Nhlamulu ya Bibele

 Ina! Bibele li ta hi ka “Xikwembu lexi tiyisaka lava nga tshoveka timbilu”. (2 Vakorinto 7:6) Hambileswi Bibele li kalaka li nga li buku leli vulavulaka hi mavabyi ya nhloko, se li pfune vanhu va vanyingi swaku va nga pimisi hi ku tisunga. Leswi li swi vulaka swi nga ku pfuna.

•  I mpsini leswi Bibele li swi vulaka leswi u nga swi tirhisaka?

•  Bibele la vulavula hi vanhu lava a va lava ku fa?

•  Hi tini tindzimana ta Bibele leti nga ku pfunaka swaku u nga pimisi hi ku tisunga?

•  U nga yendla yini loko munghanu wa wena a ku: “Ni lava ku fa”?

•  Ni nga yendla yini loko ni tshame ni zama ku tisunga?

 I mpsini leswi Bibele li swi vulaka leswi u nga swi tirhisaka?

• ● Vulavula hi leswi u titwisaka xiswona.

   Leswi Bibele li swi vulaka: “Munghanu wa ntiyiso a ni lirhandzu minkama hinkwayu, i makwenu wa ntiyiso loko u li ku karhatekeni.” — Swivuriso 17:17.

   Ndzimana leyi yi vula yini? Hinkwerhu hi lava ku pfuniwa loko hi lwisana ni mimpimiso ya ku biha.

   Loko u nga vulavuli ni van’wani hi leswi u titwisaka xiswona, swi ta ku karhatela ku lwisana ni mimpimiso ya ku biha leyi u nga na yona. Kambe loko u vulavula ni munghanu, mimpimiso ya ku biha leyi u nga na yona a yi nga ha ta va ni matimba. Naswona swi nga yendleka u txintxa ni mapimiselo ya wena.

   Zama ku yendla leswi: Namuntlha, bula ni xaka la wena kumbe munghanu wa wena lweyi u mu tshembaka. a U nga tlhela u tsala ka papela leswi u titwisaka xiswona.

• ● Lavetela ku pfuniwa hi dotori.

   Leswi Bibele li swi vulaka: “Vanhu lava nga kahle a va lavi dotori kambe dotori a laviwa hi lava vabyaka.” — Matewu 9:12.

   Ndzimana leyi yi vula yini? Hi fanele hi lava ku pfuniwa hi dotori loko hi vabya.

   Ku pimisa hi ku tisunga swi nga ha vangiwa hi mavabyi ya nhloko kumbe swin’wani. Ku fana ni leswi ku vabya swi kalaka swi nga danisi, munhu a nga fanelanga a dana loko a pimisa hi ku tisunga hikusa mavabyi ya nhloko na wona ma dahiwa.

   Zama ku yendla leswi: Kombela ku pfuniwa hi dotori lweyi a tivaka mavabyi ya wena loko swi koteka.

• ● Khumbuka swaku Xikwembu xi ni mhaka na wena.

   Leswi Bibele li swi vulaka: “A 5 wa swinyanyani swaswitsongo a swi xavisiwi hi masentavhu mambirhi ke? Kambe Xikwembu a xi khohlwi ni xin’we xa swona. . . . Mi nga chaveni; n’wina mi va lisima ku tlula swinyanyani swa swinyingi swaswitsongo.” — Luka 12:6, 7.

   Ndzimana leyi yi vula yini? U wa lisima hintamu ka Xikwembu.

   Swi nga yendleka u pimisa swaku vanhu a va na mhaka ni leswi u titwisaka xiswona kambe Xikwembu xa swi vona leswi swi ku yendlekelaka. Xi ni mhaka na wena hambiloko u pimisa hi ku tisunga. Tipisalema 51:17 yi li: “U nga yi tshiki mbilu leyi nga tshoveka yi tlhela yi pfotloseka Xikwembu xa mina.” Xikwembu xi lava swaku u hanya hikusa xa ku rhandza.

   Zama ku yendla leswi: Vona leswi Bibele li swi vulaka leswi kombisaka swaku Xikwembu xa ku rhandza. Hi xikombiso, lerha ndzima 24 ya buku leli nge: Tshinela Eka Yehovha.

