwakuba obusaasi, tibiryongera kubaho. Ebintu eby’okubanza biriba bihoireho.”
5 Kandi Ogu ow’akaba aikaliire ha kitebe ky’obukama yagamba ati: “Dora! Ebintu byona nimbifoora bihyaka.” Yayongera yagamba ati: “Handiika, habwokuba ebigambo binu by’okwesiga* kandi by’amananu.”
6 Kandi yangambira ati: “Bihikiriziibwe! Niinyowe Alufa na Omega,* entandiko kandi empero. Ogu weena anyakwine iroho ndimuha amaizi agatali g’okusasurra kuruga ha nsoro ey’amaizi ag’obwomeezi.
7 Ogu weena alisingura, aligwetwa ebintu binu, kandi ndiba Ruhanga we kandi na uwe aliba mwana wange.
8 Baitu n’abatiini, n’abo abataine kwikiriza, n’abo abarukwejumbira omu bikorwa ebirukunugwa, n’abaisi, n’abasiihani,* n’abo abakora eby’oburaguzi, n’abaramya ebisisani, n’ababiihi b’ebisuba boona, omugabo gwabo guliba omu nyanja erukwaka omurro n’obuganga. Eki nikimanyisa okufa okwa kabiri.”
9 Omu ha bamalaika musanju abakaba baine ebibindi musanju ebikaba biijwire emihito musanju ey’okumalirra, yaija yangambira ati: “Ija nkwoleke omugole omukazi ow’Omwana gw’Entaama.”
10 Nubwo yantwara naakozesa amaani g’omwoyo ha rusozi oruraihire kandi orukooto, yanyoleka orubuga orurukwera Yerusaalemu nirusirimuka kuruga omu iguru hali Ruhanga,
11 kandi rwine ekitiinisa kya Ruhanga. Rukaba nirwangasana nk’ibaale erirukukirayo kuba ery’omuhendo, nk’ibaale yasipa erirukwangasana nk’ekirahule ekirukurorrana.
12 Rukaba rwehinguliriziibwe orugo orukooto kandi oruraihire, rwine emiryango 12 na bamalaika 12 bali ha miryango, kandi ha miryango hakaba hahandiikirweho amabara ag’enganda 12 ez’abaana ba Isaleeri.
13 Omu burugaizooba hakaba haliyo emiryango esatu, omu bukiizi bw’emoso haliyo emiryango esatu, omu bukiizi bw’obulyo haliyo emiryango esatu, n’omu bugwaizooba naho haliyo emiryango esatu.
14 Orugo rw’orubuga rukaba rwine amabaale g’omusingi 12, kandi gakaba garoho amabara 12, ag’abakwenda 12, ab’Omwana gw’Entaama.
15 Hati ogu ow’akaba naabaza na nyowe akaba akwasire orubingo orw’ezaabbu nk’eky’okupimisa nukwo asobole kupima orubuga, emiryango y’orubuga hamu n’ebisiika byarwo.
16 Orubuga rukaba rwine embaju ina ezirukwinganaingana, kandi oburaiha bwarwo nibwinganaingana n’obugazi, yapima orubuga naakozesa orubingo, Sitadiya 12,000;* obukooto bwarwo n’obugazi, n’okuraiha kwarwo bikaba nibingana.
17 Yapima ekiisika kyarwo, ekikaba nikingana emikono 144,* kusigikirra ha kipimo ky’omuntu kandi ha murundi nugwo gumu nikyo ekipimo kya malaika.
18 Ebisiika by’orugo bikaba bikozerwe omu mabaale ga yasipa, kandi orubuga rukaba ruli nk’ezaabbu ey’esemeziibwe kurungi enyakuli nk’ekirahule ekirukwangasana.
19 Emisingi y’orugo rw’orubuga ekaba etimbirwe amabaale ag’omuhendo aga buli mulingo: omusingi ogw’okubanza gukaba yasipa, ogwa kabiri safiro, ogwa kasatu kalikedoni, ogwa kana zumalidi,
20 ogwa kataano sadonukisi, ogwa mukaaga sadiyo, ogwa musanju kurusoliso, ogwa munaana berulo, ogwa mwenda topazi, ogwa ikumi kurusoperaso, ogwa ikumi n’emu hwakiso, ogwa ikumi n’ebiri amesusito.
21 N’emiryango 12 ekaba eri eruuru 12; kandi buli mulyango gukaba gukozerwe omu ruuru emu. Kandi oruguudo orukooto orw’orubuga rukaba rukozerwe omu zaabbu enungi nk’ekirahule ekirukurorrana.
22 Omu rubuga oru, ntarolemu yekaru, habwokuba Yahwe* Ruhanga Ow’obusobozi Bwona, nuwe yekaru yarwo hamu n’Omwana gw’Entaama.
23 Kandi orubuga tirurukwetaaga izooba rundi okwezi kurujwera habwokuba ekitiinisa kya Ruhanga kirumulikira, kandi Omwana gw’Entaama niyo etaara yarwo.
24 Kandi amahanga galigendera omu kyererezi kyarwo kandi abakama b’ensi balireeta ekitiinisa kyabo omuli rwo.
25 Emiryango yarwo terikingwa naakake nyamusana, kandi omu rubuga oru tihalibayo obwire bw’ekiro.
26 Kandi baliruleetamu okukugiza n’ekitiinisa eky’amahanga.
27 Baitu tirulitaahwamu naakake ekintu kyona ekitasemiire, n’omuntu weena arukukora ebirukunugwa kandi akabaza ebisuba; baitu rulitaahwamu abo bonka abahandiikirwe omu muzingo* ogw’obwomeezi ogw’Omwana gw’Entaama.
Obugambo Obuli Hansi
^ Rundi, “nibyesigwa.”
^ Rundi, “Niinyowe A na Z.” Omu nyuguta ez’Oruyonaani, Alufa nyuguta ey’okubanza kandi Omega nyuguta ey’okumalirra.
^ Rora, Kusoborra Ebigambo; “Obusiihani.”
^ Nka kilomita 2,220 (mairo 1,379). Sitadiya ekaba ninganaingana mita 185 (fuuti 606.95). Rora, Ebyong. B14.
^ Nka mita 64 (fuuti 210). Rora, Ebyong. B14.
^ Rora, Ebyong. A5.
^ Rora, Kusoborra Ebigambo; “Omuzingo.”
