Ekitahikire: Abakaiso ba Yahwe tibaikiririza omu kukozesa emibazi n’okujanjabwa.

 Ekihikire: Tukora kyona ekirukusoboka kurora ngu itwe n’ab’omu maka gaitu twatunga obujanjabi oburukukirayo oburungi. k tuserra badakitaali abaine obukugu bw’okujanjaba rundi kusemeza batarukukozesa esagama. Nitusiima enkurakurana ey’ehikirweho omu by’obujanjabi. Kandi obujanjabi obutarumu kukozesa esagama Abakaiso ba Yahwe obubakira kugonza, hati nibukozesebwa n’okujanjaba abarwaire abandi abatali Bakaiso ba Yahwe. Omu mahanga maingi, buli murwaire n’asobora kucwamu kwetantara ebizibu ebiruga omu kutekwamu esagama nk’obutafaali bw’omubiri kwerwanisa, endwaire ez’omu sagama hamu n’ensobi ezisobora kukorwa badakitaali.

Ekitahikire: Abakaiso ba Yahwe baikiriza ngu kakuba omuntu aba n’okwikiriza nikusobora kumukiza.

 Ekihikire: Titwikiriza ngu kuba n’okwikiriza rundi kusabira omuntu nikisobora kumukiza.

Ekitahikire: Obujanjabi obutarumu kukozesa esagama bwa sente nyingi.

 Ekihikire: Obujanjabi obutarumu kukozesa esagama tibuli bwa sente nyingi. a

Ekitahikire: Abakaiso ba Yahwe baingi otwaliremu n’abaana bafa buli mwaka habw’okwanga kutekwamu esagama.

 Ekihikire: Ago tigali mananu, kandi busaho bwakaiso oburukukisagika. Badakitaali abakugu basemeza abantu emitima, amagufa, rundi babateekamu ebicweka ebibaihire omu bantu abandi batarukukozesa esagama. b Obwire oburukukira obwingi, abarwaire otwaliremu n’abaana abatatekwamu esagama bakira bwangu kukira abo abatekwamu esagama. c Ekindi, busaho muntu asobora kukigumya ngu omurwaire naija kufa habw’okwanga kutekwamu esagama rundi ngu naija kukira kakuba aikiriza kutekwamu esagama.

 Encwamu yabo esigikirra ha Baibuli. Baibuli eturagira kwetantara esagama. (Okubanza 9:4; Ebyabalevi 17:10; Ekyebiragiro 12:23; Engeso Ezabakwenda 15:28, 29) Ekindi, kusigikirra hali Ruhanga, esagama ekikirra obwomeezi. (Ebyabalevi 17:14) Obutwetantara kutekwamu esagama, tuba nitworobera Ruhanga kandi twoleka ngu nitumuteekamu ekitiinisa nk’Ayatuhaire obwomeezi.

 Haroho akasumi abakugu omu by’obujanjabi obubaaroraga obujanjabi obutarumu kukozesa esagama nk’obw’akabi, baitu emyaka nke enyuma entekereza egi ekahinduka. Ekyokurorraho, omu 2004, ekicweka kuruga omu kitabu kimu eky’eby’obujanjabi kikagamba ngu “obujanjabi obutarumu kukozesa esagama Abakaiso ba Yahwe obubakira kugonza nubwo oburakozesebwa omu kasumi ak’omumaiso.” d Omu 2010, ekicweka kuruga omu kitabu Heart, Lung and Circulation kikagamba ngu “‘kusemeza okutarumu kukozesa sagama’ tikusemeriire kukozesebwa h’Abakaiso ba Yahwe bonka, baitu kusemeriire kukozesebwa hali abantu boona.”

 Omu nsi yoona, badakitaali baingi bakozesa emiringo endi ey’etarumu kukozesa esagama obubaba nibasemeza. Emiringo enu n’ekozesebwa n’omu mahanga agakurakuraine kandi abarwaire baingi abatali Bakaiso ba Yahwe nabo niyo barukugonza.