Tasol long seim taim, sampela i tok olsem ol yangpela em ol i save lusim bikpela haptaim long Intenet, ol i gat ol hevi olsem . . .

• kalabus long yusim elektronik divais.

• insait long pasin bilong buli long narapela o ol narapela i buli long em long rot bilong Intenet.

• em isi tru long ol i lukim ponografi, maski ol i no tingting long lukim.

KALABUS LONG YUSIM OL ELEKTRONIK DIVAIS

Sampela samting long Intenet—kain olsem ol gem—ol i disainim long pasin we taim man i insait long en em bai kalabus long en. Buk Reclaiming Conversation i tok: “Ol aplikesen i stap long fon ol i disainim long pasin we i pulim yumi long yusim fon olgeta taim.” Ol bisnis i save kisim mani long ol edvetaismen bilong ol, so taim yumi lusim bikpela haptaim long wanpela aplikesen we i gat ol edvetaismen long en, dispela kampani bai kisim bikpela mani moa.

SAMTING BILONG TINGIM: Ol pikinini bilong yu i save hangamap tumas long fon? Hau bai yu helpim ol long yusim gut taim bilong ol?—EFESUS 5:15, 16.

BULI LONG NARAPELA LONG ROT BILONG INTENET

Taim sampela manmeri i yusim Intenet, ol i save yusim ol strongpela tok, ol tok nogut, na ol i no tingim filings bilong ol narapela—em ol pasin we inap kirapim man long buli long narapela.

Sampela manmeri i save mekim ol pasin i no gutpela taim ol i yusim Intenet bilong pulim ai bilong ol man long tingim ol na long kisim biknem. O sapos wanpela i kisim save olsem ol arapela i mekim sampela samting na ol i no singautim em, kain olsem go long wanpela pati, em inap pilim olsem ol i buli long em.

SAMTING YU MAS TINGIM: Ol pikinini bilong yu i save mekim ol tok i no gutpela long Intenet? (Efesus 4:31) Ol i save pilim olsem wanem taim ol narapela i no singautim ol long bung wantaim ol?

PONOGRAFI

Em isi long lukim ponografi long Intenet. Ol papamama i mas luksave olsem maski ol i putim ol aplikesen long fon bilong stopim ol samting nogut, ol i no inap pasim olgeta samting nogut long fon na pikinini inap lukim.

Sekstim—i makim pasin bilong yusim smat fon long salim mesis i stori long maritpasin, ol poto, o vidio bilong man o meri yet we em i stap as nating na dispela i brukim lo. Long sampela hap, ol yangpela em ol i salim o lukim piksa bilong ol narapela yangpela i stap as nating o mekim pasin pamuk, dispela em bikpela rong na ol inap kotim ol long en.

SAMTING BILONG TINGIM: Olsem wanem yu inap helpim ol pikinini bilong yu long sakim pasin bilong lukim o salim long Intenet piksa bilong ol manmeri i stap as nating?—EFESUS 5:3, 4.

SKULIM OL PIKININI BILONG YU

Maski ol pikinini i smat tru long yusim ol elektronik divais, ol i mas kisim tok yet bilong stiaim ol. Buk Indistractable i tok olsem taim papamama i givim ol pikinini wanpela smat fon o ol narapela elektronik divais paslain long pikinini i save gut long pasin bilong yusim ol dispela samting, “i wankain olsem ol i larim pikinini i kalap i go insait long wara taim pikinini i no save yet long swim.”

Lukim wanem ol tok yu laik bihainim, o raitim ol aidia bilong yu yet.

• Toktok wantaim pikinini long em i ken bihainim gutpela pasin taim em i putim ol tok long Intenet

• Helpim pikinini long daunim bel hevi taim ol narapela i no singautim em long bung wantaim ol

• Mekim ol samting bilong banisim pikinini long ol samting nogut i save kamap long Intenet

• Wan wan taim sekim fon bilong pikinini

• Makim hamas taim long olgeta de pikinini i ken yusim fon

• Putim lo long pikinini i no ken yusim fon long nait long taim bilong slip

• Putim tambu long famili i no ken yusim fon long taim bilong kaikai