YU TING Jehova i save tingim tru lain bilong em? Sapos olsem, em i save tingim ol inap long wanem mak? I gat wanpela rot tasol bilong yumi ken save long bekim bilong ol dispela askim—em long rot bilong ol tok God yet i kamapim long yumi. Long Baibel, Jehova i kamapim klia samting em i pilim long bel. Skelim tok i stap long Aisaia 49:15.

Long rot bilong profet Aisaia, Jehova i mekim wanpela gutpela tok piksa bilong kamapim klia pasin bilong em long laikim tru lain bilong em. Jehova i kirapim dispela tok piksa long rot bilong wanpela askim, olsem: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a?” Ating pastaim bai yumi ting bekim bilong dispela askim i klia tru. Wanpela mama i no inap tru long lusim tingting long bebi bilong em, a? Long olgeta de na nait bebi i nidim tru mama—na bebi bai krai bilong soim dispela! Tasol i gat sampela samting moa i insait long askim bilong Jehova.

I gat wanem as na wanpela mama i save givim susu long bebi na lukautim em long olgeta samting em i nidim? Yu ting em bilong pinisim tasol krai bilong bebi? Nogat. Mama i save sori long “pikinini em yet i bin karim.” Tok Hibru ol i tanim olsem “sori,” ol inap tanim tu olsem “marimari.” (Kisim Bek 33:19; Aisaia 54:10) Dispela tok Hibru i ken makim tu pasin bilong sori long ol man i no gat helpim. Pasin laikim bilong mama long bebi em i wanpela pasin laikim i strong tru.

Tasol sori tru, i no olgeta mama i save sori long bebi i krai long susu. Jehova i tok: “Mama inap lusim tingting long pikinini em yet i bin karim.” Yumi stap long taim we planti man na meri “bai i no stap gut long narapela, [na] ol bai i no gat pasin bilong laikim ol wanfamili.” (2 Timoti 3:1-5) Sampela taim yumi harim stori olsem wanpela mama i no tingim tumas nupela bebi, mekim nogut long em, o tromoim em. Wanpela dikseneri bilong Baibel i stori long Aisaia 49:15 olsem: “Ol mama i gat sin na sampela taim pasin nogut bilong ol i win tru na i daunim pasin laikim. Dispela inap daunim pasin laikim i stap namel long mama na pikinini.”

Tasol Jehova i tok: “Mi no inap tru lusim tingting long yupela. Nogat tru.” Nau yumi inap luksave long as na Jehova i kamapim dispela askim i stap long Aisaia 49:15. Taim em i mekim dispela tok, i no olsem em i laik skelim em yet wantaim ol mama, nogat, em i mekim dispela tok bilong soim olsem pasin bilong em i narapela olgeta long pasin bilong ol mama. Ol mama i gat sin na ating sampela taim ol i no sori long bebi bilong ol, tasol Jehova i no olsem. Oltaim em bai mekim pasin sori long ol manmeri i lotuim em na i nidim helpim. Olsem na i stret dispela dikseneri em yumi stori pinis long en i tok long Aisaia 49:15 olsem: “Long Olpela Testamen, dispela tok piksa i kamapim klia tru bikpela pasin laikim bilong God.”

Yumi kisim save long “pasin sori bilong God,” na dispela i mekim gut bel bilong yumi, a? (Luk 1:78) I gutpela yu kisim save long olsem wanem yu ken i go klostu moa long Jehova. Dispela gutpela God i tokim ol manmeri i lotuim em olsem: “Mi no inap tru long lusim yu o givim baksait long yu long wanpela samting.”—Hibru 13:5.

Baibel ritim bilong Februeri:

◼ Aisaia 43-62