• ● Khongela ka Xikwembu.

   Leswi Bibele li swi vulaka: ‘Txukumetelani ku vilela ka n’wina hinkwaku ka xona, hikusa xi ni mhaka na n’wina.’ — 1 Pedru 5:7.

   Ndzimana leyi yi vula yini? Xikwembu xi lava u xi byela leswi u titwisaka xiswona ni leswi swi ku karhataka.

   Xikwembu xi nga ku yendla swaku u va ni ku rhula u tlhela u kuma ntamu. (Vafilipiya 4:6, 7, 13) Hi leswi xi va pfunisaka xiswona lava khongelaka ka xona hi mbilu hinkwayu. — Tipisalema 55:22.

   Zama ku yendla leswi: Khongela ka Xikwembu namuntlha, u tirhisa vito la xona ku nga Yehovha. Xi byeli leswi u titwisaka xiswona. (Tipisalema 83:18) Kombela swaku xi tama xi ku pfuna ku lwisana ni mimpimiso ya ku biha.

• ● Pimisa hi leswi Bibele li vulaka swaku swi ta yendleka ka nkama lowu taka.

   Leswi Bibele li swi vulaka: “Hi ni ntshembo lowu, wu fanaka ni nsimbi ya wutomi la hina; wu tiyile naswona wa tshembeka”. — Vaheberu 6:19.

   Ndzimana leyi yi vula yini? Leswi u titwisaka xiswona swi nga ha txintxatxintxa ku fana ni boti leli biwaka hi moya alwandle. Kambe leswi Bibele li hi tshembisaka swona swi nga ku pfuna swaku u tiya.

   Ntshembo wolowo a hi ku lorha hikusa i xitshembiso lexi taka hi ka Xikwembu xa ku helisa hinkwaswu leswi swi hi yendlaka hi hlupheka. — Nhlawutelo 21:4.

   Zama ku yendla leswi: Djondza swin’wani hi leswi Bibele li hi tshembisaka swona. Lerha djondzo 5 ka broxura leli nge: Mahungu Yotsakisa Lamataka hi ka Xikwembu!

• ● Yendla swilo leswi u swi rhandzaka.

   Leswi Bibele li swi vulaka: “Mbilu leyi nga tsaka i murhi wawunene”. — Swivuriso 17:22.

   Ndzimana leyi yi vula yini? Ku yendla swilo leswi hi tsakisaka swi nga hi yendla hi va ni wutomi lalinene.

   Zama ku yendla leswi: Yendla swilo leswi u swi rhandzaka. Hi xikombiso, u nga yingisela tinsimu leti u tirhandzaka, ku lerha minchumu leyi nga ku tiyisaka kumbe u hungata hi swilo swin’wani leswi ku tsakisaka. Xin’wani lexi nga ta ku yendla u tsaka i ku pfuna van’wani hambiloko wo va pfuna hi swilo swaswitsongo. — Mintirho 20:35.

• ● Tihlayisi.

   Leswi Bibele li swi vulaka: “Ku trenarisa muzimbha swa pfunanyana”. — 1 Timotiya 4:8.

   Ndzimana leyi yi vula yini? Ku hamba ma ezersisiyu, ku yetlela nkama wawunene swaku hi humula ni ku dla swakudla swaswinene swi nga hi pfuna.

   Zama ku yendla leswi: Yendla ma ezersisiyu hi ku fambanyana mpfhuka hambi swo va swa 15 minutu.

• ● Khumbuka swaku leswi u titwisaka xiswona ni leswi ku yendlekelaka swa txintxa.

   Leswi Bibele li swi vulaka: “[N’wina] a mi swi tivi swaku wutomi la n’wina li ta tshamisa ku yini mundzuku.” — Yakobe 4:14.

   Ndzimana leyi yi vula yini? Xikarhatu xaxikulu hambi lexi u pimisaka swaku a xi nge lunghisiwi swi nga yendleka xi va xa nkamanyana.

