Mubara muta omuhendo gw’Abakaiso ba Yahwe?

 Ababarwa nk’Abakaiso ba Yahwe, nubo abo bonka abeejumbira omu kutebeza amakuru amarungi ag’Obukama bwa Ruhanga buli kwezi. (Matayo 24:14) Banu nibatwarramu abo ababatiziibwe nk’Abakaiso ba Yahwe, hamu n’abo abatakabatiziibwe, baitu abaikiriziibwe kutebeza.

Omuntu asemeriire kubanza kuhayo sente kusobora kufooka omu h’Abakaiso ba Yahwe?

 Nangwa. Kuhayo sente tikisobora kuleetera omuntu kubarwa nk’omu h’Abakaiso ba Yahwe rundi kutunga obujunaanizibwa bwona omu kitebe kyaitu. (Ebikorwa 8:18-20) Amananu gali ngu, sente ezirukukira obwingi eziheebwayo titumanya nooha ow’azihaireyo. Buli omu h’Abakaiso ba Yahwe, ahayo obwire bwe, amaani ge, n’ebintu bye kusagika omulimo ogurukukorwa omu nsi yoona ayegondiize kusigikirra nkooku arukugonza n’eki arukusobora.—2 Abakolinso 9:7.

Mumanya muta abantu abarukwejumbira omu kutebeza?

 Buli kwezi, Abakaiso ba Yahwe boona bahayo hali ekitebe eki barumu ripooti ey’okutebeza. Kinu bakikora beegondiize kandi batahambiriziibwe.

 Ripooti eziheebwayo zisoroozebwa, ziteeranizibwa hamu kandi omuhendo gwona hamu gusindikwa ha ofiisi y’itaagi ey’omu kiikaro eki. Ofiisi y’itaagi esindika ha kitebe ekikuru eky’ensi yoona omuhendo oguteeraniziibwe hamu ogwabuli ihanga rundi ekicweka.

 Ha kumalirra okwa buli mwaka ogw’obuheereza, a omuhendo ogw’Abakaiso ba Yahwe abali omu buli nsi omu mwaka ogu nubwo gumanywa. Emihendo enu eteeranizibwa hamu kumanya Abakaiso ba Yahwe boona abali omu nsi yoona. Buli mwaka, haturukibwa ripooti kuruga omu buli ihanga kandi eteekwa ha mukura gwaitu hansi y’ekicweka “Around the World.” Ripooti zinu zitugarramu amaani, nkooku zaagarwiremu amaani Abakristaayo ab’omu kyasa eky’okubanza.—Ebikorwa 2:41; 4:4; 15:3.

Mubara abo abaija omu nsorrokano baitu batali batebezi?

 Noobu kiraaba ngu abantu nk’abo titubabarra omu muhendo gw’Abakaiso ba Yahwe, tubatangirra omu nsorrokano zaitu. Baingi hali bo baija ha Kwijuka okufa kwa Kristo okubaho buli mwaka, nahabweki omuhendo gwabo tugumanya obu tukwata omuhendo gw’abo ababa baizire, nitwihaho ogw’Abakaiso ba Yahwe. Omu mwaka 2025, abo abaizire ha Kiijukyo bakaba 20,635,015.

 Baingi abataija omu nsorrokano zaitu, bagasirwa omu nteekaniza ey’okwegesa abantu Baibuli omu maka gaabo etali y’okusasurra sente. Omu mwaka 2025, tukeega Baibuli n’abantu abarukuhika 7,603,182 buli kwezi, kandi ha kwega oku, obwire obumu haabahoga n’abantu abarukukira hali omu.

Habwaki gavumenti ziba n’omuhendo gw’Abakaiso ba Yahwe ogurukukira ha gwanyu?

 Ekitongole kya gavumenti ekirukujunaanizibwa n’okubara abantu, kicwamu omuhendo kuraba omu kukaguza abantu ediini nambere bakira kuramiza. Ekyokurorraho, ekitongole ekirukujunaanizibwa n’okubara abantu omu ihanga lya Amerika (U.S. Census Bureau) kikagamba ngu kicwamu omuhendo gw’abantu abali omu diini “kusigikirra h’abantu abarukugiramizaamu omu kicweka eki.” Baitu kyongera kigamba ngu omuhendo ogu “nigusigikirra hali eki abantu eki barukugamba hatali ha muhendo gwonyini ogw’abahondezi baayo.”[14] Kwahukana hali eki, itwe abantu aba tubara nk’Abakaiso ba Yahwe nubo abo bonka abeejumbira omu kutebeza kandi bakahayo ripooti erukukwata ha kutebeza kwabo hatali abo abagamba bugamba ngu bali Bakaiso ba Yahwe.