“I No Inap” Tru! Wanem Mining Bilong En?

SIP Titanic i bin kirapim raun bilong en long yia 1912—em i traipela sip na i dia tumas winim olgeta narapela sip long dispela taim bipo. Ol saientis i bin wokim gut disain bilong en, olsem na ol man i ting dispela sip bai “i no inap tru long sink.” Tasol em i bin sink na ol man i lusim tingting pinis long en. Long namba 1 raun bilong en, dispela sip i bamim wanpela traipela hap ais long solwara bilong Not Atlantik na i sink, na 1,500 pasindia i go daun wantaim sip na ol i dai. Insait long sampela aua tasol, dispela sip em ol man i bin ting i no inap tru long sink, em i go daun insait long solwara.

I gat kain kain samting i mekim na yumi ken ting sampela samting “i no inap” tru long yumi mekim. Olsem, yumi pilim olsem yumi no inap tru long karim hevi, mekim gut wanpela samting, o kliagut long ol samting. Planti samting i kamap long nau long sait bilong teknoloji, em ol samting we bipo ol man i ting olsem ol i no inap tru long mekim. Olsem, salim man i go long mun, salim wanpela masin i go long planet Mas na kontrolim long graun, save gut long olgeta hap bilong DNA long bodi, na lukim nius i stori long ol samting i kamap long olgeta hap bilong graun—inap 50 yia i go pinis ol man i ting ol dispela samting i no inap kamap. Presiden bilong Amerika long bipo, em Ronald Reagan, i kamapim stret dispela tok taim em i toktok long sampela bikman bilong saiens, na em i tok: “Nau save bilong yupela long teknoloji inap kamapim ol samting em ol man i no inap tru long mekim long bipo.”

Planti kain kain divelopmen i wok long kamap long nau, olsem na Profesa John Brobeck i tok: “Saientis i no inap moa long tok olsem wanpela samting i hatwok long mekim, nogat. Em inap tok tasol olsem ating mipela bai traim long mekim. Tasol ating em bai tok olsem i hatwok long eksplenim gut nau yet, long wanem, mipela i no save gut yet long en.” Sapos i luk olsem yumi no inap tru long mekim wanpela samting, profesa i tok moa olsem, “wanpela samting yumi mas kisim helpim long en em wanpela kain strong yumi no save long en. Baibel i kolim dispela olsem strong bilong God.”

God Inap Long Mekim Olgeta Samting

Paslain long Profesa Brobeck i mekim dispela tok, Jisas bilong Nasaret, em nambawan man tru i winim olgeta narapela man long  graun, em i tok: “Ol samting ol man i no inap mekim, God inap mekim.” (Luk 18:27) Holi spirit bilong God em i nambawan bikpela strong long heven na graun. I no gat wanpela samting inap skelim strong bilong en. Holi spirit i ken inapim yumi long mekim ol samting em yumi no inap mekim long strong bilong yumi yet.

Long yumi ol manmeri, planti taim ol hevi i save painim yumi na yumi pilim olsem i hatwok long karim ol dispela hevi. Olsem, ating wanpela gutpela pren o wanblut bilong yumi i dai, o presa bilong lukautim famili i daunim tru yumi. Ating sindaun bilong yumi i putim hevi long yumi na yumi pilim olsem i no gat rot bilong karim dispela hevi. Long kain taim olsem, yumi pilim olsem yumi nidim tru helpim. Orait yumi ken mekim wanem?

Baibel i tokim yumi olsem, man husat i bilip long God i Gat Olgeta Strong, na i beten askim God long givim holi spirit, na em i mekim olgeta samting bilong amamasim God, em inap kisim helpim bilong winim ol bikpela hevi. Tingim tok bilong Jisas, olsem: “Mi tok tru long yupela, man i tokim dispela maunten, ‘Kirap na kalap i go daun long solwara,’ na em i no gat tupela tingting long bel bilong en, tasol em i bilip olsem samting em i tok long en bai kamap, orait em bai kamap.” (Mak 11:23) Yumi inap karim olgeta kain hevi sapos yumi larim strong i kam long Tok Bilong God na holi spirit long stiaim laip bilong yumi.

Olsem, skelim stori bilong wanpela man husat i bin marit inap 38 yia na bihain meri bilong em i dai long sik kensa. Bel bilong em i bagarap olgeta. Em i pilim olsem em i no inap tru long karim dispela hevi. Sampela taim em i pilim olsem em i laik dai tasol—em i no laik stap laip olsem wanpis man na karim dispela hevi. Em i tok em i pilim olsem em i wokabaut long ples nogut na bikpela tudak. Em i tingim bek olsem em i save aiwara na beten na ritim Baibel long olgeta de, na tu, em i save askim God long stiaim em long rot bilong holi spirit, na olgeta dispela samting i bin helpim em long karim hevi em pastaim em i ting em i no inap tru long karim.

Bikpela hevi i painim tupela marit na klostu marit bilong ol i bruk. Man marit i gat pasin bilong kros pait na planti narapela pasin nogut. Dispela i putim bikpela hevi tru long meri bilong em. Meri i traim long suasaid. Long dispela taim, man bilong em i kirap stadi long Baibel wantaim ol Witnes Bilong Jehova. Samting em i lainim i helpim em long daunim ol dispela pasin nogut na pasin bilong kros pait. Meri bilong em i kirap nogut long lukim man bilong em i mekim ol senis em pastaim em i ting man “i no inap” tru long mekim.

