1, 2. (a) Wanem bikpela tok i bin kamap na yumi olgeta i insait long en? (b) Bilong wanem em i bikpela samting long sapotim wok bos bilong God?

PLANTI manmeri long nau i tingting tasol long kisim planti mani kago na ol i no laik lusim ol samting ol i gat pinis. Ol narapela i tingim famili, helt, na ol narapela samting ol i laik mekim long bihain.

² Tasol bikpela samting yumi mas tingim em long sapotim wok bos bilong Jehova. Yumi no ken lusim tingting long bikpela tok i bin kamap. Sapos yumi lusim bikpela haptaim long mekim ol wok bilong wan wan de, na tingim tasol ol hevi bilong yumi yet, yumi inap lusim tingting long wok bilong sapotim wok bos bilong God. Taim yumi givim bel tru long mekim olsem, dispela bai helpim yumi long karim ol hevi bilong wan wan de, na kirapim yumi long i go klostu moa long Jehova.

3. Satan i sutim wanem tok long wok bos bilong God?

³ Satan i sutim tok long Jehova olsem em i no bihainim stretpela pasin long mekim wok bos, na em i no laik givim ol gutpela  samting long ol manmeri na ol ensel. Satan i tok ol manmeri bai i stap amamas sapos ol i bosim wokabaut bilong ol yet. (Stt. 3:1-5) Na tu, em i tok ol man i no givim bel tru long i stap gut long God. Olsem na sapos hevi i painim ol, ol bai givim baksait long wok bos bilong Jehova. (Jop 2:4, 5) Jehova i larim haptaim i lus bambai ol manmeri i bosim wokabaut bilong ol yet, na dispela bai kamapim klia olsem tok Satan i sutim long em i tru o nogat.

4. Bilong wanem God i mas stretim bek tok Satan i sutim long wok bos bilong em?

⁴ Jehova i save olsem tok Satan i sutim long em i no tru. Maski i olsem, God i larim Satan i mekim wok bos inap sampela haptaim bambai ol man na ol ensel i ken luksave olsem i stret long God wanpela tasol i bosim ol. (Ritim Song 83:18.) Sampela man inap ting olsem tok bilong Satan i tru. Tasol kirap long taim namba 1 man na meri i sakim wok bos bilong Jehova, planti hevi i kamap. Pasin wanbel i no stap namel long ol manmeri, ol famili, ol kantri, na ol lain bilong narapela narapela skin kala. Taim Jehova i stretim bikpela tok i kamap, olgeta manmeri bai i stap aninit long wok bos bilong em inap oltaim oltaim. Long dispela taim, bel isi bai stap long heven na long graun.—Efe. 1:9, 10.

5. Yumi mas mekim wanem bilong sapotim wok bos bilong Jehova?

⁵ God bai pinisim wok bos bilong Satan na ol manmeri na stretim bek tok Satan i sutim long wok bos bilong em. Long rot bilong Kingdom Bilong Mesaia, God bai bosim ol manmeri, na ol lain husat i stap gut long em bai soim klia olsem ol man inap sapotim wok bos bilong God. (Ais. 45:23, 24) Yu laik stap namel long ol lain husat i gat nem long i stap gut long Jehova? Yumi olgeta i laik mekim olsem. Sapos yumi laik stap gut long God, yumi mas tingim bikpela tok i bin kamap, na luksave long risen na yumi mas sapotim wok bos bilong God.

6. Yumi mas holim wanem tingting long wok bilong sapotim wok bos bilong Jehova?

⁶ Em i bikpela samting tru long yumi ol manmeri i mas sapotim wok bos bilong Jehova. Yumi mas tingim tru dispela wok winim ol laik bilong yumi yet. Yu ting dispela i makim olsem Jehova i no tingim yumi na em i no inap kisim bek yumi? Nogat tru. Bilong wanem?

7, 8. Olsem wanem wok bilong inapim ol tok promis bilong God i insait tu long wok bilong sapotim wok bos bilong em?

⁷ Jehova i laikim na tingim tru olgeta manmeri. Em i redi long givim Pikinini bilong em olsem ofa bilong yumi ken kisim laip oltaim. (Jon 3:16; 1 Jon 4:9) Sapos Jehova i no bin truim ol promis bilong em, Satan bai sutim tok long God olsem Em i man bilong giaman na em i mekim wok bos long pasin i no stret. Na tu, dispela bai strongim tok bilas bilong ol man husat i tok: “Em i bin tok promis olsem em bai kam i stap, tasol em i stap we? Kirap long taim ol tumbuna bilong yumi i bin i dai na i kam inap nau, olgeta samting i stap wankain olsem bipo tru taim God i mekim ol samting i kamap.” (2 Pita 3:3, 4) Olsem na taim Jehova i stretim bek tok i kamap long wok bos bilong em, em bai kisim bek ol manmeri i stap daun long em! (Ritim Aisaia 55:10, 11.) Na tu, pasin laikim i stiaim Jehova long mekim wok bos. Olsem na yumi ken bilip tru olsem God i laikim na tingim tru ol wokman bilong em husat i stap gut long em.—Kis. 34:6.

