INDJHE XIKWEMBU XI NI MHAKA NI KU HLUPHEKA KA HINA?

Michele: Wo yini Sofia?

Sofia: Ni kona Michele.

Michele: Swa tsakisa ku kuma kaya, ka khambi la wugamu ni nga ta lani hi bule hi swaku Xikwembu a xi tsaki loko xi hi vona na hi hlupheka. a U te i khale na u kanakana hi mhaka leyi ngopfungopfu nkama mamani wa wena a nga ve ni nghozi ya movha. Se o yini mamani wa wena?

Sofia: Swa ha mu karhatelanyana, kambe namuntlha a bom.

Michele: Na tsaka ku tiva swaku se swa yampsa, phela swi nga yendleka swi mu karhatela ku va ka xiyimu lexo.

Sofia: Impela. Minkama yin’wani na tivutisa swaku a ta hlupheka anze siku muni.

Michele: Swa twala ku titwisa xileswo. Ni khumbuka swaku ka khambi la wugamu ni ku tshembise swaku hi ta tirhisa Bibele swaku hi tiva swaku hi mhaka muni Xikwembu xi pfumelela ku hlupheka na xi ni matimba ya ku ku helisa.

Sofia: Ina! Na khumbuka.

Michele: Kambe na hi nge se na hlamula mhaka leyi a hi khumbuke tipontu ta lisima leti hi nga bula hi tona ka khambi la wugamu.

Sofia: Hiswona.

Michele: Ku sungula hi vone swaku ka Bibele ku ni wanuna wa ku tshembeka lweyi a nga vutisa swaku hi mhaka muni Xikwembu xi pfumelela ku hlupheka, naswona Xikwembu a xi zanga xi mu kwatela hileswi a nga vutisa leswo naswona a xi zanga xi vula swaku a nga na lipfumelo.

Sofia: Ina, a ni nga swi tivi leswo.

Michele: Funtshi hi vone swaku Yehovha Xikwembu a nga tsaki loko a hi vona na hi hlupheka. Hi xikombiso, Bibele li li nkama vanhu va Xikwembu a va hlupheka na xona ‘a xi hlupheka’.  b A swi hi tiyisi ku tiva swaku Xikwembu xa vaviseka loko xi hi vona na hi hlupheka?

Sofia: Ina, swa hi tiyisa.

Michele: Hi wugamu hi vone swaku hi mhaka ya leswi Xikwembu xi nga ni matimba, xi nga swi kota ku helisa ku hlupheka nkama wun’wani ni wun’wani.

Sofia: Hi lanu ni kalaka ni nga swi twisisi. Hi mhaka muni Xikwembu xi tshika vanhu va hlupheka na xi ni matimba ya ku helisa ku hlupheka?

I MANI LWEYI A A VULA NTIYISO?

Michele: Hi nga twisisa swaku hi mhaka muni Xikwembu xi pfumelela ku hlupheka loko hi lerha buku la ku sungula la Bibele, ku nga Genesa. Wa xi tiva xitoriya xa Adamu na Evha ni handzu lowu a wu tsimbisiwa?

Sofia: Na xi tiva, ni xi djondze kerekeni. Ku ni handzu lowu Xikwembu xi nga va byela swaku va nga dli kambe va game va wu dla hi nkanu.

Michele: Hiswona! Swoswi a hi vone swaku i mpsini leswi nga yendla swaku Adamu na Evha va djoha. Phela leswi va nga swi yendla swi nga hi pfuna ku twisisa swaku hi mhaka muni hi hlupheka. Ni kombela u lerha ka buku la Genesa ndzima 3 ndzimana ya 1 ku ya ka 5.

Sofia: Ina. “Nyoka a yi tlharihe ngopfu ku tlula swiharhi hinkwaswu leswi Yehovha Xikwembu a nga swi yendla. Se yi byela wansati yi ku: ‘I ntiyiso swaku Xikwembu xi mi tsimbisile ku dla mihandzu ya minsinya hinkwayu leyi nga ka jardim?’ Wansati a hlamula nyoka a ku: ’Mihandzu ya minsinya leyi nga ka jardim hi nga dla. Kambe mihandzu ya nsinya lowu wu nga xikarhi ka jardim, Xikwembu xi te: “Mi nga tshuki mi yi dla naswona mi nga tshuki mi yi khumba; hikusa loko mo yi dla mi ta fa”’. Se nyoka yi byela wansati yi ku: ’Leswo a hi ntiyiso, a mi nga ta fa.’”

Michele: Khanimambu. Swoswi a hi bule hi tindzimana leti. Ku sungula hi vone swaku nyoka yi vulavule na Evha. Tindzimana tin’wani ta Bibele ti kombisa swaku lweyi a a vulavula na Evha hi ku tirhisa nyoka i Sathana. c Sathana a vutise Evha swaku Xikwembu a xi te yini hi nsinya. Xikwembu xi te a ku ta yendleka yini loko a vo dla mihandzu ya nsinya lowu?

Sofia: A va ta fa.

Michele: Hi swoleswo. Sathana a game a lumbeta Xikwembu. A te: “Leswo a hi ntiyiso, a mi nga ta fa.” Hi ku hlaya leswo Sathana a a vula swaku Xikwembu i muhembi!

Sofia: A ni nga se tshama ni swi twa leswo.

Michele: Swa hlamalisa, a hi swona? Nkama Sathana a nga hlaya leswo a vule mhaka leyi a yi ta heta nkama wa wunyingi na yi lunghisiwa. Wa swi twisisa swaku hi mhaka muni?

