“TOK Bilong God i gat laip na i wok strong i stap.” (Hib. 4:12) Dispela tok bilong aposel Pol i soim olsem tok bilong God i gat strong na ol man inap pilim tru long bel, na em inap kirapim ol long senisim laip bilong ol.

Bihain long taim ol aposel i dai, pasin apostet i kamap bikpela na ol manmeri i stat long kisim ol tingting kranki long strong i stap long tok bilong Baibel. (2 Pita 2:1-3) Ol hetman bilong lotu i kirap long skulim ol man olsem Baibel i gat sampela kain strong bilong mejik. Wanpela profesa nem bilong em, Harry Y. Gamble, em i raitim buk i stori long “pasin bilong ol man long tingim tok bilong Baibel olsem mejik.” Em i tok bihain long yia 200 C.E., wanpela Tisa Bilong Lotu, nem bilong em Origen, em i skulim ol man olsem “taim man i kolim tok bilong God, dispela inap helpim em: sapos ol tok ol i yusim long wok mejik i gat strong, orait ol tok bilong God i gat bikpela strong tru winim strong bilong wok mejik.” John Chrysostom, em i bin stap long 400 C.E., em i tok “Satan i no inap tru long i go long haus we i gat tok bilong Gutnius long en.” Em i tok tu olsem, sampela i save hangamapim ol hap tok bilong Gutnius long nek bilong ol bilong lukautim ol. Profesa Gamble i kamapim tu olsem tisa bilong Misin Katolik, Augustine, i skulim ol man olsem “sapos man i pilim het pen, em i ken putim Gutnius Bilong Jon aninit long pilo bilong em taim em i slip!” Olsem na ol man i kirap long yusim tok bilong Baibel olsem mejik. Olsem wanem? Yu save tingim Baibel olsem wanpela paspas, o samting i gat strong bilong lukautim yu?

Planti man i yusim Baibel long narapela pasin we i no stret. Ol i opim nating wanpela buk o Baibel, ol i ritim namba 1 tok ol i lukim, na ol i bilip olsem dispela tok bai helpim ol. Olsem: Profesa Gamble i tok, wanpela taim Augustine i harim nek bilong wanpela pikinini i singaut long wanpela haus i stap klostu na i tok: “Kisim na ritim, kisim na ritim.” Augustine i ting dispela em tok i kam long God, olsem na em i opim Baibel na ritim namba 1 tok em i lukim.

Taim sampela man i bungim ol hevi, ol i save beten long God, opim nating Baibel, na ol i bilip olsem namba 1 ves ol i lukim bai helpim ol long karim hevi bilong ol. Yu bin harim dispela kain stori? Em gutpela olsem ol dispela manmeri i laik kisim helpim long Baibel, tasol pasin ol i bihainim em i no stret.

Jisas i tokim ol disaipel bilong em olsem em bai givim “helpim, em holi spirit.” Em i tok moa olsem: “Em bai skulim yupela long olgeta samting na kirapim yupela long tingim bek ol samting mi bin tokim yupela long en.” (Jon 14:26) Olsem na Baibel inap helpim yumi taim yumi mekim wok long save yumi kisim pinis long en, na i no long opim tasol na ritim nating tok bilong en.

Planti man i bihainim pasin bilong opim na ritim nating tok bilong Baibel, na ol i tingim ol tok bilong en olsem samting i gat wanpela kain strong bilong lukautim man. Tasol Baibel i tambuim dispela kain pasin. (Wkp. 19:26; Lo 18:9-12; Apo. 19:19) “Tok bilong God i gat laip na i wok strong i stap,” tasol yumi mas save gut long olsem wanem yumi ken yusim dispela tok. Stretpela save long Baibel i save helpim ol man long mekim sindaun bilong ol i gutpela moa. Dispela kain save i bin helpim planti man long bihainim stretpela pasin, lusim ol pasin i nogutim laip bilong ol, strongim sindaun bilong famili bilong ol, na helpim ol long pas wantaim dispela Man husat i kamapim ol tok bilong Baibel.