DJONDZO 26

Hi Mhaka Muni Ku Li Ni Wubihi Ni Ku Hlupheka?

CHAYA

Loko ku humelela minchumu ya ku biha vanhu va tolovela ku tivutisa va ku: “Hi mhaka muni swi yentxeka?” Hi tsaka hintamu hi leswi Bibele li hi nyikaka tinhlamulu ta ku twala ta xivutiso lexi.

1. Wubihi li sungulise ku yini misaveni?

Sathana Davulosi a tshike ku yingisa Xikwembu. Yena a a lava ku fuma vanhu, hi mhaka leyo a yentxe swaku vanhu va ku sungula, ku nga Adamu na Evha, na vona va nga xi yingisi Xikwembu. A yentxe leswo hi ku hembela Evha. (Genesa 3:1-5) A mu yentxe a pimisa swaku Yehovha a a mu tsona minchumu ya yinene. Hi ku hembela Evha, Sathana a a lava ku vula swaku vanhu a va ta tsaka loko va nga xi yingisi Xikwembu. Sathana a vule mavunhwa ya ku sungula hi ku byela Evha swaku a a nga ta fa. Hi mhaka leyo Bibele li mu vitana “muhembi ni papayi wa mavunhwa.” — Yohani 8:44.

2. I mpsini leswi Adamu na Evha va nga swi yentxa?

Yehovha a nyike Adamu na Evha minchumu ya yinyingi. A va byele swaku a va fanele va dla mihandzu ya minsinya hinkwayu ya jardim la Edeni kambe a va nga fanelanga va dla ya nsinya wun’we ntsena. (Genesa 2:15-17) Kambe vona va lange ku dla handzu wa nsinya wolowo. Evha a ‘khaye handzu wa kona, a wu dla’. Na yena Adamu a game “a sungula ku wu dla.” (Genesa 3:6) Hi wumbirhi ka vona a va xi yingisanga Xikwembu. Leswi Adamu na Evha a va nga na xidjoho, a swi nga va karhateli ku yentxa swa swinene. Kambe va lange ku kala va nga xi yingisi Xikwembu. Hi ku yentxa leswo va djohile naswona va kombise swaku a va lavi ku fumiwa hi Xikwembu, funtshi leswo swi va tisele ku hlupheka ka kukulu. — Genesa 3:16-19.

3. Leswi Adamu na Evha va nga swi yentxa swi li khumbise ku yini wutomi la hina?

Leswi Adamu na Evha se a va li vadjohi, va tlulete xidjoho ka vanhu hinkwavu. Bibele li vula leswi hi Adamu: “Leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho, se lifu li tlulele vanhu hinkwavu”. — Varoma 5:12.

Ku ni minchumu ya yinyingi yi hi yentxaka hi hlupheka. Minkama yin’wana hi hlupheka hi mhaka minchumu ya ku biha leyi hi yi yentxaka kumbe leyi yentxiwaka hi van’wana. Kasi minkama yin’wana hi hlupheka hi leswi hi humeleliwaka hi minchumu ya ku kala hi nga yi nyimelanga. — Lerha Eklesiasta 9:11.

DJONDZA SWIN’WANA

Vona swaku hi mhaka muni Xikwembu xi nga na nandzu hi wubihi ni ku hlupheka loku nga kona misaveni namuntlha ni swaku xi titwisa ku yini loko hi hlupheka.

4. I mani lweyi a nga ni nandzu hi ku hlupheka ka hina

Vanhu va vanyingi va kholwa swaku Xikwembu hi xona xi fumaka misava hinkwayu. Ku nga va swaku leswo i ntiyiso? Sixtirani VHIDIYO.

VHIDIYO: I Mani A Fumaka Misava? (1:24)

Lerhani Yakobo 1:13 na 1 Yohani 5:19, mi gama mi bula hi xivutiso lexi landzelaka:

I Xikwembu xi yentxaka swaku ku va ni ku hlupheka ni wubihi?

5. Vona leswi yentxekaka hi mhaka ya leswi Sathana a fumaka misava

Sixtirani VHIDIYO.

VHIDIYO: Hi Mhaka Muni Xikwembu Xi Pfumelele Kuhlupeka Kutafikela Nyamuntlha? — Xiyenge (3:07)

Lerhani Genesa 3:1-6, mi gama mi bula hi swivutiso leswi landzelaka:

Hi wani mavunhwa lawa Sathana a nga ma vula?— Vona tindzimana 4 na 5.
Sathana a swi vulise ku yini swaku Yehovha a a va tsona minchumu ya yinene vanhu?
I mpsini leswi Sathana a nga swi yentxa kuva a zama ku kombisa swaku vanhu va nga tsaka hambiloko va nga fumiwi hi Xikwembu?

Lerhani Eklesiasta 8:9, mi gama mi bula hi xivutiso lexi landzelaka:

Leswi Yehovha a kalaka a nga fumi misava i mpsini swi humelelaka?

Adamu na Evha a va nga na xidjoho naswona a va hanya Paradesi. Kambe vona va tshike ku yingisa Yehovha va yingisa Sathana
Leswi va nga yingisa Sathana misava yi tale hi xidjoho, ku hlupheka ni lifu
Yehovha a ta helisa xidjoho, ku hlupheka ni lifu. Vanhu va ta tlhela va hanya Paradesi na va nga ha na xidjoho

6. Yehovha a ni mhaka loko a hi vona hi hlupheka

Xikwembu xi ni mhaka loko xi hi vona hi hlupheka? Vona leswi Hosi Davhida na mupostolo Pedru va nga swi tsala. Lerhani Tipisalema 31:7 na 1 Pedru 5:7, mi gama mi bula hi xivutiso lexi landzelaka:

Ku tiva swaku Yehovha wa hi vona loko hi hlupheka naswona a ni mhaka na hina swi ku yentxa u titwisa ku yini?

7. Xikwembu xi ta helisa ku hlupheka hinkwaku

Lerhani Esaya 65:17 na Nhlawutelo 21:3, 4, mi gama mi bula hi xivutiso lexi landzelaka:

Hi mhaka muni swi hi tiyisa ku tiva swaku Yehovha a ta helisa minchumu ya ku biha leyi yi hi yentxekelaka?

Indje a wu swi tiva?

Nkama Sathana a nga hemba ka ku sungula a chimise vito la Yehovha, hikusa a yentxe vanhu va pimisa swaku Yehovha a hi Mufumi wa munene, naswona a nga na lirhandzu. A ku choti kule swaku Yehovha a helisa ku hlupheka hinkwaku ka vanhu, hi ku yentxa leswo a ta basisa vito la yena. Hi marito man’wana yena a ta kombisa swaku mfumu wa yena hi wona wa wunene. Ku basisiwa ka vito la Xikwembu hi swona swa lisima hintamu ka minchumu hinkwayu. — Matewu 6:9, 10.

VAN’WANA VA LI: “I ku rhandza ka Xikwembu leswaku hi hlupheka.”

A wu ta ku yini loko a wo twa munhu a vula leswo?

LESWI HI NGA SWI DJONDZA

Sathana Davulosi, Adamu na Evha hi vona va nga ni nandzu hi mhaka wubihi leli nga kona misaveni. Yehovha a ni mhaka na hina loko hi hlupheka naswona a ku choti kule swaku a helisa ku hlupheka hinkwaku.