Sofia: Nada! A ni swi twisisi.

Michele: Hiswona. Hi xikombiso, a hi nge ni vula swaku ni ni ntamu ku ku tlula. Se a wu ta yendla yini leswaku u ni komba swaku leswo a hi ntiyiso?

Sofia: A ni swi tivi. A swi ta lava hi kambana mintamu?

Michele:Hiswona. Swi nga yendleka a hi ta lava nchumu xa ku tika se hi gama hi vona swaku i mani ka mina na wena a kotaka ku xi tlakula. Phela ku tiva swaku i mani lweyi a nga ni ntamu ku tlula munghanu swi vevukile.

Sofia: Ina, na swi twisisa.

Michele: Kambe loko a ni nga vulanga swaku ni ni ntamu ku ku tlula kambe ni vula swaku a wu tshembeki leswo a swi ta karhata ku tiva swaku i mani a vulaka ntiyiso a hi swona?

Sofia: Ina hi swoleswo.

Michele: Phela ku tshembeka a swi fani ni ntamu lowu swi vevukaka ku wu kombisa.

Sofia: I ntiyiso.

Michele: Swaku hi vona swaku wa tshembeka kumbe a wu tshembeki a swi ta lava nkama wa wunyingi na wu voniwa hi vanhu van’wani leswi u nga tshamisa xiswona.

Sofia: Swa twala.

Michele: Swoswi a hi tlheli hi vona leswi buku la Genesa li swi vulaka. Indjhe Sathana a vule leswaku a a ni matimba ku tlula Xikwembu?

Sofia: Nada.

Michele: Phela Xikwembu a xi ta va xi kombisile ka nkama wolowuyani leswaku xi ni matimba. Kambe Sathana a vule leswaku Xikwembu a xi tshembeki. Hi marito man’wani Sathana a byele Evha swaku: ‘Xikwembu xo mu hembela. Mina hi mina ni vulavula ntiyiso.’

Sofia: Swa hlamalisa.

Michele: Leswi Xikwembu xi nga ni wutlharhi xi vone leswaku a ku laveka nkama wa wunyingi leswaku vanhu va vona swaku i mani lweyi a a hemba.

MHAKA YA LISIMA

Sofia: Nkama Evha a nga fa a swi kombisanga swaku Xikwembu a xi vulavula ntiyiso?

Michele: Ina, swi kombisile. Kambe a ka ha ni swin’wani leswi Sathana a nga swi vula, tlhela u vona ka ndzimana 5. I mpsini swin’wani leswi Sathana a nga swi byela Evha?

Sofia: A te loko a dla handzu matihlo ya yena a ma ta pfuleka.

Michele: Hi swoleswo, ni swaku a a ta ‘fana ni Xikwembu, a tiva swaswinene ni swa ku biha.’ Marito lawa a ma kombisa swaku Xikwembu a xi fihlela vanhu minchumu yayinene.

Sofia: Na swi twisisa.

Michele: Mhaka leyi na yona ya karhata ku yi tlhantlha.

Sofia: U lava ku vula yini hi leswo?

Michele: Marito ya Sathana a ma kombisa swaku Evha ni vanhu hinkwavu a swi ta va fambela kahle loko va nga landzeli minawu ya Xikwembu. Ni kola Xikwembu a xi swi tiva swaku xi nga yi tlhantlhisa ku yini mhaka leyi, xi nyike nkama Sathana swaku a fuma leswaku a kombisa swaku leswi a nga swi vula i ntiyiso kumbe i mavunhwa. Hi leswo swi yendlaka swaku ku va ni ku hlupheka. Sathana hi yena a fumaka misava, d a hi Xikwembu. Kambe ku ni mhaka ya ku tsakisa leyi ni lavaka ku ku byela yona.

Sofia: Hi yini ya kona?

Michele: Bibele li hi djondzisa swilo swimbirhi swa ku hlamalisa hi Xikwembu. Xa ku sungula hi swaku Yehovha wa hi pfuna loko hi hlupheka. Hi xikombiso, vona marito ya hosi Davhida lawa ma nga ka buku la Tipisalema 31:7. Davhida a hlupheke swinene ka wutomi la yena kambe vona leswi a nga swi vula nkama na a khongela ka Xikwembu. Ni kombela u lerha ndzimana leyi?

Sofia: Ina. Yi li: “Ni ta tsaka hintamu hi mhaka ya lirhandzu la wena hikusa u vone ku karhateka ka mina; wa ma tiva mahlomulu ya mina.”

Michele: Se, lexi a xi tiyisa Davhida i ku tiva swaku Yehovha a a ku vona ku hlupheka ka yena. A swi tsakisi ku tiva swaku Yehovha wa ku vona funtshi wa ku twisisa ku hlupheka ka hina hambiloko vanhu van’wani va nga ku voni?

Sofia: Ina, swa tsakisa.

Michele: Nchumu xa wumbirhi xa ku hlamalisa hi swaku Xikwembu xi ta helisa ku hlupheka. A Bibele li vula swaku ku nga li khale Xikwembu xi ta helisa a mfumu wa Sathana. Naswona xi ta helisa swilo hinkwaswu swa ku biha ku patsa ni leswi swi nga ku humelela ni leswi swi nga humelela mamani wa wena. Swi ngo yini ni tlhela ni ta vhiki li taka hi ta vona swaku hi swi tivisa ku yini swaku Xikwembu xi ta helisa ku hlupheka e hikakunene?

Sofia: Ina swi nga va kahle.