⁸ Taim yumi sapotim wok bos bilong Jehova, em inap tingim yumi na kisim bek  yumi. Yumi holim stretpela tingting long wok bos bilong Jehova na wok bilong em long kisim bek yumi. Em i bikpela samting long yumi mekim olsem bambai dispela i helpim yumi long tingim bikpela tok i kamap na sapotim wok bos bilong em.

9. Satan i tok Jop bai mekim wanem sapos hevi i painim em? (Lukim piksa long kirap bilong stadi.)

⁹ Buk Jop em wanpela buk ol i bin raitim long pastaim tru, na em i stori long risen na yumi mas holim stretpela tingting. Satan i tok, sapos Jop i karim bikpela hevi, em bai givim baksait long God. Satan i tokim God long givim hevi long Jop, tasol em i no mekim olsem. Em i larim Satan long traim Jop, na em i tok: “Mi putim olgeta samting bilong en long han bilong yu.” (Ritim Jop 1:7-12.) Insait long sotpela haptaim, ol animal, ol wokman, na 10-pela pikinini bilong Jop i dai. Satan i kamapim ol dispela hevi long rot we Jop inap kisim tingting olsem God yet i givim ol dispela hevi long em. (Jop 1:13-19) Bihain, Satan i mekim ol strongpela sua i kamap long bodi bilong Jop na i givim em bikpela pen. (Jop 2:7) Na tu, meri bilong em na 3-pela pren bilong em i kam mekim kain kain tok we i bagarapim tru bel bilong em.—Jop 2:9; 3:11; 16:2.

10. (a) Jop i mekim wanem na dispela i soim olsem em i stap gut long God? (b) Jop i kisim wanem tingting kranki?

¹⁰ Tok bilong Satan i no tru. Jop i no givim baksait long God. (Jop 27:5) Tasol inap liklik taim Jop i kisim tingting kranki. Jop i ting olsem em yet i stretpela man, na em i laik save long risen na em i karim pen. (Jop 7:20; 13:24) Yumi inap kisim tingting olsem Jop i karim planti hevi tru, na i stret em i save long risen na hevi i painim em. Tasol God i stretim tingting bilong Jop. Jehova i mekim wanem tok long Jop?

11, 12. (a) Jehova i helpim Jop long luksave long wanem samting? (b) Jop i mekim wanem taim God i stretim em?

¹¹ Tok God i givim long Jop i stap long 4-pela sapta bilong Buk Jop—sapta 38 i go sapta 41. Tasol i no gat wanpela bilong ol dispela sapta i soim olsem God i tokim Jop long risen na em i karim pen na hevi. Jehova i no bin kamapim klia risen na Jop i karim pen na hevi, nogat. Em i helpim Jop long luksave olsem Em i gat bikpela strong moa winim Jop. Na tu, i gat narapela bikpela samting moa Jop i mas tingim. (Ritim Jop 38:18-21.) Dispela i helpim Jop long kisim gen stretpela tingting.

¹² Yu ting Jehova i bihainim hatpela pasin na givim tok kaunsel long Jop bihain long em i karim bikpela hevi? God i no mekim  hatpela pasin, na Jop tu i no holim kain tingting olsem. Maski Jop i karim pen na hevi, em i mekim ol gutpela tok long God. Jop i tok: “Mi sem tru long mi yet na long olgeta tok mi bin mekim. Na mi sindaun long das na long sit bilong paia, bilong soim yu olsem mi tanim bel pinis.” Jop i mekim dispela tok bikos Jehova i givim gutpela tok kaunsel long em. (Jop 42:1-6) Na tu, yangpela pren bilong Jop, em Elihu, i givim ol gutpela tok bilong stretim tingting bilong Jop. (Jop 32:5-10) Taim Jop i bihainim tok kaunsel bilong Jehova na kisim gen stretpela tingting, God i tokaut olsem em i amamas long pasin bilong Jop long i stap gut long em na karim pen na hevi.—Jop 42:7, 8.

13. Olsem wanem tok kaunsel Jehova i givim long Jop inap helpim em bihain long ol hevi bilong em i pinis?

¹³ Ol tok Jehova i mekim long Jop i helpim em bihain long ol hevi bilong em i pinis. Tok bilong God i helpim Jop olsem wanem? “Bikpela i mekim gut moa yet long Jop. Na las hap bilong laip bilong en i winim tru ol yia em i bin i stap bipo.” Ating isi isi em i wok long kisim bek ol samting i bin lus, na sik bilong em i pinis. Bihain “Jop i kamapim 7-pela pikinini man na tripela pikinini meri.” (Jop 42:12-14) Jop i misim tru ol pikinini bilong em husat i dai long ol hevi Satan i kamapim. Ating sampela taim em i tingim bek ol hevi i painim em, na em i kliagut long risen na ol dispela samting i kamap. Bikpela samting em olsem Jop i mas tingim tok kaunsel bilong God. Sapos em i mekim olsem, dispela bai helpim em long holim yet stretpela tingting na dispela bai givim bel isi long em.—Sng. 94:19.