   Hambiloko swikarhatu leswi u kumanaka na swona swi li swikulu ku fikela kwini, swi nga ha txintxa hi ku famba ka nkama. Hi mhaka leyo zama ku lwisana na swona. (2 Vakorinto 4:8) Swi nga ha yendleka swikarhatu swaswikulu leswi u kumanaka na swona swi txintxa hi ku famba ka nkama kambe loko u tisunga a swa ha txintxi.

   Zama ku yendla leswi: Ka Bibele, lerha hi switoriya swa vanhu lava nga hela ntamu va za va navela ku fa. Tlhela u vona swaku wutomi la vona li txintxise ku yini hi ku famba ka nkama naswona minkama ya yinyingi hi tindlela ta ku a va nga ti pimisi. Vona swikombiso swin’wani.

 Bibele la vulavula hi vanhu lava a va lava ku fa?

 Ina. Bibele li vulavula hi vanhu lava nga te: “Ni lava ku fa.” Xikwembu a xi va solanga kambe xi va pfunile. Na wena xi nga ku pfuna.

Eliya

•  ● A ku li mani Eliya? Eliya a ku li muprofeta lweyi a a nga chavi nchumu. Kambe minkama yin’wani a hele ntamu. Yakobe 5:17 yi li: “Eliya a a li munhu wa ku fana na hina”.

•  ● Hi mhaka muni a a lava ku fa? Ku ve ni nkama lowu Eliya a nga titwa na a li yexe, na a chava funtshi na a nga li wa nchumu. A kombele Yehovha a ku: “Yehovha Xikwembu xa mina, ni kombela u ni dlaya”. — 1 Tihosi 19:4.

•  ● I mpsini swi nga mu pfuna? Eliya a byele Xikwembu leswi a a titwisa xiswona. Xikwembu xi mu tiyisise ku yini? Xikwembu xi kombise swaku xi ni mhaka na Eliya hi ku mu komba matimba ya xona. Xikwembu xi tlhele xi mu byela swaku a a li wa lisima, xi tlhela xi mu nyika mupfunisi wamunene.

•  ▸ Lerha leswi nga yendlekela Eliya ka: 1 Tihosi 19:2-18.

Yobo

•  ● A ku li mani Yobo? Yobo a a li wanuna wa ku ganya lweyi a a ni ndjangu wawukulu naswona a a tirhela Xikwembu xa ntiyiso hi ku tshembeka.

•  ● Hi mhaka muni a a lava ku fa? Wutomi la Yobo li txintxile swa kola na kola naswona ku yendleke minchumu ya yinyingi ya ku biha. A luze hinkwaswu leswi a a li na swona. Vana va yena va file ka xidzedze naswona a ve ni mavabyi ya ku chavisa. A tlhele a lumbetiwa swaku hi yena a a ni nandzu hi mhaka ya swikarhatu leswi a a kumana na swona. Yobo a te: “Na li nyenya wutomi la mina; a na ha swi lavi ku tama ni hanya.” — Yobo 7:16.

•  ● I mpsini swi nga mu pfuna? Yobo a khongele ka Xikwembu a tlhela a vulavula ni vanhu van’wani. (Yobo 10:1-3) A tiyisiwe hi munghanu wamunene ku nga Elihu, lweyi a nga mu pfuna ku vona swilo hi ndlela yayinene. Xa lisima hintamu, a pfumelile ku pfuniwa hi Xikwembu.

•  ▸ Lerha leswi nga yendlekela Yobo ka: Yobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moxe

•  ● A ku li mani Moxe? Moxe a a li murhangeli wa Vayisrayele ni muprofeta wa ku tshembeka.

•  ● Hi mhaka muni a a lava ku fa? Moxe a a ni ntirho wa wunyingi swaku a wu yendla naswona lava a a va rhangela a va tshamela ku mu solasola, se leswo a swi mu heta ntamu. Hi mhaka leyo a byele Xikwembu a ku: “Ni kombela u ni dlaya swoswi.” — Tinhlayo 11:11, 15.

•  ● I mpsini swi nga mu pfuna? Moxe a byele Xikwembu leswi a a titwisa xiswona. Xikwembu xi pfune Moxe hi ku mu pumbela ntirho, se leswo swi yendle swaku a nga ha karhateki.

•  ▸ Lerha leswi nga yendlekela Moxe ka: Tinhlayo 11:4-6, 10-17.