WUTOMI LA MINA LA KHALE:

Vapsali va mina a va ni masimu aGalícia, aEspanha. A va ni 8 wa vana se mina a ni li wa wu 4 ka vona. Hi nkama wolowo aEspanha a swi tolovelekile swaku n’wana mun’we ka ndjangu a ya seminário kumbe a ya tshama ka ndhawu leyi a ku tshama va irmã va katolika, se ka ndjangu wa hina ku fambe vana vanharhu ku patsa na mina.

Loko ni yendle 13 wa malembe mina ni makwerhu wa xisati hi ye lani a ku tshama va irmã va katolika aMadri. Ka ndhawu leyo wutomi la kona a li nga tsakisi, a ku nga na xinghanu a ko va ni minawu ni swikhongelo ntsena. Nimixo a hi tlhangana akapela swaku hi ya pimisa kambe mina a ni nga koti ku pimisa nchumu, a hi gama hi yimbelela hi tlhela hi yendla misa hi xiLatin. Mina a ni nga twisisi nchumu naswona a ni titwa na ni li kule ni Xikwembu. Masiku ya mina hinkwawu a ni tshama ni miyelile, hambiloko ni tlhangana ni makwerhu wa mina a ho xowetana ntsena hi ku: “A ku dzunisiwi Mariya” naswona a ho pfumeleliwa ku bula 30 minutu ntsena loko hi gama ku dla. Leswo a swi hambanile hintamu ni wutomi la ku tsakisa leli a ni li na lona ni ndjangu wa mina a kaya, a ni titwa ni li noxe naswona a ni rila hintamu.

A ni nga tshami ni titwa na ni li kusuhi ni Xikwembu hambileswo ni ve irmã wa katolika na ni ni 17 wa malembe. A no yendla leswo ntsena hileswi a va ni byela swaku ni swi yendla, kambe a ni tivutisa swaku hikakunene Xikwembu xi ni langile? Naswona va irmã lava a va hi rhangela a va ni byela swaku loko ni kanakana hi leswo ni ta hisiwa hi ndzilu wa ku kala wu nga heli loko ni fa. Hambileswo a ni tama ni kanakana, a ni swi tiva swaku Yesu Kreste a a nga tshami na a titwa a li yexe hikusa a a heta nkama wa yena na a djondzisa vanhu a tlhela a va pfuna. (Matewu 4:23-25) Loko ni yendle 20 wa malembe se a ni lunghekile ku tshika ku va irmã wa katolika. Lexi xi nga ni hlamalisa hi swaku a irmã wamukulu wa kona a ni byele swaku loko ni kanakana a swi yampsa ni suka hi ku hantlisa. Ni pimisa swaku a ni byele leswo hikusa a a chava swaku ni van’wani va nga sungula ku kanakana ku fana na mina, hi mhaka leyo ni suke ni famba.

Nkama ni nga fika kaya vapsali va mina va ni yamukelile hi lirhandzu,  kambe leswi a swi karhata ku kuma ntirho lani a hi tshama kona, ni suke ni ya tshama ni makwerhu aAlemanha. Yena a a li ka ntlawa wa va comunista va tiko la Espanha. Mina a ni titwa kahle hi ku va ka ntlawa wa lava a va lwela timfanelo ta vatirhi ni ta vavasati, hi mhaka leyo ni nghene ka ntlawa lowu ni gama ni chada ni wanuna lweyi na yena a a lumba ntlawa lowu. A ni pimisa swaku a ni yendla swaswinene hi ku nyiketela vanhu mabuku lawa a ma vulavula hi wu comunista ni tlhela ni seketela switereka.

Kambe ni tlhele ni titwa na swi nga ni pfuni hi nchumu leswi a ni swi yendla. Ni vone swaku va comunista a va nga swi yendli leswi a va swi chumayela, leswo swi tikombe hintamu hi 1971 nkama vanhu van’wani va ntlawa wa wu comunista va nga hisa ndhawu leyi a ku tirha munyimeli wa tiko la Espanha ka doropa la Frankfurt. Va yi hise hileswi a va nyenya minchumu ya ku biha leyi tiko la Espanha a li yi yendla kambe mina a ni kholwa swaku ku yendla leswo a ku nga li ndlela yayinene ya ku lwela timfanelo leti a hi ti lava.

Loko ni psale n’wana wa ku sungula ni byele nuna wa mina swaku a ni nga ha ta ya ka mintlhanganu ya wu cominista. A ni titwa ni li noxe hikusa a ku tanga hambi hi wa mun’we wa ntlawa wa wu comunista swaku a ta hi pfuxela nkama ni nga psala. A ni tivutisa swaku hi hanyela yini ni swaku a swi pfuna ku tikarhatela ku yampsisa minchumu?

BIBELE LI TXINTXE WUTOMI LA MINA:

Hi 1976 nuna na nsati va nga Timboni ta Yehovha va tile kaya va ta ni nyika mabuku ya ku djondza hi wona naswona ni pfumelile. Nkama va nga ta kaya ka wumbirhi ni sungule ku va yendla swivutiso swa swinyingi hi wubihi, xikheto ni wukanganyisi. Swi ni hlamalisile nkama va nga hlamula swivutiso swa mina kinkwaswu hi ku tirhisa Bibele, hi mhaka leyo ni pfumelile ku djondza Bibele.

Nkama ni nga sungula ku djondza a no lava ku kuma wutivi ntsena. Kambe minchumu yi sungule ku txintxa nkama mina ni nuna wa mina hi nga sungula ku ya ka mintlhanganu ya Timboni ta Yehovha ka Yindlo ya Wugandzeli. Hi nkama wolowo se a hi ni vana vambirhi, vamakwerhu a va ta va ta hi teka kaya naswona ni loko hi li mintlhanganwini a va hi pfuna ku vonelela vana. Leswo swi ni yendle ni sungula ku rhandza Timboni ta Yehovha.

Hambileswo a na ha ni ku kanakana. Se ni game ni famba ni ya pfuxela ndjangu wa mina aEspanha. Tiyu wa mina wa padri a zame ku ni godolisa swaku ni tshika ku djondza Bibele, kambe Timboni ta Yehovha leti a ti tshama ka tiko loleliyani ti ni pfune hintamu. Ti tirhise Bibele swaku ti hlamula swivutiso swa mina hinkwaswu ku fana ni Timboni ta Yehovha ta Alemanha, hi mhaka leyo nkama ni nga tlhela Alemanha ni tlhele ni lava ku sungula ku djondza Bibele kambe nuna wa mina a a nga swi lavi ku djondza, hambileswo mina a ni tshikanga naswona hi 1978 ni tsakamisiwile ni va Mboni ya Yehovha.

NI PFUNEKISE KU YINI:

Ku djondza ntiyiso lowu nga ka Bibele swi ni pfunile ku vona swaku ni hanyela yini. Hi xikombiso buku la 1 Pedru 3:1-4 li li vavasati “tivekeni hansi” ka vanuna va n’wina mi va “ni xihlonipho” xaxikulu naswona “mi vevuka, ku nga mpahla ya ku kala yi nga wonheki ni leyi nga ya lisima swinene ka Xikwembu.” Minawu ya Bibele yi ni pfune ku va wansati wamunene ni mamani wamunene.

Se ni ni 35 wa malembe na ni li Mboni ya Yehovha. Ni tsaka hintamu hi leswi ni tirhelaka Xikwembu ni vana va mina va 4 ni vamakwerhu va misava hinkwayu.