1. Aposel Pol i tok wanem long ol Kristen long Kolosi? (Lukim piksa long kirap bilong stadi.)

APOSEL Pol i raitim pas i go long ol Kristen long Kolosi klostu long taim em i lusim kalabus long Rom, em long yia 60 C.E., i go 61 C.E. samting. Pol i stori olsem em i bikpela samting long ol i mas kisim ‘holi spirit bilong helpim ol long kisimgut ol tok.’ (Kol. 1:9) Em i tok moa: “Mi tok olsem, long wanem, mi no laik bai wanpela man i giamanim yupela long ol tok gris. Yupela lukaut, nogut wanpela i trapim yupela long rot bilong savetingting bilong ol man na tok giaman. Kastam bilong ol man i as bilong ol dispela samting na i stret wantaim ol bikpela tingting bilong graun, tasol i no stret wantaim ol tok Krais i skulim ol man long en.” (Kol. 2:4, 8) Pol i stori long risen na tingting bilong planti man i no stret, na risen na ol manmeri i amamas long ol kain tingting olsem. Ol tingting bilong dispela graun inap mekim man i pilim olsem em i gat bikpela savetingting moa winim ol narapela. Pol i raitim dispela pas bilong helpim ol Kristen long sakim tingting na pasin bilong dispela graun.—Kol. 2:16, 17, 23.

2. Bilong wanem yumi bai stori long sampela tingting em planti man i gat long nau?

² Tingting bilong dispela graun i kirapim ol man long sakim  ol stretpela lo bilong Jehova, na em inap kirapim yumi long sakim ol stiatok bilong God, na isi isi yumi inap kamap slek long bilip. Long nau em i isi long yumi kisim tingting bilong dispela graun. Ol dispela tingting inap kamap long rot bilong TV, Intenet, long ples wok, na long skul. Long dispela stadi, yumi bai stori long ol samting yumi inap mekim bilong sakim ol tingting bilong dispela graun na stap strong long bilip. Yumi bai stori long 5-pela tingting bilong dispela graun em planti man i gat, na olsem wanem yumi inap sakim ol dispela tingting.

3. Planti manmeri i holim wanem tingting? Bilong wanem?

³ “Mi inap bihainim ol gutpela pasin maski mi no bilip long God.” Long planti kantri, sampela manmeri i tok ol i no bilip long God na ol i no gat lotu. Ating ol i no laik painimaut sapos tru tru God i stap o nogat. Ol i holim tingting olsem ol i stap fri long mekim ol samting ol i laik mekim. (Ritim Song 10:4.) Ating ol narapela man i pilim olsem ol i gat bikpela save na ol i tok, “Mi no bilip long God, tasol mi save bihainim stretpela pasin.”

4. Olsem wanem yumi inap helpim man husat i bilip olsem i no gat Krieta?

⁴ Yu ting ol man husat i bilip olsem i no gat Krieta, ol i painimaut ol evidens bilong sapotim tingting bilong ol? Taim yumi skelim wok painimaut bilong ol saientis long olsem wanem laip i bin kamap, em isi long tok bilong ol i paulim tingting bilong yumi. Tasol i no hatwok long save long laip i kamap olsem wanem. Olgeta haus i gat man i bin wokim ol, olsem tasol i mas i gat Man i wokim olgeta samting i gat laip! Ol samting i gat laip i winim tru ol haus em ol man i wokim. Ol samting i gat laip inap kamapim pikinini, tasol ol haus i no inap mekim olsem. Ol samting i gat laip i gat ol sel, na ol dispela sel i save bungim na kopim ol infomesen ol i nidim bilong kamapim pikinini. Husat i wokim ol dispela sel i gat laip? Baibel i tok: “Olgeta wan wan haus i gat man i bin wokim. Tasol man i bin wokim olgeta samting em God.”—Hib. 3:4.

