Mama i karim mi long Santo Domingo, Ripablik Dominika, na mi las bon long 4-pela pikinini. Papamama bilong mi i bin kisim bikpela skul na ol i laik mekim bikpela long mipela namel long ol gutpela manmeri i gat onest pasin. Papamama bilong mi i bin bungim ol misineri bilong lotu Momon 4-pela yia paslain long mi bon. Ol yangpela man bilong lotu Momon i bilas gut na mekim gutpela pasin, dispela i mekim na papamama bilong mi i laik bai famili bilong mipela i kamap ol fes famili long dispela ailan long joinim lotu Momon (The Church of Jesus Christ of Latter-day Saints).

Taim mi kamap bikpela, mi amamas long insait long ol bung i save kamap long haus lotu na mi rispektim pasin bilong ol Momon long tingim famili na ol stretpela pasin. Mi amamas long stap olsem wanpela Momon na mi putim mak long kamap wanpela misineri.

Taim mi gat 18 krismas, famili bilong mi i go sindaun long Amerika bambai mi ken skul long wanpela gutpela yunivesiti. Wanpela yia samting bihain, anti na ankol bilong mi em ol i Witnes Bilong Jehova, ol i kam visitim mipela long Florida. Ol i singautim mipela long go long wanpela kibung wantaim ol. Mi amamas long lukim olsem olgeta man i sindaun klostu long mi ol i lukim ol skripsa na raitim ol bikpela tok. Olsem na mi askim long wanpela pen na pepa na mi tu i kirap long mekim olsem.

Mi bin i gat laik long kamap wanpela misineri, olsem na bihain long kibung, anti na ankol bilong mi i tok ol inap skulim mi long sampela tok bilong Baibel. Mi ting em i gutpela tingting long mekim olsem, long wanem, long dispela taim mi save gut moa long Book of Mormon na mi no save gut long Baibel.

Taim mi na anti na ankol bilong mi i toktok long Baibel long rot bilong fon, tupela i save kirapim mi long skelim ol bilip bilong mi wantaim ol tok  bilong Baibel. Ol i laik mi yet i mas save gut long tok i tru.

I gat planti samting long bilip bilong ol Momon em mi orait long en, tasol mi no kliagut long olsem wanem ol tok bilong Baibel i stret wantaim ol dispela tingting. Anti bilong mi i givim mi Awake! bilong Novemba 8, 1995, em ol Witnes Bilong Jehova i wokim, na i gat sampela atikol i stori long bilip bilong ol Momon. Mi kirap nogut olsem mi no save gut long planti bilip bilong Momon. Dispela i kirapim mi long visitim Web-sait bilong ol Momon long save sapos ol tok em Awake! i kamapim i tru. Ol dispela tok em i tru, na taim mi visitim ol musium bilong Momon long Utah, mi painim ol infomesen i strongim tru dispela tok.

Oltaim mi save bilip olsem Book of Mormon na Baibel i no pait wantaim. Tasol taim mi stadi gut tru long Baibel, mi luksave olsem ol tok bilong Baibel i pait wantaim ol tok em ol Momon i skulim ol man long en.

Mi no amamas long ol bilip giaman em ol i skulim ol man long en, na mi no laikim tu pasin bilong ol long tingim olsem wanpela kantri i winim ol narapela. Olsem, ol Momon i skulim ol man olsem gaden Iden i stap long Jackson County, long Missouri, Amerika. Na ol bikman bilong dispela lotu i tok ‘taim Kingdom Bilong God i mekim wok bos, God bai bosim graun olgeta long rot bilong gavman bilong Amerika.’

Mi tingting olsem sapos tok ol Momon i skulim man long en em i tru, orait wanem samting bai kamap long kantri bilong mi. Wanpela yangpela Momon husat i kisim trening bilong kamap misineri i ringim mi long wanpela apinun na mi kamapim dispela tingting long em. Mi askim em stret sapos em bai pait long ol Momon bilong narapela kantri sapos kantri bilong em i pait wantaim kantri bilong ol. Mi kirap nogut taim em i tok yes! Mi mekim sampela wok painimaut moa long as tru bilong bilip bilong mi, na tu, mi askim ol bikman bilong lotu Momon long ol dispela bilip. Ol i tokim mi olsem ol bekim bilong ol askim bilong mi i stap hait na bihain bai mi kisim ol bekim taim lait i wok long kamap strong moa.

Mi no amamas long tok ol i mekim long mi, olsem na mi skelim gut mi yet na long wanem as na mi laik kamap wanpela misineri bilong ol Momon. Mi luksave olsem wanpela as na mi laik kamap misineri em long helpim ol manmeri. Narapela as em mi laik bai ol narapela i ken rispektim mi. Tasol mi no save gut long God. Maski mi bin ritim Baibel planti taim long bipo, mi no tingim olsem em i bikpela samting. Mi no save liklik long ol samting God i tingting pinis long mekim long graun na long ol manmeri.

Long rot bilong stadi long Baibel wantaim ol Witnes Bilong Jehova, mi kisim save long planti samting olsem nem bilong God, wanem samting i kamap taim man i dai, na wok bilong Jisas long truim ol samting God i tingting pinis long mekim. Nau mi save gut long dispela gutpela buk, na mi amamas long tokim ol narapela long ol tok i tru mi lainim. Mi save olsem i gat God i stap, tasol nau mi inap toktok wantaim em long rot bilong beten olsem wanpela gutpela Pren. Mi kisim baptais na kamap wanpela Witnes Bilong Jehova long Julai 12, 2004, na 6-pela mun bihain mi kirap long mekim wok bilong autim tok fultaim.

Inap 5-pela yia nau mi wok long hetkota bilong ol Witnes Bilong Jehova long Brooklyn, New York. Mi amamas long helpim wok bilong wokim ol Baibel na ol buk na nius bilong Baibel we i helpim planti milion manmeri long olgeta hap, na mi amamas long wok yet long helpim ol narapela long kisim save long God.