Ebbaruha ya Paulo ey’Okubanza Hali Abakolinso 13:1-13
-
Okugonza—omulingo ogurukukira yoona (1-13)
13 Kakuba mbaza omu ndimi ez’abantu n’eza bamalaika baitu ntaine okugonza, nimba nfookere nk’ekide ekirukugamba rundi enjogera ezirukugamba.*
2 Kandi obu ndaaba nyine ekisembo eky’okubaza obunabbi n’okwetegereza ebintu byona ebirukwera, n’okumanya kwona, kandi obu ndaaba nyine okwikiriza okusobora kufurra* ensozi, baitu ntaine okugonza, tinyine mugaso.
3 Kandi kakuba mpayo ebintu byange byona kuliisa abandi, kandi kakuba mpayo omubiri gwange nukwo nsobole kwehaisa, baitu ntaine okugonza, nimba ntarukugasirwa naakake.
4 Okugonza kugumiisiriza kandi kw’embabazi. Okugonza tikuba n’ihali. Okugonza tikwenyumiza, tikwehemba,
5 tikwetwaza kubi,* tikuserra ebyakwo kwonka, tikubiihirwa. Tikwahura enzigu.*
6 Tikusemerererwa ebintu ebitali by’okuhikirra, baitu kusemerererwa hamu n’amananu.
7 Kugumiisiriza ebintu byona, kwikiriza ebintu byona, kunihira ebintu byona, kugumira ebintu byona.
8 Okugonza tikulemwa. Baitu obu haraaba haroho ebisembo eby’okubaza obunabbi, nibiija kuhwaho; obu haraaba haroho endimi,* niziija kuhwaho; obu haraaba haroho okumanya, nikwija kuhwaho.
9 Habwokuba twine okumanya okw’ekicweka kandi tubaza obunabbi obw’ekicweka,
10 baitu ekihikiriire obu kiriija, ekicweka kirihwaho.
11 Obu nkaba ndi mwana, nabazaaga nk’omwana, nateekerezaaga nk’omwana, kandi nayetegerezaaga nk’omwana; baitu hati obu nfookere musaija, ndekere kwetwaza nk’omwana omuto.*
12 Omu kaire kanu niturorra omu ndolerwamu ey’ekyoma ey’etarukuhweza kurungi, baitu omu kasumi akarukwija nitwija kuba niturora kurungi.* Omu kasumi kanu mmanyireho ekicweka, baitu omu kasumi akarukwija, niinyija kumanya byona omu bwijwire,* nkooku na nyowe Ruhanga ammanyire omu bwijwire.
13 Baitu hati, ebintu binu bisatu nibyo bisigaireho: okwikiriza, okunihira, okugonza; baitu ekirukukirayo omu binu nukwo okugonza.
Obugambo Obuli Hansi
^ Nkooku kiri, “ezirukusara.”
^ Rundi, “kusindura.”
^ Rundi, “tikukora ebitasemiire.”
^ Rundi, “Tikwikara nikwijuka ensobi.”
^ Oku nukwo, kubaza endimi omu mulingo gw’ekyamahano.
^ Nkooku kiri, “emiringo ey’omwana omuto.”
^ Nkooku kiri, “maiso h’amaiso.”
^ Rundi, “niinyija kumanya ebihikire.”
