LESWI A NI HANYISA XISWONA:

Hi lembe la 1949, papayi wa mina a rhurhe Alemanha a ya tshama Austrália leswaku a ya lavetela ntirho amugodini ni ka ma empreza ya ghezi. A a tshama antlhaveni aVictoria, lani a nga chada ni mamani wa mina. Mina ni psaliwe hi 1953.

Loko ku hundze malembenyana, mamani wa mina a sungule ku djondza Bibele ni Timboni ta Yehovha hi mhaka leyo ni sungule ku twa switoriya swa Bibele na na ha li mutsongo hintamu. Kambe papayi a a nyenya wukhongeli hinkwalu. A a karhata naswona a a banana funtshi mamani wa mina a a mu chava hintamu. Kambe a a tama a djondza Bibele na swi nga tiviwi hi munhu funtshi a a swi rhandza leswi a a swi djondza. Loko papayi a nga li kaya mamani a a ni djondzisa Bibele mina ni makwenu wa mina wa xisati. A a hi byela swaku misava yi ta va paradesi ni swaku hi ta hanya hi tsakile loko hi yendla leswi Bibele li vulaka swona. — Tipisalema 37:10, 29; Esaya 48:17.

Nkama ni nga tlhanganisa 18 wa malembe, ni sukile kaya hi mhaka ya leswi papayi a a banana. A ni swi kholwa leswi mamani a a ni djondzisa swona hi Bibele kambe a ni nga swi nyiki lisima. Hi mhaka leyo a ni yendlanga swilo swaswinene. Ni kume ntirho wa ku va eletresixta ka mugodi wa makhala. Nkama ni nga tlhanganisa 20 wa malembe ni chadile, naswona loko se ku hundze malembe manharhu ku psaliwe n’wana wa mina wa ku sungula wa ntombhi. Hi nkama wolowo ni pimisile hi swilo swa lisima ka wutomi la mina. A ni swi tiva swaku Bibele li nga wu pfuna ndjangu wa mina, hi mhaka leyo ni sungule ku djondza Bibele ni Timboni ta Yehovha. Nsati wa mina a kwate hintamu. Siku leli ni nga ya mintlhanganwini, nsati wa mina a ni byele swaku ni fanele ni yendla xiboho: Ku tama ni djondza Bibele kumbe ndjangu. Ni lange ndjangu, hi mhaka leyo ni tshike ku djondza Bibele ni Timboni ta Yehovha. Kambe hi ku famba ka nkama ni tisolile hileswi ni nga tshika ku djondza hikusa a ni swi tiva leswaku hi swona leswi a swi li swa lisima swinene.

Siku lin’wani na ni li ntirhweni, vakolega va mina va ni kombe pornografiya. A ni swi navela hintamu ku vona pornografiya kambe a swi ni nyenyentsa. Loko ni li vona a ni titwa nandzu hikusa a ni khumbuka swaku Bibele a li djondzisa leswaku vanhu lava va yendlaka leswo a va ta khatisiwa. Kambe loko ni vona pornografiya, a swi ni yendla ni navela ku tama ni li vona funtshi a ni nga ha titwi nandzu. Hi ku famba ka nkama ni ve ni vhisiyu la pornografiya.

Ka 20 wa malembe lawa ma nga landzela, ni tame ni tihambanisa hintamu ni leswi mamani wa mina a a ni djondzise swona. Swilo leswi a ni swi sixtira swi sungule ku txintxa mahanyelo ya mina. Se a ni rhuketela, ni tlhela ni vulavula minchumu ya nsila. A ni nga ha na mavonelo ya kahle hi masangu. Hambileswi a a ni chadile, a ni mbuyeta ni vanhu van’wani. Siku lin’wani ni titxuvukile ka xipelhu ni gama ni ku: ‘Na tinyenya.’ A ni nga ha tihloniphi funtshi a ni tivonela hansi.

Mina ni nsati wa mina hi tshikanile, funtshi wutomi la mina a li nga fambi kahle. Se ni khongelile ni byela Yehovha leswi a swi li ka mbilu ya mina. Loko se ku hundze 20 wa malembe, ni tlhele ni sungula ku djondza Bibele. Papayi wa mina se a a file kambe mamani wa mina se a a tsakamisiwile a va Mboni ya Yehovha.