5. Yu ting man husat i no bilip long God inap bihainim ol stretpela pasin?

⁵ Sampela man i bilip olsem ol inap bihainim ol stretpela pasin maski ol i no bilip long God. Olsem wanem yumi inap helpim ol kain man olsem? Tok Bilong God i tokaut olsem yumi olgeta i gat maus bilong bel na dispela inap stiaim yumi long mekim ol gutpela pasin. (Rom 2:14, 15) Man i no bilip long God inap rispektim na laikim papamama bilong em. Tasol olsem wanem em inap bihainim ol stretpela lo na mekim ol gutpela pasin sapos em i no bilip long Krieta, em Man husat i bin givim ol stretpela lo bilong stiaim yumi? (Ais. 33:22) Ol man husat i skelim gut ol samting, ol bai luksave olsem yumi ol man i nidim helpim bilong God long stretim ol hevi i painim yumi long nau. (Ritim Jeremaia 10:23.) Olsem na yumi no ken ting olsem man husat i no bilip long God na bihainim ol stiatok bilong Em, em bai save long wanem pasin i stret na wanem pasin i no stret.—Sng. 146:3.

6. Planti man i holim wanem tingting long lotu?

⁶ “Yu inap i stap amamas maski yu no gat lotu.” Planti man i gat kain tingting olsem bikos ol i ting lotu em samting i no gat as bilong en na i no inap helpim ol. Na tu, planti lotu i stiaim ol manmeri i go longwe long God taim ol i skulim ol manmeri long bilip bilong helpaia, ol wok politik, na salim plet bilong kolektim mani long haus lotu. Olsem na planti manmeri i pilim olsem ol bai stap amamas sapos ol i no gat lotu! Ating ol i mekim kain tok olsem, “Mi laik save long God, tasol mi no laik insait long wanpela lotu.”

7. Olsem wanem lotu i tru i helpim yumi long i stap amamas?

⁷ Yu ting ol man inap i stap amamas maski ol i no gat lotu? Man inap i stap amamas sapos em i no insait long lotu giaman. Em i mas pas gut wantaim Jehova, em “God bilong  amamas,” bambai em i stap amamas tru. (1 Tim. 1:11) Olgeta samting God i wokim em bilong helpim yumi. Ol wokman bilong God i amamas bikos ol i givim bel long helpim ol narapela. (Apo. 20:35) Lotu i tru i helpim ol famili long i stap amamas. Em i skulim yumi long givim ona na rispek long poroman marit, tingim promis bilong marit, sakim pasin adaltri, stiaim ol pikinini long soim pasin rispek, na kamapim pasin laikim. Ol bratasista long olgeta hap bilong graun i bihainim ol dispela pasin, olsem na ol i stap wanbel wantaim na stap amamas.—Ritim Aisaia 65:13, 14.

8. Olsem wanem tok bilong Matyu 5:3 i bekim dispela askim, Wanem samting inap mekim man i stap amamas?

⁸ Yu ting man inap i stap amamas maski em i no lotuim God? Wanem samting inap mekim man i stap amamas? Sampela i kisim amamas long wok mani, pilai spot, o mekim ol samting ol i save laikim. Ol narapela i kisim amamas long lukautim ol famili na ol pren. Yumi kisim amamas long mekim ol dispela samting, tasol i gat wanpela bikpela samting yumi mas mekim bambai yumi inap i stap amamas inap oltaim. Yumi inap kisim save long Krieta bilong yumi na mekim wok bilong em. Taim God i wokim yumi, em i givim yumi laik bilong kisim save long em na dispela i mekim yumi amamas. (Ritim Matyu 5:3.) Kain olsem, ol man i lotu tru long God i kisim amamas na strong taim ol i bung wantaim long ol miting na ol kibung na lotuim Jehova. (Sng. 133:1) Na tu, ol i stap wanbel, ol i bihainim ol gutpela na stretpela pasin, na ol i bilip na wetim gutpela samting bai kamap bihain.

9. (a) Planti manmeri i holim wanem tingting long maritpasin? (b) Bilong wanem Tok Bilong God i tambuim pasin bilong slip wantaim wanpela husat i no poroman marit bilong yu?

⁹ “I no gat rong long slip wantaim wanpela husat i no poroman marit bilong yu.” Planti man i tok: “Yumi stap laip bilong kisim amamas. Olsem na i no gat rong long slip wantaim wanpela husat i no poroman marit bilong yu.” Tasol ol Kristen i no ken tru orait long pasin bilong slip wantaim wanpela husat i no poroman marit bilong em. Bilong wanem? Tok Bilong God i tok yumi mas sakim pasin pamuk. * (Ritim 1 Tesalonaika 4:3-8.) Jehova i wokim yumi, olsem na em i gat rait long givim ol lo bilong stiaim yumi. Lo God i givim i tokaut klia olsem maritpasin em bilong ol lain i marit tasol. God i laikim yumi na em i givim yumi ol lo bilong lukautim yumi. Taim yumi bihainim ol dispela lo, pasin laikim, pasin rispek, na pasin wanbel bai stap insait long famili. God bai kotim ol manmeri husat i sakim lo bilong em na mekim pasin pamuk na pasin adaltri.—Hib. 13:4.

