Kisim Skul Long Tok Bilong God
Yu Ting Yu Inap i Stap Laip Oltaim?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long dispela bekim.
1. Bilong wanem yumi save stap laip sotpela taim tasol?
Sampela trausel i save stap laip inap 150 yia, na sampela diwai i save stap inap 3,000 yia. Tasol laip bilong yumi ol man i sotpela tru. Maski i olsem, laip bilong yumi inap i gat as tru bilong en, winim laip bilong trausel o bilong diwai. God Jehova i wokim yumi na em i givim yumi laik bilong amamas long musik, spot, kaikai, kisim nupela save, raun, na bungim ol narapela manmeri. God i putim laik bilong i stap oltaim long bel bilong yumi.—Ritim Saveman 3:11.
2. Tru yumi inap i stap laip oltaim?
Jehova i save stap oltaim. Em i no save dai. Em i As bilong laip, na em inap givim laip oltaim long ol narapela. (Song 36:9; Habakuk 1:12) Na tu, em i promis long givim laip oltaim long ol man husat i bihainim tok bilong em. Em bai pinisim pasin bilong go lapun na ol man bai kamap yangpela gen.—Ritim Jop 33:24, 25; Aisaia 25:8; 33:24.
Long rot bilong ol strongpela wok Jisas i mekim, em i kamapim klia olsem yumi inap bilip tru long tok promis bilong God long laip oltaim na gutpela helt. Jisas i oraitim ol man i gat kain kain sik, na tu, em i kirapim bek ol manmeri i dai pinis.—Ritim Luk 7:11-15, 18, 19, 22.
3. Wanem taim bai yumi kisim laip oltaim?
God i laik bai yumi stap laip oltaim long wanpela paradais bai kamap long graun, na i no long graun i pulap long pasin bilong daunim ol arapela na bagarapim man. Em i laik bai yumi no pret long wanpela samting. (Song 37:9, 29; Aisaia 65:21, 22) Taim Paradais i kamap long graun, planti milion manmeri em ol i dai pinis, ol bai kirap bek. Ol manmeri i kirap bek na ol i lotuim God na bihainim tok bilong em, ol bai stap laip oltaim.—Ritim Luk 23:42, 43; Jon 5:28, 29.
4. Olsem wanem yumi inap kisim laip oltaim?
Pasin bilong save gut long God, dispela i winim olgeta narapela samting
God tasol inap givim laip oltaim long yumi. Olsem na i gutpela yumi go klostu moa long em long rot bilong kisim save long em. Baibel i tok pasin bilong kisim save long God i wankain olsem pasin bilong kaikai. (Matyu 4:4) Yumi save amamas long kaikai, tasol man i mas lusim taim na strong bilong em long kisim na redim kaikai. Olsem tasol, man i mas lusim taim na strong bilong em bambai em i ken kisim save long God. Taim man i mekim olsem, hatwok bilong em bai i no lus nating, long wanem, em i gutpela samting tru long i go klostu moa long God na kisim laip oltaim!—Ritim Luk 13:23, 24; Jon 6:27; 17:3.
