Indjhe swi bihile ku bedja hi male?

LESWI VANHU VAN’WANI VA SWI VULAKA

Vanhu va vanyingi va pimisa swaku ku bedja a swi bihanga, i ndlela yin’wani ya ku hungata hi yona loko ntsena ku thiwa majogu lawa ma pfumeleliwaka hi mfumu. Majogu man’wani lawa ma pfumeleliwaka hi mfumu ya ku fana ni lotariya, ma yendla swaku mfumu wu kuma male ya ku pfuna xitshungu.

LESWI BIBELE LI SWI VULAKA

Hambileswi Bibele li kalaka li nga vulavuli hi ku bedja hi ku kongoma, kambe li ni minawu leyi yi nga hi pfunaka ku tiva leswi Xikwembu xi swi pimisa hi ku bedja.

Ku bedja swi yendla munhu a ganya male ya vanhu van’wani naswona a swi fambisani ni leswi Bibele li swi vulaka loko li ku: “Mi tivonela ka mixaka hinkwayu ya ku navela.” (Luka 12:15) Phela ku bedja swi fambisana ni ku navela swilo swa vanhu van’wani ni ku navela ku va ni swilo swa swinyingi. Ka tindhawu leti ku bedjiwaka ka tona, ku vuliwa swaku vanhu va nga ganya male ya yinyingi kambe a va vuli swaku a ku va munhu a ganya swa karhata, hikusa va swi tiva swaku leswi vanhu va lavaka ku ganya swi yendla swaku va bedja male ya yinyingi ka majogu lawa. Phela ku bedja swi yendla swaku munhu a navela ku va ni swilo swa swinyingi naswona swi yendla swaku a navela ku va ni male leyi a kalaka a nga yi balhelanga.

Munhu lweyi a bedjaka a lava ku ganya male leyi nga luziwa hi vanhu van’wani. Kambe Bibele li vula swaku “mun’wani ni mun’wani a nga lavi leswi nga ta pfuna yena ntsena, kambe a a lavi leswi nga ta pfuna van’wani.” (1 Vakorinto 10:24) Ka 10 wa Minawu a ku ni nawu lowu nge: “U nga tshuki u navela . . . nchumu xin’wani ni xin’wani lexi nga xa [munhu mun’wani].” (Eksoda 20:17) Leswi munhu lweyi a bedjaka a lavaka ku ganya, a lava swaku vanhu van’wani va luza male swaku yi ta kumiwa hi yena.

Bibele li hi byela swaku hi tivonela leswaku hi nga tshuki hi pimisa swaku ku ni nchumu lexi xi hi nyikaka ndjombo leyi yi nga hi pfunaka ka swiyimu swa ku karhi. Ka nkama wa Vayisrayele a ku ni vanhu van’wani lava a va nga na lipfumelo ka Xikwembu, se va sungule ku ‘lunghiselela meza, va lunghiselela xikwembu xa Nkateko.’ Leswo a swi xi tsakisanga Xikwembu xi te: “A mi tshamela ku ni djohela, mi lange ku yendla minchumu leyi kalaka yi nga ni tsakisi.” — Esaya 65:11, 12.

Ka matiko man’wani a mfumu wu tirhisa male leyi nga kumiwa hi ku bedja leswaku wu yendla mintirho leyi nga ta pfuna vanhu ya ku fana ni ku yaka swikola ni swilo swin’wani. Kambe ku tirhisa male hi ndlela yoleyo, a swi txintxi leswi yi nga kumisiwa xiswona hikusa male leyo yi kumiwe hi mintirho leyi yendlaka leswaku vanhu va navela ku va ni minchumu ya yinyingi va tlhela va navela ku kuma male na va nga yi tirhelanga.

“U nga tshuki u navela . . . nchumu xin’wani ni xin’wani lexi nga xa [munhu mun’wani].” — Eksoda 20:17.

Ku Bedja Swi Mu Vavisisa Ku Yini Munhu Lweyi A Bedjaka?

LESWI BIBELE LI SWI VULAKA

Bibele li vula swaku “lava lavaka ku ganya va wela ka ndzingo, ka ntlhamu ni ka ku navela hintamu minchumu leyi kalaka yi nga pfuni nchumu ni leyi vavisaka, leyi hi wugamu yi va petaka ka ku vaviseka ni lifu.” (1 Timotiya 6:9) Ku bedja swi fambisana hintamu ni ku navela ku va ni minchumu ya yinyingi naswona “ku navela minchumu ya yinyingi” swi bihile funtshi Bibele li hi byela swaku hi fambela kule na kona. — Vaefeza 5:3.

Leswi ku bedja ku yendlaka swaku munhu a navela ku kuma male ya yinyingi na a nga yi tirhelanga, swi yendla swaku a rhandza male hintamu ku nga leswi Bibele li vulaka swaku “i limitsu la minchumu hinkwayu ya ku biha.” Ku rhandza male hintamu swi nga yendla swaku munhu a va ni swikarhatu ka wutomi la yena. Swi nga yendla swaku a vilela hintamu swi tlhela swi wonha a lipfumelo leli a nga na lona ka Xikwembu. Bibele li vula leswaku vanhu van’wani lava va rhandzaka male “va tshike lipfumelo naswona va tipete ka swikarhatu swa ku tala.” —1 Timotiya 6:10.

Ku navela swilo swa swinyingi swi yendla swaku munhu a nga tsaki naswona a nga yeneliseki hi male leyi a nga na yona. “Lweyi a rhandzaka male a nge tshuki a kolwa hi yona, ni lweyi a rhandzaka ku ganya a tshamela ku lava swin’wani.” — Ekleziyaxta 5:10.

Vanhu va vanyingi lava va nga tipeta ka ku bedja va tsumbule swaku swa karhata ku tshika mukhuva lowu naswona leswo swi yendleka amisaveni hinkwayu. Hi xikombiso, aEstados Unidos ku vuliwa swaku ku ni vanhu va kolomuyani ka ma milhões lava va nga ni vhisiyu la ku bedja.

Bibele li li: “Munhu lweyi a kumaka tshomba hi ndlela ya ku biha, hi wugamu a nga ta kateka.” (Swivuriso 20:21) A vhisiyu la ku bedja li yendla swaku vanhu va va ni swikweneti va tlhela va heleliwa hi male. Van’wani va heleliwe hi mintirho, muchadu ni vanghanu. Phela ku tirhisa leswi Bibele li swi vulaka swi nga yendla swaku hi nga tipeti ka swikarhatu leswi vangiwaka hi ku bedja.

“Lava lavaka ku ganya va wela ka ndzingo, ka ntlhamu ni ka ku navela hintamu minchumu leyi kalaka yi nga pfuni nchumu ni leyi vavisaka, leyi hi wugamu yi va petaka ka ku vaviseka ni lifu.” — 1 Timotiya 6:9.