‘Mipela i Mas Bihainim Tok Bilong God Tasol, Bilong Ol Man, Nogat’

‘Bikpela Yet Bai i Winim Pait’

TUPELA lain ami i stap bilong mekim pait. Ol i stap long narapela narapela sait bilong wanpela ples daun. Inap 40 de lain bilong Israel i stap wantaim pret. Goliat, nambawan soldia bilong ol Filistia i wok long sutim ol tok bilas long ol.​​—⁠1 Samuel 17:​1-4, 16.

Goliat i tok bilas long ol Israel na i tok: “Yupela makim wanpela man i kam pait long mi. Sapos em i win na kilim mi i dai, orait bai mipela i kamap wokboi nating bilong yupela. Tasol sapos mi win na kilim em, orait bai yupela i kamap wokboi nating bilong mipela. . . . Harim. Nau mi laik traim yupela ami bilong Israel. Yupela i mas makim wanpela man bilong pait long mi.”​​—⁠1 Samuel 17:​8-10.

Long dispela taim bipo i gat pasin olsem: Nambawan soldia bilong wanpela lain ami bai pait wantaim nambawan soldia bilong narapela lain ami. Sapos soldia i winim pait, orait lain ami bilong em i win. Tasol dispela soldia i wok long sutim tok bilas long ol Israel, em i no wanpela soldia nating. Em i wanpela traipela man​—⁠em i mekim ol Israel i pret nogut tru. Tasol pasin bilong Goliat long sutim ol tok bilas long ami bilong lain bilong Jehova, dispela pasin bai mekim na em i mas lus long pait.

Dispela em i no wanpela pait nating namel long tupela lain ami, nogat. Em i wanpela pait namel long Jehova na ol god bilong ol Filistia. Pret i mekim na strong bilong King Sol bilong Israel i pinis olgeta​—⁠em i no gat strong moa long kisim ami bilong em i go pait long ol dispela birua bilong God.​​—⁠1 Samuel 17:⁠11.

Yangpela Mangi i Bilip Long Jehova

Long dispela taim, wanpela yangpela mangi God i makim em pinis bilong kamap king bilong Israel em i go bilong lukim ol brata bilong em insait long ami bilong Sol. Nem bilong em Devit. Taim em i harim toktok bilong Goliat, em i tok: “Dispela Filistia em i haiden man tasol. Em i bikhet tumas na i laik tok bilas long ol ami bilong God i stap oltaim.” (1 Samuel 17:26) Long tingting bilong Devit, Goliat i makim ol Filistia, na ol god bilong ol tu. Olsem na i gat as na Devit i kros. Em i laik sambai long Jehova na lain Israel, na pait long dispela traipela man haiden. Tasol King Sol i tok: “Nogat tru. Yu no inap. Bai yu pait long em olsem wanem? Yu mangi nating tasol.”​​—⁠1 Samuel 17:⁠33.

Tingting bilong Sol na Devit i narapela narapela. Sol i lukim Devit olsem wanpela liklik wasman bilong sipsip tasol i skrap long pait wantaim wanpela traipela man em i man nogut tru. Tasol long tingting bilong Devit, Goliat i wanpela man nating tasol i sakim Nambawan Bikpela Jehova. As na Devit i gat strongpela bel, em i bilip tru olsem God i no inap larim ol man husat i tok bilas long nem na long lain bilong Em ol i abrusim strafe, nogat tru. Goliat i hambak long strong bilong em, tasol Devit i bilip tru long Jehova, em i kisim tingting bilong God long dispela samting.

“Mi Kam Pait Long Yu Long Nem Bilong Bikpela”

Bilip bilong Devit i gat as tru bilong en. Em i tingim taim God i bin helpim em long kisim bek sipsip bilong em long maus bilong wanpela bea na wanpela laion. Devit i bilip tru olsem nau Jehova bai helpim em long winim dispela traipela man Filistia i birua long ol. (1 Samuel 17:​34-37) Devit i kisim katapel na 5-pela liklik raunpela ston na em i go bilong pait long Goliat.

Devit i laik mekim dispela bikpela samting long strong em Jehova i save givim. Em i no pret  long tokim dispela Filistia: “Yu holim bainat na ol spia na yu kam pait long mi. Tasol mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en. Harim. Nau long dispela de tasol bai Bikpela i givim yu long han bilong mi. . . . Olgeta manmeri bilong olgeta kantri bai i save olsem, God bilong mipela Israel, em i God tru. Na olgeta man i stap hia bai i lukim olsem, Bikpela i save kisim bek ol manmeri bilong en long strong bilong em yet. Em i no save wari long ol man i holim spia na bainat. Nogat. Bikpela yet bai i winim dispela pait.”​​—⁠1 Samuel 17:​45-47.

Wanem samting i kamap? Baibel i tok: “Devit i win na i kilim Goliat long katapel wantaim ston tasol. Em i no gat bainat.” (1 Samuel 17:50) Em i no holim bainat, tasol God Jehova i helpim em long bikpela strong bilong Em. *

Em nau, pasin bilong Devit long bilip long Jehova i no lus nating! Sapos yumi mas makim wanpela bilong dispela tupela samting, olsem bai yumi pret long ol man, o bai yumi bilip long strong bilong Jehova long kisim bek yumi, em bai i no hatwok long makim. Yumi save: ‘Yumi mas bihainim tok bilong God tasol, bilong ol man, nogat.’ (Aposel 5:29) Na tu, taim yumi kisim tingting bilong Jehova long ol bikpela hevi i painim yumi, dispela bai helpim yumi long kisim stretpela tingting long ol dispela hevi.

[Futnot]

[Blok/Piksa long pes 9]

GOLIAT I BIKPELA OLSEM WANEM?

Stori bilong 1 Samuel 17:​4-7 i tokim yumi olsem longpela bilong Goliat em i klostu 3 mita. Goliat i traipela na strongpela man, tasol i gat narapela samting tu, em klos pait bilong em ol i wokim long bras. Hevi bilong en em samting olsem 50 kilogram! Stik bilong spia bilong en i bikpela olsem wanpela pos, na tit bilong spia ol i wokim long ain na hevi bilong en em samting olsem 7 kilogram. Man! I luk olsem hevi bilong klos bilong Goliat i winim hevi bilong Devit yet, laka?