14. Yumi inap kisim wanem skul long stori bilong Jop?

¹⁴ Yumi inap kisim stretpela tingting na bel isi taim yumi ritim stori bilong Jop. Jehova i kamapim ol dispela tok “bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Bikpela skul yumi kisim em olsem: Yumi no ken putim olgeta tingting na strong long ol narapela wok bilong wan wan de, na yumi lusim tingting long bikpela tok i bin kamap long wok bos bilong Jehova. Yumi mas tingim olsem yumi gat wok long i stap gut long God long taim bilong ol hevi, wankain olsem Jop i bin mekim.

15. Wanem gutpela samting bai kamap taim yumi karim hevi na stap gut long God?

 ¹⁵ Ol hevi i save painim yumi, tasol yumi inap kisim bel isi taim yumi tingim risen na yumi mas i stap gut long God. Ol hevi i kamap long yumi i no makim olsem Jehova i no amamas long yumi, nogat. Ol hevi i opim rot long yumi inap soim olsem yumi sapotim wok bos bilong God. (Snd. 27:11) Pasin bilong yumi long sanap strong na karim hevi i helpim yumi long kamapim “ol pasin God i orait long en,” na dispela i strongim bilip bilong yumi long ol samting yumi bilip na wet long en. (Ritim Rom 5:3-5.) Stori bilong Jop i soim klia olsem “Jehova i gat pasin bilong sori tru na marimari.” (Jems 5:11) Olsem na yumi ken bilip tru olsem God bai blesim ol lain i sapotim wok bos bilong em. Dispela bai helpim yumi long “sanap strong na i no les kwik, na [yumi] ken mekim wantaim amamas.”—Kol. 1:11.

16. Bilong wanem yumi mas tingim olsem em i bikpela samting long yumi sapotim wok bos bilong Jehova?

¹⁶ Sampela taim i hatwok long mekim ol samting bilong sapotim wok bos bilong Jehova. Yumi bai pilim olsem ol hevi bilong yumi i daunim yumi tru. Sapos yumi tingim tingim ol liklik hevi, dispela inap kamap olsem ol bikpela hevi. Olsem na oltaim yumi mas tingim olsem em i bikpela samting long yumi sapotim wok bos bilong God taim yumi karim hevi.

17. Taim yumi mekim wok bilong Jehova, olsem wanem dispela inap helpim yumi long tingim bikpela tok i bin kamap long wok bos bilong em?

¹⁷ Sapos oltaim yumi mekim wok bilong Jehova, dispela bai helpim yumi long tingim bikpela tok i bin kamap. Tingim stori bilong Renee. Em i kisim strok, na em i pilim bikpela pen long bodi, na tu, em i gat sik kensa. Taim em i stap long haus sik, em i save autim tok long ol wokman long haus sik, ol lain i sik, na ol visita. Insait long 2 na hap wik, em i lusim 80 aua long autim tok long wanpela haus sik. Klostu long taim em i laik i dai, em i no lusim tingting long bikpela tok i bin kamap long wok bos bilong Jehova. Dispela i helpim em long daunim bel hevi bilong em.

18. Olsem wanem ekspiriens bilong Jennifer i soim olsem gutpela samting inap kamap taim yumi stap gut long wok bos bilong Jehova?

¹⁸ Yumi laik sapotim tru wok bos bilong Jehova maski yumi bungim ol hevi bilong wan wan de. Jennifer em wanpela sista, na inap 3-pela de em i wet long ples balus. Em i laik i go long ples, tasol ol i stopim olgeta ron bilong balus. Maski em yet i stap na em i taiet tru, em i no bel hevi. Em i beten long God bambai em inap autim tok long ol narapela. Wanem gutpela samting i kamap? Em i autim tok long planti manmeri na tilim planti litresa. Jennifer i tok, “Mi pilim olsem Jehova i blesim mi na strongim mi long sapotim yet gutnem bilong em.” Jennifer i mekim ol wok i sapotim ol samting em Jehova i tingting pinis long kamapim.

19. Ol man i lotuim Jehova i gat wanem tingting long wok bos bilong em?

¹⁹ Pasin bilong sapotim wok bos bilong Jehova i mekim lotu i tru i stap narapela kain long lotu giaman. Kirap long bipo na i kam inap long nau, ol man i lotuim God i save mekim ol wok i sapotim wok bos bilong em. Yumi insait long lotu i tru, olsem na yumi wan wan i mas wok strong long sapotim wok bos bilong Jehova na i stap gut long em.

20. Jehova i pilim olsem wanem long pasin bilong yu long sapotim wok bos bilong em?

²⁰ Yu ken bilip tru olsem Jehova i tingim ol gutpela wok yu mekim bilong sapotim wok bos bilong em. (Sng. 18:25) Long stadi i kamap bihain, yumi bai stori long risen na yumi mas givim bel tru long sapotim wok bos bilong Jehova, na olsem wanem yumi inap mekim olsem.