Narapela man i bin insait tru long kisim drak na mekim pasin pamuk na em i tok dispela laip bilong em i givim bikpela bel hevi tru long em. Em i tok: “Mi no gat gutnem moa long ai bilong ol man.” Em i beten strong long God, olsem: “Bikpela, mi save olsem yu stap. Plis helpim mi!” Beten bilong em i opim rot na em inap stadi long Baibel wantaim ol Witnes Bilong Jehova, na dispela i helpim em long mekim ol bikpela senis long laip bilong em. Em i tok: “Planti taim mi save pilim olsem bel i gat tok na mi pilim olsem mi samting nating tasol. Sampela taim mi save bel hevi tru. Tasol Tok Bilong God i bin helpim mi long daunim ol dispela tingting kranki. Long nait taim mi pilim hatwok long slip, mi save kolim ol tok bilong Baibel mi bin kisim save long en. Dispela pasin i bin helpim mi tru.” Nau marit bilong em i gutpela na em i stap amamas. Em na meri bilong em i wok strong long helpim ol narapela long bilip tru long strong i stap long Tok Bilong God. Em i karim planti hevi taim em i yangpela man na ating pastaim em i bin pilim olsem em i no inap tru long kisim kain laip olsem nau em i gat.

Ol dispela stori i kamapim klia olsem Tok Bilong God i gat strong na holi spirit inap helpim yumi long mekim ol samting long laip bilong yumi em yumi yet “i no inap” tru long mekim. Tasol ating yu bai tok, “Man i mas bilip pastaim!”  Yes, dispela tok em i tru. Baibel i tok “man i no gat bilip em i no inap mekim God i amamas long em.” (Hibru 11:6) Yumi ken tok piksa long dispela olsem: Wanpela gutpela pren bilong yu, ating em i maneja bilong benk o em i holim wok i gat namba, na em i tokim yu: “Yu no ken wari, kam lukim mi sapos yu nidim sampela samting.” Kain tok promis olsem bai mekim gut bel bilong yu, a? Tasol sori tru, ol man bilong graun i no save inapim ol tok promis bilong ol. Ating sindaun bilong pren bilong yu i senis na i hatwok long em i truim tok promis bilong em. Sapos pren bilong yu i dai, olgeta gutpela tok promis bilong em bai pinis na em bai i no inap moa long helpim yu. Tasol long sait bilong God, i no gat wanpela samting inap pasim em long helpim yumi. Baibel i tok: “I no gat wanpela samting God i no inap mekim.”—Luk 1:37, Buk Baibel.

“Yu Bilipim Dispela Tok?”

Planti stori long Baibel i kamapim klia olsem dispela skripsa antap em i tru. Tingim sampela eksampel.

Wanpela lapun meri i gat 90 krismas, Sara, em i bin lap taim ensel i tokim em olsem em bai karim pikinini man, tasol lain Israel i bin kamap na i stap long nau, na dispela i kamapim klia olsem dispela tok i bin kamap tru. Traipela pis i daunim wanpela man, em i stap 3-pela de insait long bel bilong pis, na em i bin stap laip bilong raitim stori bilong em yet. Nem bilong em Jona. Luk, em i wanpela dokta na em inap luksave sapos man i dai o nogat, na em i raitim stori bilong Yutikus, em yangpela man husat i sindaun long windo bilong namba 2 plua bilong haus na i pundaun i kam daun na i dai, tasol Pol i kirapim em bek long dai. Ol dispela stori i no stori nating. Sapos yumi skelim gut olgeta wan wan stori, yumi bai luksave olsem olgeta dispela samting i bin kamap tru.—Stat 18:10-14; 21:1, 2; Jona 1:17; 2:1, 10; Aposel 20:9-12.

Jisas i mekim dispela gutpela tok long pren bilong em Marta, olsem: “Olgeta man i stap laip na bilip long mi, bai ol i no i dai.” Jisas i givim tu dispela bikpela askim: “Yu bilipim dispela tok?” I stret yumi tu i ken skelim dispela askim long nau.—Jon 11:26.

Stap Laip Oltaim Long Graun—I No Inap Tru?

Wanpela nius i stori long tingting bilong ol man long i stap laip longpela taim, na i tok: “Ating klostu nau bai yumi stap laip longpela taim moa o stap laip oltaim.” Buk The New Encyclopædia Britannica i stori long as na ol man i dai na i tok, i no olsem ol sel bilong bodi i bagarap o bodi i wok long i go nogut, nogat, wanpela kain samting i save mekim na wok bilong olgeta wan wan hap insait long bodi i stop. a Buk i tok: “I no olsem ol sel bilong bodi i wok long dai na dispela i mekim man i kamap lapun, nogat. I gat sampela samting ol saientis i no kliagut long en i mekim na man i kamap lapun.”

Maski ol man i tingting planti long ol dispela samting, Baibel tasol i mekim tok bilong strongim yumi long bilip tru olsem yumi inap i stap laip oltaim. God Jehova, em Man Bilong Wokim yumi na As bilong laip, em i tok promis olsem “em bai i pinisim dai tru na bai dai i no kamap moa.” (Song 36:9; Aisaia 25:8) Yu bilipim dispela tok? Dispela tok promis i kam long Jehova, na God i no inap tru long mekim tok giaman, nogat tru.—Taitus 1:2.

[Futnot]

[Rait long pes 27]

“Nau save bilong yupela long teknoloji inap kamapim ol samting em ol man i no inap tru long mekim long bipo.”—RONALD REAGAN

[Rait long pes 28]

Taim yu pilim olsem yu no inap tru long mekim wanpela samting, yu save askim husat long helpim yu?

[Piksa Kredit Lian long pes 27]

NASA photo