10. Olsem wanem Kristen inap sakim tru pasin pamuk?

¹⁰ Tok Bilong God i skulim yumi long olsem wanem yumi inap sakim pasin pamuk. Wanpela rot bilong mekim olsem em long was gut long ol samting yumi lukim. Jisas i tok: “Man husat i wok long lukluk long wanpela meri na aigris long em, long bel em i mekim pinis pasin adaltri. Sapos ai long han sut bilong yu i wok long pundaunim yu, orait kamautim na tromoi i go.” (Mat. 5:28, 29) Kristen i mas abrusim pasin bilong lukim ponografi o harim ol musik i stori long pasin pamuk. Aposel Pol i tokim ol wanbilip Kristen olsem: “Yupela i mas kilim i dai ol laik i stap long ol hap bilong bodi bilong yupela, olsem pasin pamuk.” (Kol. 3:5) Na tu, yumi mas was gut long ol samting yumi tingting long en na ol samting yumi stori long en.—Efe. 5:3-5.

11. Bilong wanem planti man i ting olsem wok mani bai mekim ol i stap amamas?

¹¹ “Wok mani bai mekim yu stap amamas.” Planti man i kirapim yumi long lusim bikpela taim na strong long mekim wok mani. Sapos yu givim bel long mekim wok mani, yu inap kisim biknem na planti mani kago. Planti man i putim wok mani olsem namba 1 samting long laip bilong ol. Sapos Kristen i no was gut, em tu inap kisim wankain tingting.

12. Yu ting wok mani bai mekim yu i stap amamas tru?

¹² Olsem wanem? Yu ting man i kisim gutpela wok mani na biknem inap i stap amamas tru? Nogat. Satan i gat laik long bosim ol narapela na em i laik bai ol i givim biknem long em. Maski i olsem, em i no stap amamas, nogat, oltaim em i belhat. (Mat. 4:8, 9; Rev. 12:12) Taim yumi helpim ol narapela long kisim save long God na kisim laip oltaim, yumi bai amamas moa winim amamas yumi kisim taim yumi mekim wok mani. Ol manmeri bilong dispela graun i gat pasin bilong resis wantaim ol narapela. Dispela pasin i kirapim ol long daunim ol narapela na kisim pasin jeles, na ol i “olsem man i ran i go bilong holimpas win.”—Sav. 4:4.

13. (a) Yumi mas holim wanem tingting long wok mani? (b) Taim Pol i raitim pas i go long ol Kristen long Tesalonaika, em i tok wanem samting i givim bikpela amamas long em?

¹³ Yumi mas mekim wok mani bilong lukautim yumi yet. Tasol wok mani i no ken stap namba 1 samting long laip bilong yumi. Jisas i tok: “I no gat wanpela man inap stap wokboi bilong tupela bosman. Em bai laikim wanpela na i no laikim narapela, o em bai pas long wanpela na les long narapela. Yupela i no inap stap wokboi bilong God na mani wantaim.” (Mat. 6:24) Taim yumi givim bel long mekim wok bilong Jehova na skulim ol narapela long tok bilong Baibel, yumi bai amamas tru. Aposel Pol i kisim bikpela amamas long mekim wok autim tok. Pol inap kisim biknem na gutpela sindaun tru sapos em i bihainim yet lotu Juda, tasol em i kamap wanpela disaipel na skulim ol man long tok bilong God, na dispela i givim bikpela amamas long em. (Ritim 1 Tesalonaika 2:13, 19, 20.) I no gat narapela wok bai givim yu kain amamas olsem.

14. Bilong wanem ol man i ting olsem ol inap stretim ol hevi?

¹⁴ “Ol man yet inap stretim ol hevi.” Planti man inap wanbel long dispela tingting. Bilong wanem? Sapos ol man inap stretim ol hevi i kamap long graun, orait dispela i makim olsem yumi no nidim God long stiaim yumi, na yumi inap bihainim laik bilong yumi yet. Sampela wok painimaut i soim olsem pasin bilong pait, pasin raskol, ol sik, na pasin bilong i stap rabis i wok long pinis. Dispela i mekim na ol man i ting olsem yumi yet inap stretim ol hevi. Wanpela ripot i tok: “Ol manmeri i stap bel isi bikos olgeta i tingting long mekim graun i kamap gutpela ples.” Yu ting dispela i soim olsem ol manmeri inap bosim ol yet na stretim ol hevi? Yumi ken skelim sampela hevi bilong kisim bekim bilong dispela askim.