LESWI BIBELE LI NGA LI TXINTXISA XISWONA WUTOMI LA MINA:

A ku ni ku hambana kakukulu ka leswi a ni hanyisa xiswona ni leswi Bibele a li swi djondzisa. Kambe ni yendle xiboho xa ku kuma ku rhula ka mimpimiso loku Bibele li ku tshembisaka. Se ni zame ku tshika ku rhuketela ni ku vulavula minchumu ya nsila naswona ni tshike ku karhata. Ni yendle xiboho xa ku tshika wuntunga la swa masangu, ku bedja, ku dakwa ni ku yivela patrao wa mina.

Lava a ni tirha na vona a va nga swi twisisi swaku hi mhaka muni a ni lava ku txintxa awutomi la mina. Va hete malembe manharhu na va ni xengetela swaku ni tlhelela ka wutomi la mina la khale. Minkama yin’wani a ni phazama, hi xikombiso a ni kwata hintamu ni tlhela ni rhuketela. Loko leswo swi yendleka, a va tsaka va gama va ku: “Ya! Joe lweyi hi mu tivaka hi lweyi.” Leswo a swi ni vavisa hintamu! Hikusa a ni titwa na ni nga pfuni nchumu.

Loko ni li ntirhweni a ni nga swi koti ku balekela pornografiya, a li kumeka ka tindhawu hinkwatu ka matelefoni, ka makomputadori ni ka mabuku. Vakolega va mina a va rhumelana mafoto ya pornografiya, na mina khale a ni yendla swoleswo. A ni zama ku tshika a vhisiyu la pornografiya, kambe vakolega va mina a va yendla hinkwaswu swaku ni nga li tshiki. Ni kombele lweyi a ni djondza na yena Bibele leswaku a ni pfuna. A a ni yingisela funtshi a a ni lehisela mbilu loko ni vulavula na yena. A tirhise Bibele swaku a ni komba leswi ni nga swi yendlaka swaku ni hlula ku vona pornografiya. Naswona a ni byele swaku ni kombela ku pfuniwa hi Yehovha ni ku khongela nkama ni nkama. — Tipisalema 119:37.

Siku lin’wani ni ntlhanganise vakolega va mina, se ni va kombela swaku va nyika byala vakolega vambirhi lava a va li swidakwa funtshi a va zama ku tshika ku phuza byala. Va ni kwatelile va ku: “Wo hlanya? A wu swi voni swaku va zama ku tshika ku phuza byala?” Se ni va hlamulile ni ku: “Na mina ni zama ku tshika ku sixtira a pornografiya.” Phela ku sukela kolanu, va swi twisisile swaku ni zama ku tshika ku sixtira a pornografiya funtshi a va ha zanga va ni sindzisa leswaku ni li sixtira.

Hi ku pfuniwa hi Yehovha, hi ku famba ka nkama ni swi kotile ku tshika ku sixtira a pornografiya. Ni tsakamisiwile hi 1999 ni va Mboni ya Yehovha, naswona na mu khensa hileswi a nga ni nyika mukhandlu wa ku va ni wutomi la ku tsakisa ni wutomi lalinene.

Swoswi se na swi vona swaku hi mhaka muni Yehovha a nyenya swilo leswi mina a ni swi rhandza. Yehovha i Xikwembu xa lirhandzu naswona a lava ku hi vhikela ka swikarhatu leswi vangiwaka hi ku sixtira a pornografiya. Hi fanele hi tshemba marito lawa ma nga ka Swivuriso 3:5, 6 lawa ma nge: “Tshemba Yehovha hi mbilu ya wena hinkwayu, u nga tshembi ku twisisa ka wena n’winyi. Mu tivisi tindlela ta wena hinkwatu, kutani yena a ta lulamisa tindlela ta wena.” Ku tirhisa leswi Bibele li swi djondzisaka swa ni vhikela swi tlhela swi ni pfuna swaku ni va ni wutomi la ku tsakisa. — Tipisalema 1:1-3.

MINKATEKO LEYI NI NGA YI KUMA:

Phela khale a ni tinyenya, kambe swoswi ni ni ku rhula funtshi na tihlonipha. Ni hanya wutomi la kahle funtshi na swi vona swaku Yehovha a ni rivalelile naswona wa ni pfuna. Hi 2000, ni chade na Karolin, wansati wa ku saseka lweyi a rhandzaka Yehovha ku fana na mina. Kaya ka hina hi hanyisana hi ku rhula, naswona ha tsaka hi ku lumba ndjangu wa misava hinkwayu wa vanhu lava nga ni lirhandzu ni ku rhula.