Obbadiya 1:1-21

  • Edomu ey’emyehembo eribundaazibwa (1-9)

  • Ebikorwa ebibi Edomu ebi yahikize hali Yakobbo (10-14)

  • Ekiro kya Yahwe hali amahanga goona (15, 16)

  • Enju ya Yakobbo niija kugarurwaho (17-21)

    • Yakobbo alimaraho Edomu (18)

    • Obukama bulifooka bwa Yahwe (21)

1  Okwolekwa kwa Obbadiya:* Binu nibyo Yahwe, Mukama Omulemi wa Byona ebi arukugamba hali Edomu: “Tuhuliire obutumwa kuruga hali Yahwe,Omukwenda atumirwe omu mahanga naagamba ati: ‘Mwimuke tweteekanize kumurwanisa.’”  2  “Dora! Nkufoire wa hansi muno omu mahanga,Kandi noogayibwa muno.  3  Okwekuliiriza okw’omutima gwawe kukubiihire,Iwe anyakwikara omu minyarra* y’omwandara,Anyakwikara haiguru nooyegambira omu mutima gwawe oti:‘Nooha alimpanurayo akannaga hansi?’  4  Noobu waakweyombekera haiguru* nk’isamba,Rundi okateeka ekiju kyawe omu nyunyuuzi,Niinyija kukuhanurayo,” agambire Yahwe.  5  “Kakuba abasuma rundi abanyagi bakutaahirra omu bwire bw’ekiro,(Ka nibaija kukuhwerekerereza kimu!)* Tibaakwibire ebi barukwetaaga byonka? Rundi kakuba bakaba bali banogi b’emizaabbibbu,Tibaakusigireho oburagalika?  6  Esau ka bamutindigwire! Eby’obuguuda bye ebikaba biserekerwe, binyagirwe.  7  Bakwirukize baakuhikya ha mutaano. Ab’orukukoragana na bo boona bakubiihire. Abantu ab’oli na bo omu businge bakusingwire. Abo ab’orukulya na bo nibaija kukutega ekitimba;Baitu torukwija kukyetegereza.”  8  Yahwe naagamba ati: “Ha kiro eki,Tindihwerekereza ab’amagezi ab’omu Edomu,N’ab’okwetegereza ab’omu kiikaro eky’ensozi ekya Esau?  9  Kandi Iwe Temani, abarwani baawe nibaija kutiina muno,Habwokuba buli omu anyakuli omu kiikaro eky’ensozi ekya Esau naija kwitwa. 10  Habw’akabi aka wahikizeeho mugenzi waawe Yakobbo,Noija kuswazibwa,Kandi noija kuhwerekerezebwa ebiro n’ebiro. 11  Obu wayemeriire ha rubaju,Ha kiro abantu abatamanyirwe obu baatwaire ihe lye omu bunyagwa,N’abanyamahanga obu baataahire omu irembo lye kandi baatoma hali Yerusaalemu,Okeetwaza nka bo. 12  Tosemeriire kusemererwa habw’ekintu ekihikire hali mugenzi waawe ha kiro eky’obujune,Tosemeriire kusemererwa ha kiro eky’okuhwerekerezebwa kw’abantu ba Yuda,Kandi tosemeriire kubabazaaho kubi ha kiro ky’obujune bwabo. 13  Tosemeriire kutaaha omu irembo ly’abantu bange ha kiro eki babeeriiremu omu kabi,Tosemeriire kusemererwa habw’ebizibu ebi bahikireho omu kiro eki babeeriiremu omu kabi,Kandi tosemeriire kukwata ha by’obuguuda byabo omu kiro eki babeeriiremu omu kabi. 14  Tosemeriire kwemerra omu ntangatanganiro z’omuhanda kwita abantu be abatorokere,Kandi tosemeriire kuhayo abantu be abakizireho omu kiro ky’obujune. 15  Baitu ekiro kya Yahwe eky’okurwanisa amahanga goona kiri haihi. Nkooku okozere, na iwe nukwo balikukora. Omulingo otwaizeemu abandi, na iwe nugwo balikutwazaamu. 16  Nkooku onyweriire ha rusozi rwange orurukwera,Amahanga goona nigaija kwikara niganywa. Galinywa, gakubise,*Kandi galisisana nk’agatakabahoga. 17  Baitu abo abalikiraho baliba ha Rusozi Sayuuni,Kandi ruliba orurukwera,Kandi ab’omu nju ya Yakobbo balyegarurra ebintu byabo. 18  Enju ya Yakobbo erifooka omurro,Enju ya Yusufu erifooka orulimi rw’omurro,Kandi enju ya Esau eriba nk’ebisunga.*Nibaija kubahembaho omurro babookye,Kandi busaho n’omu alikiraho omu nju ya Esau,Habwokuba Yahwe weenyini nuwe akigambire. 19  Baliikara omu Negebbu n’omu kiikaro eky’ensozi ekya Esau,Omu Sefera n’omu nsi y’Abafirisiiti. Baliikara omu kicweka kya Efuraimu n’omu kicweka kya Samaliya,Kandi Benyamiini aliikara omu Giriyaadi. 20  Hali abanyagwa abali omu rukomera runu,Abantu ab’omu Isaleeri balitwara ensi ey’Abakanaani kuhikira kimu Zalefaasi. Kandi abanyagwa abali omu Yerusaalemu abakaba nibaikara omu Sefaraadi, balyetwarra embuga za Negebbu. 21  Kandi abajuni balitemba ha Rusozi SayuuniKucwera omusango ekiikaro eky’ensozi ekya Esau,Kandi obukama bulifooka bwa Yahwe.”

Obugambo Obuli Hansi

^ Nirimanyisa “Omuheereza wa Yahwe.”
^ Rundi, “emigarra.”
^ Rundi nikisobora kuhindurwa; “noobu waakuharruka haiguru.”
^ Rundi nikisobora kuhindurwa, “Baakuhwerekeriize ebirukwingana nkaha?”
^ Rundi, “gakubbise; gabbokose.”
^ Rundi “ebisusunga.”

Obujunanizibwa bwaitu ha Kitabu Kinu