15. Ol manmeri i wok long karim wanem ol hevi long nau?

¹⁵ Ol woa: Long taim bilong Wol Woa 1 na Wol Woa 2, klostu 60 milion manmeri i bin dai. Bihain long Wol Woa 2, ol manmeri i wok yet long pait. Long 2015, ol manmeri em woa na pasin birua i mekim na ol i ranawe lusim haus bilong ol, namba bilong ol i go antap inap 65 milion samting. Long wankain yia yet, inap 12 milion 4 handret tausen manmeri i ranawe lusim haus. Pasin bilong brukim lo: Pasin raskol i go daun long sampela kantri, tasol pasin bilong stil long rot bilong Intenet o kompiuta, kros pait insait long marit, na pasin teroris i kamap bikpela. Na tu, pasin korapsen i go bikpela long olgeta hap. Dispela i soim olsem ol man i no inap pinisim pasin bilong brukim lo. Ol sik: Ol saveman na ol dokta i wokim ol kain kain marasin bilong helpim ol man i gat sik. Tasol wanpela ripot bilong 2013 i soim olsem long olgeta yia, inap 9 milion manmeri husat i no winim 60 krismas i save dai long sik bilong klok, strok, kensa, sik sotwin, na sik suga. Stap rabis: Lain World Bank i tok olsem, namba bilong ol man husat i stap rabis long Afrika i wok long i go bikpela tru. Long 1990, i gat 280 milion manmeri i stap rabis, tasol dispela namba i go antap inap 330 milion long 2012.

16. (a) Bilong wanem Kingdom Bilong God inap stretim ol hevi bilong yumi? (b) Profet Aisaia na man bilong raitim Song i tok Kingdom bai bringim wanem ol blesing?

¹⁶ Ol manmeri i gat pasin bilong tingim ol yet tasol, olsem na yumi karim hevi long sait bilong mani na wok politik. Ol gavman bilong dispela graun i no inap pinisim ol woa, pasin bilong brukim lo, ol sik, na pasin bilong i stap rabis. Kingdom Bilong God tasol inap pinisim ol dispela hevi. Tingim samting Jehova bai mekim bilong helpim ol manmeri. Ol woa: Kingdom Bilong God bai pinisim ol man i save tingim ol yet, litimapim nem bilong kantri, mekim pasin korapsen, na insait long lotu giaman. Na tu, dispela Kingdom bai pinisim Satan. Em ol samting we i save kirapim ol man long insait long ol woa. (Sng. 46:8, 9) Pasin bilong brukim lo: Kingdom Bilong God i skulim planti milion manmeri long laikim na trastim narapela narapela. I no gat narapela gavman inap skulim ol man long mekim olsem. (Ais. 11:9) Ol sik: Jehova bai blesim ol manmeri na ol bai i no gat sik. (Ais. 35:5, 6) Stap rabis: Jehova bai pinisim pasin bilong i stap rabis na ol manmeri bai pas gut wantaim em, na tu, ol bai i gat haus na kaikai samting. Dispela laip i gutpela moa winim mani kago.—Sng. 72:12, 13.

17. Olsem wanem yu inap sakim ol tingting bilong dispela graun?

¹⁷ Sapos yu harim ol man i kamapim ol tingting bilong dispela graun we i no stret wantaim samting yu bilip long en, orait skelim tok bilong Baibel na toktok wantaim wanpela Kristen husat i stap strong long bilip. Skelim gut risen na yu inap amamas long ol tingting bilong dispela graun, risen na ol dispela tingting i no stret, na olsem wanem yu inap sakim. Tru tumas, yumi olgeta i mas sakim tingting bilong dispela graun na bihainim tok em aposel Pol i givim long kongrigesen long Kolosi. Em i tok: “Bihainim yet savetingting long ol samting yupela i mekim long ol man i stap ausait . . . na bai yupela inap save long wanem tok i stret long bekim long olgeta man wan wan.”—Kol. 4:5, 6.