Leswi Vachumayeli Va Mfumu Va Swi Vulaka

YESU a vule swaku wa ti tiva tinyempfu ta yena. (Yohani 10:14) Lweyi a nga ni mbilu yayinene, a rhandzaka ku rhula ni ku luluma a ta tipatsa ni valandzeli va Yesu. Munhu yelweyo a ta tsumbula swaku wutomi li ni xikongomelo ku fana ni leswi nga yendleka ka wansati mun’wani lweyi a tshamaka aBélgica. Hi lexi xitoriya xa yena:

“Nkama Timboni ta Yehovha ti nga ta kaya ka mina a ni karhatekile funtshi a ni lava ku tisunga. Swi ni tsakisile ku tiva swaku swikarhatu leswi hi kumanaka na swona swoswi swi ta hela kambe lexi xi kalaka xi nga ni tsakisanga i ku tiva swaku Xikwembu hi xona xi nga ta yendla leswo. Se a ni ni 8 wa malembe na ni nga ha yi a kerekeni hikusa a ni li nyenya wukanganyisi leli a ni li vona. Kambe ni swi vonile swaku Timboni ta Yehovha ti djondzisa ntiyiso ni swaku a swi nge koteki ku hanya na hi nga na Xikwembu.

“Lexi kalaka xi nga tsakisi, hi leswaku ni hete nkama na ni nga ha kumani ni Timboni ta Yehovha. A ni vavisekile hintamu naswona a ni dzaha swikaxani swimbirhi swa masigari hi siku naswona a ni tirhisa timbangi. Leswi a ni lava ku vulavula ni vhovho wa mina lweyi a nga fa ni tipete ka wudimoni. Hi mhaka leyo a ni chava hintamu niwusiku loko ni li noxe naswona a ni karhatiwa hi madimoni! Leswo swi hete tiwheti na swi ni yendlekela. Wusiku lin’wani ni lin’wani a ni chava hintamu loko ni li noxe.

“Siku lin’wani na ni famba ni tlanga, ni fambe hi ndlela leyi a ni nga toloveli ku yi tirhisa, ni gama ni ya kuma vanhu va vanyingi na va li ku yakeni. Nkama ni nga tshinela ni vone swaku a ku li Timboni ta Yehovha leti a ti yaka a Yindlo ya Wugandzeli. Leswo swi ni yendle ni khumbuka swaku Timboni ta Yehovha a ti ni yendzela ni swaku a swi ta va swinene loko vanhu hinkwavu a vo hanya ku fana na tona.

“A ni lava swaku Timboni ta Yehovha ti tlhela ti ta kaya ka mina, hi mhaka leyo ni vulavule ni van’wani lava a va li ku yakeni. Ni khongele ka Xikwembu naswona loko se ku hundze 10 wa masiku, wanuna lweyi a nga ta kaya ka mina hi khambi la ku sungula a vule swaku hi tlhela hi djondza xikan’we naswona ni pfumelile. A tlhele a ni rhamba swaku ni ya mintlhanganwini ka Yindlo ya Wugandzeli. Ni pfumelile. Leswi ni nga swi vona a ni nga se tshama ni swi vona ndhawu! I khale na ni lavetela vanhu lava va rhandzanaka naswona va ku tshama va tsakile. Phela se a ni va kumile!

“Ni sungule ku ya ka mintlhanganu hinkwayu ya Timboni ta Yehovha. Loko se ku hundze mavhiki manharhu ni tshike ku dzaha. Naswona ni txukumete mabuku hinkwawu ni madixku ya mamuzika lawa a ma vulavula hi swa wudimoni. Ni swi vonile swaku madimoni a ma nga ha ni karhati ka wutomi la mina. Ni txintxe wutomi la mina ni sungula ku hanya hi minawu ya Bibele. Naswona loko se ku hundze tiwheti tinharhu ni sungule ku chumayela mahungu ya ku tsakisa. Loko se ku hundze 6 wa tiwheti ni tsakamisiwile. Loko se ku hundze masiku mambirhi na ni tsakamisiwile, ni ve mupfuli wa ndlela wa ku pfunisa.

“Na mu khensa Yehovha hi swilo hinkwaswu swaswinene leswi a nga ni yendlela swona. Swoswi wutomi la mina li ni xikongomelo. Phela vito la Yehovha i xivhikelo xa ku tiya lexi ni tumbelaka ka xona swaku ni vhikeliwa. (Swivuriso 18:10) Ni titwa ku fana ni mupisalema ka marito lawa a nga ma tsala ka Tipisalema 84:10 leyi nge: ‘Hikusa siku lin’we ka yindlo ya wena li tlula 1.000 wa masiku ka ndhawu yin’wani! Ni langa ku va ka nyanghwa wa yindlo ya Xikwembu xa mina ku tlula ku tshama ka matende ya vanhu va ku biha.’”

Wansati lweyi a nga ni mbilu yayinene, a tsumbule swaku a wutomi li ni xikongomelo. Hinkwavu lava va nga ni timbilu tatinene naswona va lavatelaka Yehovha va nga yendla swa ku fana.