“Tok bilong God i gat laip na i wok strong i stap na em i sap moa, winim bainat i gat tupela sap. Em i go insait tru long man na i kamapim ples klia insait bilong man na ausait bilong man, na em i go insait tru long ol join na gris bilong bun bilong man. Em inap kamapim klia tingting na laik i stap long bel bilong man.”​—Hibru 4:12, Nupela Taim Trenslesen.

 “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim. Olsem na em i save gut tru long olgeta tingting na laik bilong bel bilong yumi.”​—Hibru 4:12, Buk Baibel.

 Tok bilong God long ol manmeri, olsem i stap long Baibel, i gat strong long kamapim ples klia tingting na laik tru bilong yumi. Na tu, dispela tok inap senisim laip bilong man i kamap gutpela.

 “Tok bilong God i gat laip.” Dispela hap tok, “tok bilong God,” i makim tok promis bilong God, o samting em i tingting pinis long mekim, olsem i stap long Baibel. a Bikpela samting long samting em i tingting pinis long mekim i olsem, ol manmeri i bihainim tok bilong em bai stap laip oltaim long graun na i stap bel isi na wanbel wantaim.​—Stat 1:28; Buk Song 37:29; Revelesen 21:3, 4.

 Olsem wanem tok bilong God, o samting em i tingting pinis long mekim “i gat laip”? Wanpela risen em olsem, em i mekim bikpela senis long tingting bilong ol manmeri husat i bilip long tok bilong God, em i helpim ol long bilip na wet long ol gutpela samting na i mekim laip bilong ol i gat as bilong en. (Lo 30:14; 32:47) Na tu, tok promis bilong God “i gat laip” bikos God i wok long mekim ol samting bilong inapim ol tok promis bilong em. (Jon 5:17) God i no olsem ol man, em ol i save mekim tok promis na lusim tingting long truim tok bilong ol o painimaut olsem ol i no inap long truim tok promis bilong ol, nogat. (Namba 23:19) Tok bilong em “i no inap [go bek] nating long [em].”​—Aisaia 55:10, 11.

 “Tok bilong God . . . i wok strong i stap.” Dispela hap tok “wok strong i stap,” ol inap trensletim tu olsem “i gat bikpela strong,” “wok i stap,” o “inapim ol samting [dispela tok] i gat wok long inapim.” Olsem na wanem wanem samting Jehova b God i tok long mekim o promis long mekim, ol dispela samting bai kamap tru. (Buk Song 135:6; Aisaia 46:10) Samting i narakain em olsem, God inap truim promis bilong em long ol rot we yumi no bin tingting long en.​—Efesus 3:20. c

 Tok bilong God i “wok strong i stap” tu taim ol manmeri husat i tingim dispela tok i olsem bikpela samting na ol i bihainim na mekim ol senis long laip na pasin bilong ol. Ol i larim tok bilong God i stiaim olgeta samting ol i mekim, tingting bilong ol, wokabaut bilong ol, na ol mak ol i laik winim. (Rom 12:2; Efesus 4:24) Taim ol i mekim olsem, dispela i soim klia olsem “tok bilong God . . . i wok i stap” long ol man i bilipim dispela tok.​—1 Tesalonaika 2:13.

 “Tok bilong God i . . . winim bainat i gat tupela sap.” Tok piksa long tok bilong God i winim bainat i gat tupela sap i stret bikos tok bilong God inap go insait tru long man winim bainat ol man i wokim. Tok bilong God inap go insait tru long bel bilong man—tingting na filings tru—winim tok bilong ol man. Ol narapela tok i stap long Hibru 4:12 i kamapim klia dispela.

 “Tok bilong God . . . i go insait tru long man na i kamapim ples klia insait bilong man na ausait bilong man, na em i go insait tru long ol join na gris bilong bun bilong man.” Long Baibel, dispela tok “ausait bilong man” inap makim man i soim em i wanem kain man long ai bilong ol narapela, tasol “insait bilong man” inap makim pasin tru bilong man. (Galesia 6:18) Tok piksa bilong “tok bilong God” i go insait tru long “gris bilong bun,” i makim olsem tok i kamapim klia tingting na laik tru bilong yumi. Taim yumi kamapim klia olsem yumi wanem kain man long insait, em samting ol man bilong graun i no inap save, dispela i soim olsem tok bilong Jehova i kirapim yumi long mekim ol gutpela senis. Na dispela i save mekim Krieta bilong yumi na yumi yet tu i amamas.

 “Tok bilong God . . . inap kamapim klia tingting na laik i stap long bel bilong man.” Pasin bilong man long bihainim o sakim tok bilong God i kamapim klia tingting tru bilong man, na tu, dispela i kamapim laik tru o risen tru bilong man, em samting we i stiaim pasin man i mekim. Olsem, sapos man i bihainim tok bilong God na mekim ol senis long laip bilong em, em i soim olsem em i gat pasin daun na em i laik tru long senis. Em i laik amamasim Krieta bilong em. Tasol sapos man i wok long painim popaia long tok bilong God, ating em i soim ol pasin kranki bilong em, olsem pasin antap na pasin bilong tingim em yet. Ating em i laik soim olsem i no gat rong long mekim pasin em God i no orait long en.​—Jeremaia 17:9; Rom 1:24-27.

 Wanpela wok painimaut i tok, tok bilong God “inap i go insait tru long tingting na laik i stap long bel.” Olsem na God inap lukim man i wanem kain man tru, na tok bilong em inap kamapim klia tingting na laik bilong man. Hibru 4:13 i tok: “Olgeta samting i op olgeta na i stap ples klia long ai bilong dispela man em yumi mas tokaut long em long olgeta samting yumi bin mekim.”

 God i kirapim aposel Pol long raitim buk Hibru bilong Baibel long 61 C.E. samting, em pas em i salim i go long ol Juda Kristen i stap long Jerusalem na Judia.

 Long sapta 3 na 4, Pol i stori long olsem wanem stori bilong ol Israel long bipo i stap olsem tok lukaut long ol Kristen. (Hibru 3:8-12; 4:11) Jehova i promis long kisim bek ol Israel long wok sleiv na putim ol long graun we ol inap “i stap gut.” (Lo 12:9, 10) Tasol ol dispela jeneresen bilong lain Israel husat i lusim Isip, ol i wok yet long soim olsem ol i no bilip long tok promis bilong God na oltaim ol i sakim tok bilong em. Olsem na ol i no “i go insait long malolo bilong [God]” na enjoim pasin pren wantaim em, nogat. Ol i dai long ples drai nating. Maski ol tumbuna bilong ol i kisim Graun Bilong Promis, ol tu i kisim pasin bilong sakim tok. Bihain, dispela i kamapim bikpela hevi tru long lain Israel.​—Nehemia 9:29, 30; Buk Song 95:9-11; Luk 13:34, 35.

 Pol i tok ol Kristen i no ken mekim wankain pasin olsem ol bikhetlain Israel long bipo. Yumi ken go insait long malolo bilong God sapos yumi bihainim tok na bilip tru long ol tok promis bilong em.​—Hibru 4:1-3, 11.

 Watsim dispela sotpela vidio long lukim ol samting em buk Hibru i stori long en.